YARAT Müasir İncəsənət Məkanı Dənizkənarı Milli Parkın ərazisində şəhər mədəniyyəti ilə Novruz adət-ənənələrini birləşdirən “Battle 4 LastCharshanba” festivalını keçirib.

AZƏRTAC xəbər verir ki, festival “URBAN ArtCommunity Azerbaijan” təşkilatı və Dənizkənarı Bulvar İdarəsinin dəstəyi ilə təşkil olunub.

Festival çərçivəsində maraqlı yarışlar, interaktiv ustad dərsləri və küçə rəssamlarının təqdimatları olub.

Festivalın proqramı saat 13:00-da Səid Rzayevin rəhbərliyi ilə “Street Xonça” ustad dərsi ilə başlayıb. Bu ustad dərsi iştirakçılara Novruz ənənələrinin müasir şəhər mədəniyyəti ilə birləşməsini araşdırmaq imkanı verdi.

Bundan başqa bulvar ərazisində “Scratch Session” skeytbord yarışı da baş tutub. Burada skeytbordçular öz bacarıqlarını nümayiş etdiriblər. Tədbir zamanı Anar Şəmsinin rəhbərliyi ilə ustad dərsi və “Mortal Eggs” döyüşü də keçirilib. “Tema var” art zonasında yumurta döyüşləri olub.

Bundan əlavə, “Graffiti Jam” layihəsi çərçivəsində şəhərin məşhur küçə rəssamları canlı şəhər incəsənət səhnəsini vurğulayaraq öz işlərini təqdim ediblər.

Festival proqramı XX-XXI əsrlər Azərbaycan Rəngkarlığı Muzeyində breykdans və qarışıq rəqs üslubları üzrə müsabiqələrlə davam edib. Qeyd edək ki, rəqs müsabiqələrinin xüsusi qonağı əfsanəvi gürcü dicey Qoça Xuxuni olub.

Festivalın sonunda möhtəşəm rəqəmsal tonqal – “Inferno Mode” təqdim olunub, onun ətrafında iştirakçılar bayramın birliyini və ruhunu tərənnüm edən ənənəvi Novruz rəqsi olan yallı ifa ediblər.