Günün reportajı
Düz 34 il bundan əvvəl – 1990-cı il yanvarın 20-də təpədən-dırnağadək silahlanmış sovet ordusunun Azərbaycan xalqının azadlıq istəyini boğmaq məqsədilə törətdiyi faciə qan yaddaşımıza dönüb.
Bu gün həm qürur, həm də ürəkağrısı ilə qeyd etdiyimiz 20 Yanvar faciəsi heç zaman unudulmayacaq. Şaxtanın qılınc kimi kəsdiyi qanlı şənbə gecəsində günahsız və əliyalın insanları qanına qəltan edənlər nifrətlə xatırlanır, şəhadətə yüksələn azadlıq arzulu insanlarsa böyük ehtiramla anılır. Onları buna görə daim urvatda tuturuq ki, gələcək nəsillər də xəbərdar olsunlar, unutmasınlar.
Əbədiyyətə qovuşanlar arasında gənclər çoxdur, eyni zamanda qadınlar, uşaqlar və qocalar, təcili yardım və polis əməkdaşları da olub. Bu isə vəhşi hərbçilərin ağına-bozuna baxmadan “atəşfəşanlıq” etdiklərinin sübutudur. Qanlı hadisələrdən 34 il keçməsinə baxmayaraq, Azərbaycan xalqı o müdhiş gecənin qəhrəmanlarının xatirəsini ehtiramla yad edir.
Neçə gündür ki, Bakının ən uca yeri – Şəhidlər xiyabanı yenə ziyarətçilərlə doludur. Hələ faciənin ildönümünə hazırlıq işləri davam etdiyi bir vaxtda buraya gələnlərin ardı-arası kəsilmirdi. Onların arasında müxtəlif idarə və təşkilat nümayəndələri, dövlət qurumlarının əməkdaşları, Vətən müharibəsi qaziləri, hərbi qulluqçular, veteranlar, QHT təmsilçiləri və şəhidlərin ailə üzvləri, qohum və yaxınları, sağlıqlarında şəhidləri şəxsən tanımasalar da, adları ilə fəxr edən sadə vətəndaşlar da var.
İnkişafa və İslahatlara Dəstək İctimai Birliyinin sədri Ramil Əliyev deyir:
– Düz 34 il keçsə də, ki, biz bu tarixi bir an belə unutmadıq. Məhz bu tarixdə–1990-cı il yanvarın 19-dan 20-nə keçən gecə Azərbaycan xalqına qarşı ən qəddar cinayətlərdən biri baş verib. Mixail Qorbaçovun başçılığı ilə Sovet rejimi Bakıda əsl qətliam törədib – yerli və mərkəzi hökumətdən Qarabağ münaqişəsinin ədalətli həllini tələb edən dinc əhalidən qisas alınıb.
Müdafiə naziri marşal Yazovun rəhbərlik etdiyi 20 min nəfərlik ordu hissələri ölkədə Kommunist Partiyasının hakimiyyətini qorumaq məqsədilə Bakı şəhərinə soxulub. “Zərbə” kod adı verilən hərbi müdaxilə nəticəsində yüzlərlə insan öldürülüb, yaralanıb, qanunsuz olaraq həbs edilib, itkin düşüb. Bununla belə, 20 Yanvar faciəsi xalqımızın yaddaşında hüzn və kədər, qürur və qəhrəmanlıq səhifəsi kimi qalıb. O gecə şəhidlərin qanı ilə Azərbaycanın yeni tarixi yazılıb. Dövlət müstəqilliyimizin bərpası, azadlığımız üçün ilk növbədə 20 Yanvar şəhidlərinə borcluyuq. Yanvar faciəsinin ertəsi günü o vaxt Moskvada yaşayan ümummilli lider Heydər Əliyev Azərbaycanın Rusiyadakı daimi nümayəndəliyinə gəlib, burada xalqımızın kədərini bölüşüb və kommunist rejiminin respublikamızda həyata keçirdiyi qanlı aksiyanı qətiyyətlə pisləyən bəyanatla çıxış edib. Böyük liderin bu addımı xalqımıza güc verib, ona dayaq və dəstək olub.
