Bir çox xalqların dilinə tərcümə olunaraq çap edilmiş məşhur “Drakula” əsəri irland yazıçısı, romançı, qısa hekayələr müəllifi və teatr tənqidçisi kimi tanınmış Brem Stokerin qələminin məhsuludur. Bu roman ilk dəfə 1897-ci ildə İngiltərədə çap olunub.
Maraqlıdır ki, tənqidçilərin heyrancasına etiraflarına baxmayaraq, müəllifin sağlığında “Drakula” ona qazanc gətirə bilməyib. Brem Stoker son günlərini yoxsulluq içində yaşayıb, hətta Kral Ədəbiyyat Fonduna mərhəmət qrantı verilməsi barədə sənəd təqdim edib.
“Drakula”nın 1922-ci ildə ekranlaşdırılması sayəsində əsərə 2-ci nəfəs verilib. Alman rejissor Fridrix Vilhelm Murnau yazıçının ailəsindən icazə almadan, romanın motuvləri əsasında səssiz “Nosferatu” dəhşət filmini çəkib. Bununla bağlı qızışan mübahisələr fonunda cəmiyyətdə əsərin ilkin mənbəsinə maraq yaranıb. Romanın növbəti uğurlu kinoversiyası isə 1992-ci ildə təqdim olunub. Eyniadlı fantezi (ədəbiyyatdan götürülmə – Ə.D.) əsərini amerikalı rejissor Frensis Ford Koppola çəkib. Həmin film 3 “Oskar”a layiq görülüb.
Epistolyar kult romanı janrında qələmə alınmış əsərin baş qəhrəmanı əsilzadə-vampir, qraf Drakuladır. Əsər başdan-başa qəhrəmanların qeydləri, məktubları və gündəlikləri əsasında qurulub. İngilis romantizminin maraqlı nümunələrindən olan “Drakula” romanında oxucu gerçək sevginin, etibarın, güvəncin qüdrətini həyəcan və dəhşətlə izləyir.
“Oskar” mükafatları almış filmdə, eyni zamanda, ölüb-dirilən Drakulanın zühurundan xəbərsiz olan gənc hüquqşünas Conatan Harkerin əzablı sərgüzəşti diqqət çəkir. O, Transilvaniyaya yollanır ki, bir qrafa İngiltərədən daşınmaz əmlak almaqda kömək göstərsin. Əsilzadə onu sevimli qonağı kimi qarşılayır. Amma sövdələşmə başa çatandan sonra hər şey dəyişir – qorxunc həqiqətləri öyrənmiş hüquqşünas qədim qəsrdə girov saxlanır...
Bir sözlə, ingilis romantizminin maraqlı nümunələrindən sayılan “Drakula” öz mahiyyəti etibarı ilə bütün qorxulara qalib gələnlərin romanıdır. Həyəcan dolu dramatik anlarla zəngin əsər oxuculara əsl bədii zövq aşılayır.
Ə.DOSTƏLİ
XQ