Mayın 11-də Milli Məclisin Sədri Sahibə Qafarova Fransanın Azərbaycandakı fövqəladə və səlahiyyətli səfiri Ann Buayonla görüşüb. O, səfiri Fransanın Azərbaycandakı səfiri kimi fəaliyyətində ölkələrimiz arasında münasibətlərə öz töhfəsini verəcəyinə ümidvar olduğunu bildirib.

S.Qafarova ötən il iki ölkə arasında diplomatik münasibətlərin qurulmasının 30 illiyinin qeyd edildiyini və bu müddət ərzində diplomatik əlaqələrin zəngin tarixinin olduğunu diqqətə çatdırıb. O, həmçinin, tərəflər arasında iqtisadiyyat, ticarət, enerji, nəqliyyat, mədəniyyət, təhsil sahələrində müsbət əməkdaşlıq əlaqələrinin qurulduğunu bildirib. Qeyd olunub ki, çoxsaylı yüksək səviyyəli səfərlər və görüşlər ikitərəfli münasibət­lərimizdə mühüm rol oynayıb. S.Qafa­rova Prezident İlham Əliyevin Fransaya 13, Fransa prezidentlərinin ölkəmizə 3 dəfə səfər etdiyini xatırladıb. O, həmçinin Heydər Əliyev Fondunun Fransadakı fəaliyyətindən də söhbət açıb. 

Parlamentin Sədri ötən dövrlər­də ikitərəfli münasibətlərdə əldə olun­muş bu nailiyyətlərə baxmayaraq, bəzi Fransa rəsmilərinin və siyasətçilərinin Vətən müharibəsi zamanı və ondan sonrakı dövrdə açıq şəkildə Ermənista­na dəstəyini ifadə edən, Azərbaycanın ərazi bütövlüyünü şübhə altına alan və ermənipərəst siyasətini dəstəkləyən bə­yanatlarının Azərbaycan ictimaiyyətinin haqlı və ciddi narazılığına səbəb oldu­ğunu xatırladıb. Bu kimi təxribatçı bəya­natların ikitərəfli münasibətlərimizə mənfi təsir göstərdiyini qeyd edən S.Qafarova, bu çərçivədə Fransa Senatında və Milli Assambleyada qərəzli qətnamələrin qə­bul edilməsini pisləyib. O xatırladıb ki, 2022-ci ilin noyabrında Milli Məclis tərəfin­dən Fransa Senatında və Milli Assamble­yada Azərbaycan əleyhinə qətnamələrin qəbul edilməsini pisləyən bəyanat qəbul edilib və parlamentarilərimiz Fransanın rayon və şəhərlərinin nümayəndələrinin, Milli Assambleya və Senat üzvlərinin təx­ribat xarakterli fəaliyyətinə və bəyanatla­rına öz narazılıqlarını bildiriblər.

S. Qafarova Fransanın Avropa və Xarici İşlər naziri Ketrin Kolonnanın re­giona son səfəri, Laçın yolu ilə bağlı Ermənistanda verdiyi bəyanatlar, həm­çinin Fransanın ictimai radiosuna verdi­yi müsahibədə səsləndirdiyi iddiaları da qəbuledilməz adlandırıb. Onun fikrincə, bu kimi qeyri-obyektiv fikirlər göstərir ki, Fransa bu məsələdə birtərəfli, qərəzli mövqeyini davam etdirir. Hamıya aydın olmalıdır ki, Qarabağ regionu Azərbay­canın beynəlxalq səviyyədə tanınmış suveren ərazisidir və ölkəmizin ayrılmaz hissəsidir.

Görüşə yaradılan şəraitə görə, min­nətdarlığını bildirən səfir Ann Buayon Azərbaycanda diplomatik fəaliyyətə baş­layandan sonra keçirdiyi görüşlər barədə məlumat verib. Səfir iki ölkə arasında münasibətlərdə qanunvericilik orqanları­nın mühüm rolunu qeyd edib, parlamen­tarilərin qarşılıqlı əlaqələrinin əhəmiyyə­tini vurğulayıb. O, Fransa parlamentində qəbul olunan sözügedən qətnamələrin hökumət tərəfindən dəstəklənmədiyini bildirib.

Görüşdə qarşılıqlı maraq doğuran digər məsələlər haqqında da fikir müba­diləsi aparılıb.

Əliqismət BƏDƏLOV, “Xalq qəzeti”