Qanlı Yanvar faciəsinin 34-cü ildönümü ilə əlaqədar xarici ölkələrdə də anım tədbirləri keçirilib.
“XQ” xəbər verir ki, Ankarada Azərbaycanın Türkiyədəki səfirliyi, Türkiyə–Azərbaycan Dostluq, Əməkdaşlıq və Həmrəylik Fondunun (TADİV) birgə təşkilatçılığı ilə TADİV-in Şuşa Konfrans Mərkəzində bir araya gələrək şəhidlərin xatirəsini yad ediblər. Anım mərasimində Türkiyənin dövlət rəsmiləri, ictimaiyyət nümayəndələri, orada yaşayan azərbaycanlılar və bu ölkədə təhsil alan hərbçilərimiz iştirak ediblər.
Mərasimdə 20 Yanvar faciəsinə həsr olunan qısametrajlı film və bu qanlı hadisədən sonra Türkiyənin İğdır vilayətində keçirilən Azərbaycana dəstək mitinqinin görüntüləri nümayiş etdirilib. Tədbirdə Azərbaycanın Türkiyədəki səfiri Rəşad Məmmədov, Türkiyə Prezidenti yanında Təhlükəsizlik və Xarici Siyasət Şurasının üzvü, TADİV-in və Azərbaycan Evinin rəhbəri, professor Aygün Attar, Türkiyə-Azərbaycan Parlamentlərarası Dostluq Qrupunun sədri, millət vəkili Şamil Ayrım və Mərmərə Qrupu Strateji Tədqiqatlar Mərkəzinin sədri Akkan Suver çıxış ediblər.
Natiqlər Azərbaycanın müstəqilliyini əldə etdikdən sonra ərazi bütövlüyü naminə uzun müddət mübarizə apardığını və bu müqəddəs amal uğrunda mübarizədə minlərlə Vətən övladının canından keçdiyini bildiriblər. Azərbaycanın 20 Yanvar tarixini əsla unutmayacağı qeyd olunub. 30 il işğal altında qalmış torpaqların azad edilməsi ilə şəhidlərin ruhunun şad olduğu bildirilib. Tədbir çərçivəsində 20 Yanvar faciəsinə həsr olunan sərgi də açılıb.
***
20 Yanvar faciəsinin 34-cü ildönümü ilə əlaqədar Əskişəhərdə keçirilən anım mərasimi Əskişəhər Azərbaycanlıları Dərnəyinin təşkilatçılığı ilə baş tutub. Ölkəmizin müstəqilliyi uğrunda canlarından keçmiş şəhidlərin əziz xatirəsi bir dəqiqəlik sükutla yad edilib.
Mərasimdə dərnək sədrinin müavini Sirac Yaquboğlu və Azərbaycanın Türkiyədəki səfirliyinin əməkdaşı Aygün Qocayeva çıxış edərək 20 Yanvar hadisələrinə gətirib çıxaran ictimai-siyasi proseslər, sovet imperiyasının Azərbaycan xalqının haqq səsini boğmaq məqsədilə Bakıda və ölkəmizin digər bölgələrində hərbi cinayətlər törətməsi, bu faciənin ölkəmizin müstəqilliyinə gedən yolda dönüş nöqtəsinə çevrilməsi barədə ətraflı məlumat veriblər.
Anım tədbirində 20 Yanvar faciəsindən bəhs edən videoçarx nümayiş olunub.
***
Azərbaycanın Pakistandakı səfirliyi bu ölkənin Milli Müasir Dillər Universitetində (MMDU) fəaliyyət göstərən Azərbaycan Dili və Mədəniyyəti Mərkəzində 20 Yanvar şəhidlərinin anım gününə həsr olunan “20 Yanvar – Azərbaycan tarixinin qəhrəmanlıq salnaməsi” adlı seminar keçirib. Seminarda universitetin müəllim-tələbə heyəti, bu ölkənin beyin mərkəzlərinin nümayəndələri, eləcə də səfirlik əməkdaşları iştirak edib.
Ölkəmizin Pakistandakı səfiri Xəzər Fərhadov bu il 20 Yanvar faciəsinin 34-cü ildönümünün anıldığını bildirib, Azərbaycanın müstəqilliyi, habelə ölkəmizin suverenliyi və ərazi bütövlüyü uğrunda canlarından keçən qəhrəman şəhidlərin xatirəsinin dərin hörmətlə yad edildiyini söyləyib. Tariximizə Qanlı Yanvar kimi daxil olan bu hadisənin təkcə faciə kimi deyil, eyni zamanda müstəqillik uğrunda xalqımızın apardığı azadlıq mübarizəsinin zirvəsi kimi Azərbaycan tarixinə həkk olunduğunu vurğulayıb.
Diplomat Müzəffər Ali Baş Komandan, Prezident İlham Əliyevin rəhbərliyi altında Azərbaycan Ordusunun torpaqlarımızı erməni işğalından azad etdiyini və ölkəmizin suverenliyini və ərazi bütövlüyünü bərpa etdiyini vurğulayıb.