20 Yanvar xalqımızın tarixində təkcə faciə deyil, həm də istiqlal mücadiləsinin qələbəsi, milli məfkurəmizin azadlıq istəyinin oyanış günüdür. Sovet imperiyasının əsarətində yaşamağa məhkum olan xalqın azadlıq səsini ucaltdığı, öz suverenliyi uğrunda cəsarət nümayiş etdirdiyi şərəfli bir tarixdir.
Faciənin növbəti ildönümü ilə əlaqədar əllərində üçrəngli Azərbaycan bayrağı, qırmızı qərənfillər və şəhid şəkilləri tutan məktəblilər də müqəddəs məkanın ziyarətinə tələsirlər. Vəhşilik, ölüm-itim nə olduğunu bilməyən, məsum baxışları ilə irəliyə boylanan, sabahımızın sahibləri olacaq bu körpə fidanlar nahaq yerə ölümsaçan güllələrin həyatlarına son nöqtə qoyduğu günahsız Vətən oğullarının məzarları üstünə tər çiçəklər düzür, “Allah rəhmət eləsin” deyirlər.
Onlara yaxınlaşırıq. Səbayıl rayonu Rafael Hüseynov adına 49 saylı məktəbdə oxuduqlarını bildirirlər. 20 Yanvar hadisələri barədə nə düşündüklərini soruşuruq. Şagirdlərdən biri – Elvin Səmədov 20 Yanvar günündə günahsız insanlarımızın şəhid olduqlarını deyir:
– Şəhidlər haqqında, Vətən övladlarının qəhrəmanlıqları barədə evdə valideynlərim, məktəbdə müəllimlərim danışıblar, kitablardan da oxumuşam. Fəxr edirəm ki, indi də müqəddəs şəhidləri ziyarət etməyə gəlmişəm. Onların xatirəsi əzizdir. Hər birini daim ehtiramla yad edirik. Çünki alovsaçan silahlardan qorxmayaraq, azadlıq naminə meydanlara axışıblar.
Sonra balaca müsahibimiz bir bənd şeir söyləyir:
20 Yanvar günü, o qanlı gecə,
Silahsız xalqıma divan tutdular.
Azadlıq deyərək toplaşan xalqa
Odlu silahlarla atəş açdılar.
Biz məktəblilər inanırıq və ümid edirik ki, qəhrəman xalqımız hər zaman möhkəm və güclü olacaq.
Məktəbin kimya-biologiya müəllimi Gülşən Şahməmmədova uşaqlarla söhbətimizə qoşulur:
– Hər dəfə eyni şövqlə bu misraları təkrarlayırlar. Mən özüm 1990-cı ildə baş vermiş həmin faciənin şahidlərindənəm. Həmin gün imtahan vermək üçün Azərbaycan Pedaqoji Universitetinin Bayıl ərazisindəki korpusuna tərəf gedirdim. Şahid oldum ki, “Azneft meydanı”ndan tanklar əli yalın insanlara atəş açaraq irəliləyirlər. Həmin anları indi də xatırlayanda qəlbimdən qara qanlar axır.
G.Şahməmmədova həmin hadisələr zamanı necə sağ qalmağından da danışdı:
– O gün yaşlı bir kişi güllə mənə dəyməsin deyə, üzərimə atıldı, ancaq özü yaralandı. Şoka düşdüm. Onu bilirəm ki, çox yerdə asfalt qana boyanmışdı, bax, burada yatan şəhidlərimin qanı... İnsanlar da qan ağlıyırdı. Kimi qardaşını, kimi atasını, anasını, kimi də canından şirin olan övladını bu faciədə qurban vermişdi. Biz onlara hər zaman borcluyuq. Allah şəhidlərimizə qəni-qəni rəhmət eləsin.
Şagirdlər qara mərmər lövhələrdən boylanan hər bir şəhidin qarşısında ayaq saxlayır, onların kimliyi, həlak olduğu şərait barədə müəllimlərinin danışdığı hekayətlərə qulaq kəsilirlər. Bu gün eşitdikləri əhvalatlar, şəkillərini gördükləri nurlu simalar, aldıqları təəssüratlar heç vaxt onların yadından çıxmayacaq...
