Xəbər verdiyimiz kimi, Azərbaycan Ədəbiyyat Fondu ilə “Ulduz" jurnalı “Ədəbiyyat və İncəsənət" portalının media dəstəyi ilə yaşı 35-dək gənc yazarlar arasında Xalq yazıçısı Anarın 85 illik yubileyinə həsr edilmiş hekayə müsabiqəsi keçirib. 

Hələ yeniyetmə çağlarında “Bayram həsrətində”, “Asqılıqda işləyən qadının söhbəti” və “Sabah ayıq olacayıq” he­kayələri ilə ədəbiyyata gələn Anarın adına müsabiqənin təşkili gənc yazarların yara­dıcılığının püxtələşməsinə dəstək məramı daşıyırdı. Müsabiqədə münsiflər tərəfin­dən əvvəlcə 200-ə yaxın iştirakçı arasın­dan 8 finalçı müəyyənləşdirilmişdi. Sonra finalçılar arasından qalib və mükafatçıla­rın adları açıqlanıb. Belə ki, Cavid Baba­yev “Üçnəfərlik motosikletlər” hekayəsinə görə 1-ci yerə layiq görülüb. Gənc yazar­lar Orxan Cuvarlı 2-ci, Xan Abdulla 3-cü yerlərdə qərar tutublar. Bəşir Niftəliyev və Səma Quliyeva isə həvəsləndirici nomina­siyada yer alıblar. 

Himayədarı “Azeristeel” MMC Metal Konstruksiylar Zavodu, informasiya və təşkilati dəstəkçiləri “Ədəbiyyat və in­cəsənət” portalı ilə “Şirvan” cəmiyyəti olan müsabiqənin mükafatlandırma mərasimi 2 fevral Azərbaycan Gəncləri Günündə AYB-nin Natəvan klubunda təşkil olunub. Tədbiri Ədəbiyyat Fondunun direktoru, yazıçı Varis açaraq, Xalq yazıçısı Anarın yubileyinə həsr olunan müsabiqə barədə məlumat verib. Görkəmli qələm sahibi, AYB-nin sədri Anar yaradıcılığına olan eh­tirama görə minnətdarlığını bildirib, müsa­biqənin iştirakçılarına və qaliblərinə yeni uğurlar arzulayıb.

Əsasən gənc yazarların ədəbi tribu­nası olan “Ulduz” jurnalının baş redakto­ru, şair Qulu Ağsəs Xalq yazıçısı Anara və onun adına təşkil edilmiş müsabiqə­nin qaliblərinə ən xoş arzularını çatdırıb. Obyektiv şəkildə, sırf ədalət prinsipi üzrə keçirilən bu hekayə yarışmasından sonra gənclər üçün Xalq şairi Vaqif Səmədoğ­lunun 85 illik yubileyi münasibətilə şeir müsabiqəsinin də elan olunduğu diqqətə çatdırılıb. 

Müsabiqənin final mərhələsində mün­siflər heyətinin rəhbəri olmuş tanınmış ya­zıçı Hüseynbala Mirələmov, AYB-nin sədr müavini, Mətbuat Şurasının sədri Rəşad Məcid, yazıçı Təranə Vahid və başqaları müsabiqənin önəmindən bəhs edib, gənc­lərin yaradıcı potensialının açılmasında bu kimi tədbirlərin böyük rol oynadığını vurğulayıblar.

Sonda qaliblər mükafatlandırılıblar. Onlara pul mükafatları, fəxri diplomlar və Xalq yazıçısı Anarın imzası ilə kitablar təqdim edilib. 

Ə.ƏİYEV
XQ