Seminarda çıxış edən MMDU-nun xarici dillər fakültəsinin dekanı professor Cəmil Əsgər Cami və Pakistanın Davamlı inkişaf üçün Qlobal Strateji İnstitutunun icraçı direktoru Məhəmməd Şakil Əhməd Azərbaycan xalqını böyük keçmişi olan xalq adlandıraraq, 20 Yanvar hadisələrindən söhbət açıb və bu hadisələrin Azərbaycan xalqının azadlıq mübarizəsinin simvolu olduğunu bildiriblər. Çıxışçılar Azərbaycanın Vətən müharibəsindəki qələbəsindən də danışaraq ölkəmizin müstəqilliyi, suverenliyi və ərazi bütövlüyü uğrunda canlarından keçən şəhidlərin xatirəsini hörmətlə yad ediblər.
***
Ölkəmizin Koreya Respublikasındakı səfirliyində orada təhsil alan azərbaycanlı tələbələrin iştirakı ilə keçirilən anım tədbiri də yadaqalan olub.
Səfir Ramin Həsənov 20 Yanvarın Ümumxalq Hüzn Günü olmaqla yanaşı, həm də Azərbaycanın müasir tarixində qəhrəmanlıq səhifəsi olduğunu vurğulayıb, xalqımızın müstəqillik uğrunda mübarizəsində şəhidlərin yeri və rolundan danışıb. Sonra o, Cənubi Koreyanın media təmsilçiləri üçün 20 Yanvar faciəsi ilə əlaqədar brifinq keçirib və jurnalistləri 20 Yanvar hadisələrinin mahiyyəti barədə məlumatlandırıb, bu faciənin insanlığa qarşı törədilmiş cinayət olduğunu vurğulayıb.
Diqqətə çatdırılıb ki, Ümummilli lider Heydər Əliyev faciənin ertəsi günü 20 Yanvar hadisələri barədə dünya ictimaiyyətinə məlumat verib və bu hadisənin günahkarlarını ən sərt şəkildə tənqid edib. Səfir sovet hakimiyyətinin törətdiyi qanlı cinayətin xalqımızın azadlıq iradəsini qıra bilmədiyini, əksinə, bu hadisənin Azərbaycanın müstəqilliyinin bərpası yolunda dönüş nöqtəsi olduğunu bildirib.
***
Azərbaycanın Təbriz şəhərindəki Baş konsulluğunda da 20 Yanvar faciəsinin 34-cü ildönümü ilə bağlı təşkil olunan tədbirdə həmin qanlı hadisədən bəhs edən sənədli film göstərilib. Həmçinin Baş konsulluqda fotosərgi təşkil edilib və ehsan süfrəsi açılıb.
Mərasimdə İranın Şərqi Azərbaycan valilisinin siyasi və ictimai məsələlər üzrə müavini Torab Məhəmmədi, Şərqi Azərbaycan valiliyinin siyasi bürosunun baş direktoru Həsən Həqiqian, Şərqi Azərbaycan valiliyinin ümumi və beynəlxalq əlaqələr üzrə idarəsinin baş direktoru Məhəmməd Əzizi Rad, İİR XİN-in Şimal-Qərb nümayəndəliyinin rəhbəri Tohid Nəzəfzadə, Türkiyənin Təbrizdəki baş konsulu Çetin Taner və Baş konsulluğun əməkdaşları, Təbriz Mətbuat Evinin rəhbəri Mürtəza Şəfiyi, bu şəhərdə yaşayan Azərbaycan vətəndaşları və onların ailə üzvləri, tələbələr iştirak ediblər.
Baş konsul Əliyənnağı Hüseynov bildirib ki, 34 il bundan əvvəl, şaxtalı bir qış axşamında keçmiş SSRİ-nin qoşun birləşmələri bir neçə istiqamətdən Azərbaycana daxil olaraq, paytaxt Bakıda, ardınca isə ayrı-ayrı rayonlarda insanlıq əleyhinə cinayət törədib, bütün bunlar azmış kimi, o dövrdə faciənin əsl mahiyyətini ört-basdır etmək üçün Azərbaycan xalqına qarşı şər və böhtan kampaniyası aparıblar. Qanlı Yanvar hadisələri təcavüzkar Ermənistanın Azərbaycana qarşı əsassız ərazi iddiaları səbəbindən baş vermiş prosesdir. Ermənistanın işğalçılığına, Moskva hakimiyyətinin bu məsələyə birtərəfli və riyakar münasibətinə kəskin etiraz edən Azərbaycan xalqı küçə və meydanlara axışaraq ərazi bütövlüyünün təmin olunmasını tələb edib.