“Bu uşaqlara baxanda bir daha əmin oluram ki, Vətənimiz belə övladlarımızın çiyinlərində hər zaman böyüyəcək, inkişaf edəcək”. – Bu sözləri isə Şəhidlər xiyabanının qarşısındakı yoldan keçən ziyarətçilərimizdən biri deyir. Özünü təqdim etməyini xahiş edirik. Tanış oluruq. Bu, Bakı Dövlət Universitetinin estetika kafedrasında çalışan Aydın Kərimovdur. Qanlı Yanvar faciəsinin onun yaddaşında nə kimi izlər qoyduğunu soruşuruq.
– Yanvarın 19-u mən Qubaya gedmişdim, – deyə cavab verir. – Elə həmin gün də qayıtmalı oldum. Bakıya gələndə fərqli mənzərə ilə qarşılaşdım. Yolun sağ tərəfi tanklarla, BTR-lərlə dolu idi. Sonra mənə zəng gəldi ki, sovet ordusu paytaxtımıza qoşun yeridib, ehtiyatlı olun. Birtəhər evə gəldim. Gecə məlum oldu ki, doğrudan da, tanklardan əhaliyə atəşlər açılıb. Xalq həmin gün meydanlara yığılmışdı. Gecəylə əsgərlər “Sahil” metrostansiyasının qarşısını bağlamışdılar. Elə həmin gün elə atışma başladı. Təsəvvür edirsinizmi, əliyalın, dinc insanlara qarşı birtərəfli qaydada vuruşan ordu!.. Nə gözləmək olardı ki? Minlərlə insan mərdcəsinə, əliboş olsa da, qəlbi, mənəviyyatı dolu şəkildə tankların qabağına çıxırdı. Mənim bir dostum var idi, onun qızı da həmin gecə şəhid oldu: Larisa Məmmədova... Nə deyim, Allah onlara rəhmət eləsin.
Bakıdakı 133 nömrəli tam orta məktəbin müəllimi Aliyə Hüseynova bu günün xalqımızın qan yaddaşından silinmədiyini qeyd edir:
– Bir müəllimə olaraq bu gün özümə borc bilirəm ki, şagirdləri gətirib tarixin qan yaddaşını əyani şəkildə göstərim. Azərbaycan xalqının qəhrəmanlıqları danışmaqla bitib-tükənmir, biz bu qəhrəmanlığı şagirdlərimiz ilk dərsə gəldiyi gündən öyrədir və Vətənə, torpağa sevgini ən incə detalları ilə başa salırıq.
20 yanvar faciəsi sovet hakimiyyətinin Azərbaycan xalqına qarşı ən amansız hazırlanmış etnik təmizləmə siyasəti idi, lakin xalq olaraq, millət olaraq biz ən ağır günlərimizdə bir olmağı bacardıq. Bakıya yeridilmiş silahlı dəstələrin qarşısına əliyalın çıxdıq. Azad ölkəmizin bugünkü rifahını canından keçən ömrünü Vətənin azadlığına qurban verən şəhidlərimizə borcluyuq. Allah bütün şəhidlərimizə rəhmət eləsin.
AMEA-nın Botanika İnstitutunun elmi işçisi, dosent Yusif Eyvazov da qədirbilən xalqımızın böyük mübarizəsindən qürurla danışır:
– 20 Yanvar hadisələrinin canlı şahidiyəm. O günləri öz gözlərimlə görmüşəm. O dövrdəki hadisələr, oyanış hərəkatı olmasaydı, biz bu gün belə yaxşı vəziyyətdə olmazdıq. Həmin günlərdə xalq ölümdən qətiyyən qorxmurdu. Həqiqətən çox ağır gün idi. Bu böyük milli hərəkat idi. Biz fərx edirik ki, belə igidlərimiz var, onlar hər zaman bizim qəlbimizdə yaşayacaqlar. Şəhidlərin hamısı cənnətməkandır...
