Azərbaycanlı könüllü gənclər və ekofəalların Laçın-Xankəndi yolunda dinc etiraz aksiyası 128 gündür davam edir. Tədbir iştirakçılarının tələbi qarşı tərəfə, eləcə də bütün dünyaya yaxşı bəllidir: aksiyaçılar ölkəmizin faydalı qazıntı yataqlarının qanunsuz istismarına son qoyulmasını tələb edirlər.
Ekofəalların digər bir tələbi isə “Qızılbulaq” və “Dəmirli” yataqlarında monitorinqin keçirilməsi üçün uyğun şəraitin yaradılmasıdır. Bu yataqların qeyri-leqal istismarı mövcud qanunlara ziddir və buna görə də yolverilməzdir. Bəli, reallıq budur ki, ekoaksiyaçıların tələbləri ədalətli və qanunidir.
İrəli sürülən tələblər müstəqil Azərbaycanda formalaşmış azad, sivil və demokratik vətəndaş cəmiyyətinin sosial və siyasi sifarişidir və beynəlxalq hüquqa əsaslanır. Rusiya sülhməramlıları 10 noyabrda imzalanmış üçtərəfli Bəyanata uyğun olaraq bu tələbləri yerinə yetirməyə borcludurlar.
Lakin hələlik onlar bundan min bir bəhanə ilə imtina edirlər. Bəzi xarici qüvvələr də bölgədə vəziyyəti qarışdırmağa çalışırlar. Ancaq unudurlar ki, Azərbaycan dövləti və xalqı ölkə ərazisində qanunun pozulmasına heç bir halda imkan verməyəcək.
Ərazidə məskunlaşan bəzi erməni təşkilatları Laçın-Xankəndi yolundakı kütləvi aksiyaların guya dinc əhaliyə qarşı təşkil olunduğunu iddia edirlər və hətta bu barədə yerli və qlobal mediada saxta, qərəzli məlumatlar yerləşdirməyə cəhd edirlər. Onların əsassız iddialarına indi çox az adam inanır. Hər kəs yaxşı bilir ki, aksiya iştirakçıları qanunazidd heç bir hərəkətə yol vermir, üstəlik bəşəri, humanist prinsiplərdən çıxış edərək humanitar məqsədlərlə hərəkət edən nəqliyyat vasitələrinə maneəçilik törətmirlər. Bunu aprelin 18-də gün ərzində yoldan ötən maşınların sayı da bir daha təsdiq edir. Dünən gecə saat 22.00 radələrinə qədər hər iki istiqamətdə 77 avtomobil və yük maşını keçib.
İki gün qabaq könüllü olaraq ekofəalların sıralarında olmuş həmkarım, “Xocalının səsi” qəzetinin baş redaktoru Qalib Bəyməmmədoğlu bizimlə telefon söhbətində dedi ki, tədbir iştirakçıları ilk günlərdə olduğu kimi, hələ də yüksək fəallıq nümayiş etdirirlər. Onlar qəti surətdə tələb edirlər ki, doğma Qarabağın bütün guşələrində Azərbaycan dövlətinin qanunlarına zidd əməllərə yol verilməsin. Azərbaycanın təbii sərvətləri xalqımıza məxsusdur.
Qalib müəllim sonra bunları bildirdi:
– Mən artıq bir neçə dəfə könüllü olaraq kütləvi aksiyaların iştirakçısı olmuşam. Burada çox təsirli hadisələrin şahidi olmuşam. Lakin hər dəfə ən çox sübh tezdən Azərbaycanın Dövlət Himni səsləndiriləndə təsirlənmişəm.
Yeri gəlmişkən, ekoaksiyaçılar dünən də öz yeni “iş günləri”nə Azərbaycan himninin möhtəşəm sədaları altında başlayıblar. Bu gözəl və ecazkar musiqi ürəkləri riqqətə gətirir, gənc və alovlu qəlblərdə Vətən və torpaq sevgisini daha da gücləndirir.
Aksiya iştirakçıları sonra ekoloji terrorun dayandırılması ilə bağlı Azərbaycan, rus və ingilis dillərində plakatlar qaldırıblar, “Azərbaycan milləti qoruyacaq sərvəti!”, “Azərbaycan oyaqdır, sərvətinə dayaqdır!”, “Azərbaycan vahiddir, sərvətinə sahibdir!”, “Ekocinayətə son!” kimi şüarlar səsləndiriblər.
Bəzi ermənipərəst qüvvələrə xidmət edən informasiya saytlarının yazdığının tam əksinə olaraq, həmişəki kimi, ekoaksiyanın keçirildiyi ərazidə humanitar məqsədlərlə istifadə olunan avtomobillərin sərbəst keçidi üçün heç bir maneə yoxdur.
M.HACIXANLI, “Xalq qəzeti”