Qorbaçovun əmri ilə Bakıda qətllər törədən ordu birləşmələri qadın, uşaq və qocalara belə rəhm etmədən dinc əhaliyə divan tutublar. Lakin Azərbaycan xalqı sonadək öz hüquqlarını müdafiə edib və sonda müstəqilliyinə qovuşub.
***
Azərbaycanın Küveyt Dövlətindəki səfirliyində bu ölkədə yaşayan və çalışan icma üzvlərinin, həmçinin Küveytdə təhsil alan azərbaycanlı və türk tələbələrin iştirakı ilə 20 Yanvar – Ümumxalq Hüzn Günü ilə qeyd olunub.
Səfir Emil Kərimov Azərbaycan xalqının tarixinə hüzn və qəhrəmanlıq günü kimi daxil olmuş Qanlı Yanvar hadisələri ilə bağlı çıxış edib. O, ötən əsrin sonlarında, SSRİ-nin süqutu ərəfəsində erməni millətçilərinin Azərbaycana qarşı növbəti ərazi iddiaları qaldırmaları, Qarabağın Ermənistana birləşdirilməsini tələb etmələri, eyni zamanda ekoloji terrorun həyata keçirilməsinin xalqımızın haqlı narazılığına və etirazlarına səbəb olduğunu diqqətə çatdırıb.
Qeyd edilib ki, qətliamla nəticələnən hərbi əməliyyat SSRİ və Azərbaycan Sovet Sosialist Respublikasının konstitusiyalarının, habelə Ümumdünya İnsan Hüquqları Bəyannaməsinin, Mülki və Siyasi Hüquqlar üzrə Beynəlxalq Paktın kobud şəkildə pozulması demək idi.
Səfir çıxışında Ümummilli lider Heydər Əliyevin və Prezident İlham Əliyevin rəhbərliyi ilə 20 Yanvar şəhidlərinin ailə üzvlərinə göstərilən qayğı barədə də məlumat verib.
“Vətənsevər” Azərbaycan–Küveyt Mədəniyyət və Dostluq Cəmiyyətinin sədri Könül Hacızadə çıxış edərək 20 Yanvar faciəsinin xalqımızın iradəsinin sarsılmazlığının, mətinliyinin göstəricisi olduğunu diqqətə çatdırıb.
Sonra tədbir iştirakçıları Qanlı Yanvar hadisələri barədə Azərbaycan dövlət televiziyasının istehsalı olan “Qəhrəmanlıq tariximizin 20 Yanvar səhifəsi” adlı sənədli filmə baxıblar. Bununla yanaşı, tədbirin keçirildiyi zalda fotostend quraşdırılıb, müxtəlif dövrlərdə nəşr edilmiş kitab və jurnallar təqdim edilib.
***
Azərbaycanın Livandakı səfirliyində təşkil olunan mərasimdə 20 Yanvar hadisələrinin xalqımızın müstəqillik mübarizəsində mühüm yer tutduğu qeyd edilib, bu faciənin həm də Azərbaycanın tarixinə qəhrəmanlıq səhifəsi kimi daxil olduğu vurğulanıb.
Çıxışlarda 20 Yanvar faciəsinin Azərbaycanın müstəqilliyinin bərpası yolunda dönüş nöqtəsi olduğu bildirilib. Böyük təzyiq və çətinliklərə baxmayaraq, Ümummilli lider Heydər Əliyevin həmin dövrdə güclü siyasi iradə nümayiş etdirdiyi xüsusi qeyd olunub.
Anım tədbirində, həmçinin müstəqilliyin bərpasından sonra Azərbaycanın keçdiyi yol, əldə etdiyi iqtisadi yüksəliş, xalqımızın qəhrəmanlıq salnaməsində yeni parlaq səhifə olan 44 günlük Vətən müharibəsi və postmünaqişə mərhələsində atılan addımlardan da danışılıb.
***
Stokholmdakı “Zorakılığa qarşı” abidəsinin qarşısında 20 Yanvar faciəsinin ildönümü ilə əlaqədar toplantı keçirilib. Azərbaycanın İsveçdəki səfiri Zaur Əhmədov bu günün xalqımızın tarixinə əsl qəhrəmanlıq səhifəsi kimi həkk olunduğunu vurğulayıb.
Səfir qeyd edib ki, toplantının Stokholmun mərkəzində – “Zorakılığa qarşı” abidəsinin önündə baş tutması rəmzi məna kəsb edir. Bu, xalqımızın hər zaman sülhpərvər olmasına dəlalət edir. Tarixi Qələbə nəticəsində suverenliyini və ərazi bütövlüyünü tam bərpa etmiş Azərbaycan öz qonşuları ilə dinc və mehriban şəraitdə yaşamağa önəm verir.
Anım mərasiminin iştirakçıları şəhidlərin xatirəsini dərin ehtiramla yad edib, abidənin önünə əklil qoyublar.
Qulu KƏNGƏRLİ,
Namiq QƏDİMOĞLU,
Səxavət NAZİMOĞLU
XQ