Ziyarətçilər arasında Azərbaycan Turizm və Menecment Universitetinin (ATMU) strateji inkişaf məsələləri üzrə prorektoru Araz Aslanlı ilə qarşılaşırıq. O da hər bir azərbaycanlı kimi bu müqəddəs ziyarət yerinə mənəvi borcu olaraq gəldiyini bildirir:
– 20 Yanvar Azərbaycan tarixinin ən böyük qəhrəmanlıq dastanlarından biridir. Bu gün əldə etdiyimiz bir çox tarixi zəfəri – müstəqilliyimizi, suverenliyimizin tam bərpa olunmasının başlanğıc nöqtəsi 20 Yanvardakı şanlı mübarizəmizdir. O gecə yazılan qəhrəmanlıq dastanı xalqımızın ümid mənbəyi oldu. Biz həmin mübarizə sayəsində, sadəcə, müstəqilliyimizi əldə etməklə qalmadıq, eyni zamanda gələcəyə ümidlə baxdıq. Bilirdik ki, xalqımızda olan azadlıq, müstəqillik ruhu, həmçinin qorxmazlıq, cəsurluq bizi daim gələcəyə aparacaq. 20 Yanvar gecəsinin tarixi davamı olan 44 günlük müharibədə əldə etdiyimiz zəfər, eyni zamanda 2023-cü il sentyabr ayında keçirilən lokal xarakterli antiterror tədbirləri bütöv Azərbaycanın tarixi parçalarıdır. Bu gün bir daha bütün şəhidlərimizi yad edirik, Allahdan onlara rəhmət diləyirik. Çünki onların qəhrəmanlıq mübarizəsi nəticəsində biz bu gün suverenliyimizi bərpa etmişik. Dünyada qalib xalq kimi tanınırıq.
Azərbaycan Milli Konservatoriyasının nəzdində Respublika İncəsənət Gimnaziyasının müəllimi Ramella Əliyeva:
– 1990-cı il yanvarın 19-dan 20-nə keçən gecə Bakıda baş verən qanlı qətliam, onun dəhşətli nəticələri, yüzlərlə günahsız insanın gülləbəran edilməsi illər, əsrlər keçsə belə, yaddaşımızdan silinə bilməz. Azərbaycan xalqının başına tarix boyunca bu günə qədər çox müsibətlər açılıb, lakin xalqımızın əzmini, iradəsini heç bir zaman sındıra bilməyiblər. Hər dəfə yenidən dirçəlib ayağa qalxmış, uca məramımıza, haqq işimizə doğru yürümüşük. Bunu lap yaxın keçmişdə – 3 il öncə igid, qəhrəman oğullarımız bütün dünyaya bir daha sübut etdilər. Doğma Qarabağımızı, Şərqi Zəngəzurumuzu işğalçılardan təmizlədilər.
Bu gün də 20 Yanvar şəhidlərini dərin hörmətlə anırıq. Gənc nəslin vətənpərvərlik ruhunda tərbiyə olunması məqsədilə faciənin ibrət dərslərini şagirdlərə bütün açıqlığı ilə, faktlarla çatdırılmasına çalışırıq.
Ziyarətə gələnlərin ardı-arası kəsilmək bilmir. Onlardan biri – Mərkəzi Elmi Kitabxananən direktoru, professor Məmməd Əliyevdən ürək sözlərini söyləməsini xahiş edirik. Məmnuniyyətlə müsahibə verir:
– Gənclərimiz tarixi həqiqətləri bilməlidirlər. Yaxın tariximizin öyrənilməsi və araşdırılması vacib vəzifədir. 1990-cı ilin 20 Yanvar faciəsi də öyrənilməli və gələcək nəsillərə olduğu kimi çatdırılmalıdır. Qan yaddaşımıza əbədi həkk olunmuş bu hadisələr tariximizin özündə faciə və qəhrəmanlığı ehtiva edən unikal səhifə, Azərbaycanın sonrakı taleyinə əhəmiyyətli təsiri olan dönüş anıdır.
20 Yanvar hadisələrinin Azərbaycanın suverenliyi, müstəqilliyi və ərazi bütövlüyü uğrunda mübarizədə həm rəmzi mənası, həm də fenomenal rolu oldu. Faciənin yaratdığı ictimai-siyasi reallıq süqutu yaxınlaşan SSRİ-də və soyuq müharibənin bitməsi ərəfəsində beynəlxalq arenada formalaşan geosiyasi situasiya fonunda əvvəlcə Azərbaycan SSR-də, sonra müstəqil Azərbaycanda zəncirvarı tarixi proseslərə təkan verdi.
