Xalq artisti olan böyük balerina, pedaqoq, professor Leyla Vəkilovanın xatirəsi daim onu sevənlərin ürəyində yaşayır. Nə qədər ki, Azərbaycan mədəniyyəti və incəsənəti var, neçə ki, onun ifalarını canlı olaraq görənlər yaşayır, Leyla xanım unudulmayacaq.
O, səhnəyə çıxanda sanki döşəmə pəmbə buluda dönürdü və Leyla ayağının ucunda gəzə-gəzə o buludu əzmək istəməyən, qanad çala-çala yerə-göyə “naz satan” qu quşuna çevrilirdi. İlahi, hardandı onda bu qədər plastika, ahəngdarlıq, romantik vüsət?! Onun seyri adama sehirli yuxu kimi gəlirdi, Cənnətin ecazkar guşəsinə 1 saatlıq güzardı sanki. Yerə enmiş mələk öz rəqsləri ilə qəribə bir ovsun yaradırdı – hayıl-mayıl olmamaq mümkün deyildi. O gedəndən sonra yaranan təəssürat isə mələk qanadından qopmuş ağ lələk kimi xəyallarda yellənirdi...
Xatırlayırıq ki, 2018-ci ildə YARAT Müasir İncəsənət Mərkəzində “Qanadlı xatirələr. Leyla Vəkilova” adlı ilk sənədli film hazırlanıb göstərilmişdi. Dörd dildə – Azərbaycan, rus, ingilis və ispan dillərində səsləndirilən həmin film seyrçiləri yetərincə heyrətləndirmişdi. İndi isə Nizami Kino Mərkəzində “Vəkilova” filmi təqdim olundu. Hər iki adda “Vəkilova” soyadının olması, bəlkə də, onun Azərbaycan baletinin əsl vəkili olmasına işarədir.
Sənətinin Leylası 8 yaşında balet məktəbinə gedib, Ədilə və Qəmər Almaszadələrdən peşənin incəliklərini öyrənib. Moskva Xoreoqrafiya Məktəbini də bitirib və sonra Bakıya qayıdaraq Opera və Balet Teatrında çalışıb. Adının keçmiş SSRİ-nin ən məşhur balerinaları sayılan Marina Semyonova, Qalina Ulanova, Mayya Plisetskaya, Natalya Dudinskaya və Olqa Lepesinskaya ilə bir siyahıda, yanaşı çəkilməsinə nail olub. Balet ustası 1953-cü ildən ömrünün sonuna kimi Bakı Xoreoqrafiya Məktəbində klassik rəqslər fənnindən dərs deyib və 1992-ci ildən həm də bu təhsil ocağına bədii rəhbərlik edib. O, həmçinin 1976–1982-ci illərdə Azərbaycan Dövlət Rəqs Ansamblının rəhbəri olub.
Sayca 2-ci filmin təqdimatında Mədəniyyət Nazirliyi və Azərbaycan Respublikası Kino Agentliyinin (ARKA) məsul əməkdaşları, kino xadimləri, digər qonaqlar iştirak edirdilər.
ARKA-nın baş direktoru vəzifəsini icra edən Orxan Fikrətoğlu rəqs sənətimizin görkəmli nümayəndəsi haqqında filmin əhəmiyyətindən danışdı. O digər sənət fədailəri haqqında da filmlərin lentə alınacağını diqqətə çatdırdı.
Filmin ssenari müəllifi və rejissoru, Əməkdar artist Samir Səmədov, ekran əsərinin prodüseri isə Gülnarə Lütfəliqızıdır. İki ay ərzində ərsəyə gələn ekran işi Azərbaycan dilindən savayı, ingilis və rus dillərində də səsləndirilib. Filmdə Leyla Vəkilovaya aid arxiv materiallarından istifadə olunub.
Qeyd edək ki, Leyla Vəkilova müxtəlif illərdə A.Adamın “Jizel”, R.Qlierin “Qırmızı lalə”, P.Çaykovskinin “Sonalar gölü”, “Yatmış gözəl”, “Şelkunçik”, L.Minkusun “Don Kixot”, A.Kreynin “Laurensiya”, B.Zeydmanın “Qızıl açar”, B.Asafyevin “Bağçasaray fontanı”, Ə.Bədəlbəylinin “Qız qalası”, Q.Qarayevin “Yeddi gözəl”, “İldırımlı yollarla”, S.Hacıbəyovun “Gülşən” və digər baletlərdə yaddaqalan obrazlar yaradıb.
Filmin nümayişi bir daha gözlər önündə Leyla Vəkilovanın heyrətamiz sənəti haqqında təsəvvürləri canlandırdı, ona rəhmət oxutdurdu.
Əli NƏCƏFXANLI
XQ