Məşhur sülh carçısı fotojurnalist Reza Deqatinin silsilə sərgiləri Fransanın regionlarında davam edir.

Bretany regionunun Vannes şəhərində fotojurnalistin “Sükutun dərinliyi” adlı sərgisinin açılışı olub. R.Deqati əsl sənətkar kimi sözünü, fikirlərini fotoları vasitəsilə ötürür. Onun reallığı əks etdirən fotoları qarşısında sözə ehtiyac olmur. Bu sərgilər hər şeyi fotoların dili ilə çatdırır.

Həmişə olduğu kimi, R.Deqatinin sərgilərində Azərbaycan, eləcə də onun işğalçılar tərəfindən yerlə-yeksan edilmiş şəhər və kəndlərini əks etdirən fotolar da nümayiş olunur. Erməni işğalı dövründə vəhşicəsinə dağıdılmış şəhər və kəndlərimizi əks etdirən Deqati fotoları ilə ictimaiyyətə əsl həqiqətləri çatdırır.

Reza uzun illərdir dünyanın müxtəlif qaynar nöqtələrindən çəkdiyi fotolarla humanist baxışını beynəlxalq media, eləcə də kitablar, sənədli filmlər, konfranslar, seminarlar və sərgilər vasitəsilə Fransada və xaricdə bölüşür. O, 1979-cu ildən dünyada baş verən sarsıntıların əsl şahididir. Reza “sülh müxbiri” titullu müharibə müxbiridir. Fotoqrafiya doğma ölkəsindən didərgin düşmüş Rezanı həyata bağlayan yeganə teldir.

Reza Deqati Azərbaycanın 30 illik işğal dərdini də fotoları vasitəsilə beynəlxalq ictimaiyyətə çatdırır. O, sərgiləri çərçivəsində təşkil etdiyi konfranslar vasitəsilə də Azərbaycan reallıqlarını sənətsevərlərə ötürür.

Onun sərgilərinin komissarları Raşel Deqati və Fransada sərgilər kuratoru Pyer Bonciovanidir. R.Deqatinin sərgiləri yay fəslində yerli ictimaiyyət və xarici turistlərin ən sevimli ziyarət məkanı olur. (AZƏRTAC)