Bu hadisələr milli məfkurənin inkişafına güclü təkan vermiş oldu. Qürurla deyə bilərəm ki, 20 Yanvar Azərbaycan tarixində təkcə faciə deyil, istiqlal yolumuzun ilk zirvəsi, milli məfkurəmizin azadlıq istəyinin oyanış günüdür. Bu, uzun illər sovet imperiyasının əsarətində yaşayan xalqın azadlıq səsini ucaltdığı, öz suverenliyi uğrunda cəsarət nümayiş etdirdiyi şərəfli bir tarixdir.
20 Yanvar hadisələri, eyni zamanda Azərbaycan xalqına qarşı törədilmiş siyasi terror kimi də qiymətləndirilməlidir. İşğalçılıq siyasəti ilə Azərbaycanın suverenliyinə qəsd etmiş, xalq hərəkatını boğmaq üçün bədnam kommunist ideologiyası libasında köhnə imperiya iddialarını həyata keçirmək məqsədilə bu faciəni təşkil etmiş Sovet İttifaqı Kommunist Partiyası, Sovet dövləti və hökuməti rəhbərliyinin, şəxsən Mixail Qorbaçovun Azərbaycan xalqına qarşı ağır cinayət törətdiyi danılmaz faktdır.
Qeyri-Hökumət Təşkilatlarına Dövlət Dəstəyi Agentliyinin icraçı direktoru Aygün Əliyeva:
– Bu günlər xalqımızın qan yaddaşında həmişəlik qalacaq. Çünki 34 il əvvəl Azərbaycanın azadlığı yolunda şəhid olan 20 Yanvar faciəsinin qurbanları öz qanları ilə tariximizə əbədiyyət salnaməsi yazıblar. Bu tarix bizi bir yumruq kimi birləşdirdi və bütün dünya azərbaycanlılarının gücünü dünyaya bəyan etdi. Bu hadisə nəinki Azərbaycanı, bütün dünyanı lərzəyə gətirsə də, o zaman yerli hakimiyyət orqanları baş verənlərin üzərindən sükutla keçməyə üstünlük verdi, xalqın milli faciəsinə laqeyd münasibətini ortaya qoyaraq Kremlin qəzəbinə tuş gəlməkdən çəkindi. O ağır və faciəli günlərdə Azərbaycan xalqına qarşı bu siyasi terrorun, vəhşi aktların həyata keçirildiyini ilk olaraq cəsarətlə bütün dünyaya bəyan edən Ulu öndər Heydər Əliyev oldu. Məhz ulu öndər baş verən hadisələri hüquqa, demokratiyaya, hüquqi dövlət quruculuğu prinsiplərinə zidd hesab etdiyini Moskvada çəkinmədən söylədi. Yüzlərlə insanın qətlə yetirilməsini Azərbaycan xalqına qarşı qatı cinayət adlandıraraq hadisəyə siyasi qiymət verilməsini tələb etdi.
Bu gün Bakının ən yüksək nöqtələrindən birində hər bir azərbaycanlı üçün müqəddəs and yerinə çevrilmiş bir məkan var. Bura 20 Yanvar faciəsi qurbanlarının və Ermənistanın hərbi təcavüzünə qarşı döyüşlərdə həlak olanların dəfn edildiyi Şəhidlər xiyabanıdır.
İllər ötsə, nəsillər dəyişsə də, xalqın həyatında baş verən hadisələr tarixə çevrilir. Xalqımızın qan yaddaşına yazılan hadisələrdən biri olan 20 Yanvar faciəsi heç zaman unudulmur. Ulu öndər Heydər Əliyevin təbirincə desək, 1990-cı ilin 20 yanvarı Azərbaycan xalqının tarixinin ən faciəli, qara səhifəsi, həm də qəhrəmanlıq, rəşadət səhifəsidir.
Əli NƏCƏFXANLI,
Anar TURAN,
Ayşən AZADOVA,
Şahanə XANKİŞİYEVA,
Elşən AĞALAR (foto)
XQ