Azərbaycan Animasiya Assosiasiyası və “PERİ FİLM” MMC-nin təşkilatçılığı, Mədəniyyət Nazirliyi və Kino Agentliyinin dəstəyi ilə uşaqlar və böyüklər üçün nəzərdə tutulmuş ənənəvi 6-cı ANİMAFİLM Beynəlxalq Animasiya Festivalı öz işinə başlayıb. Sentyabrın 6-da Nizami Kino Mərkəzində festivalın açılışına həsr olunmuş tədbir keçirilib.
Açılış mərasimində iştirak edən mədəniyyət nazirinin müavini Səadət Yusifova çıxış edərək animasiya filmlərinin cəmiyyətdəki rolundan danışdı. Bildirdi ki, bu sahənin inkişaf etdirilməsi və gələcək nəsillərə çatdırılması çox vacibdir: “Hər kəsin uşaqlıq xatirəsi olan bir animasiya filmi var. Animasiya filminin adı gələndə və ya ona baxmaq imkanı olanda böyük nəsil sanki öz keçmişinə qayıdır. Animasiya sahəsinin digər özəlliyi ondan ibarətdir ki, ən kiçik yaşlı uşağı və ən böyük yaşlı insanı bir araya gətirə bilir. Bu baxımdan animasiyanın cəmiyyətdə rolu vacibdir. Bugünkü festivala ümumilikdə 46 ölkədən 174 film daxil olub. Hər il olduğu kimi, bu il də tamaşaçılar dünyanın müxtəlif ölkələrindən təqdim edilən onlarla müasir animasiya filmi ilə tanış olmaqla yanaşı, bu sahənin peşəkarları ilə fikir mübadiləsi apararaq, eləcə də müxtəlif ustad dərslərində iştirak etmək hüququ qazanıblar”.
Sonra müsabiqədənkənar proqrama uyğun olaraq “Qadınların qadınlar üçün çəkdiyi filmlər” adlı animasiyalar təqdim olundu. Tədbirdə İranda etiraz aksiyaları zamanı təhlükəsizlik qüvvələri tərəfindən qətlə yetirilmiş Azərbaycan türkü Hədis Nəcəfi haqqında çəkilmiş “Hədis” filmi, müsəlman aləmində demokratik yolla seçilmiş ilk qadın millət vəkili Pərixanım Sofiyeva haqqında gürcü filmi də nümayiş etdirildi.
Daha sonra Isveçrə Konfederasiyasının Azərbaycandakı səfirliyinin Missiya rəhbərinin müavini, Beynəlxalq əməkdaşlıq şöbəsinin rəhbəri Alberto Hernandez və festivalın xüsusi qonağı “Oskar” mükafatçısı niderlandlı rejissor Mixael Dudok de Wit VI ANİMAFİLM Beynəlxalq Animasiya Festivalı haqqında fikirlərini bölüşərək burada iştiraklarından məmnunluqlarını bildirdilər.
Sonda niderlandlı rejissor Mixael Dudok de Witin “Ata və qız” filmi nümayiş olundu.
“Qadın hüquqları” adlı animasiya festivalı müsabiqədənkənar, müsabiqə və peşəkarlar adlı proqramlardan ibarətdir.
Müsabiqədənkənar proqramda tematik nümayişlərin – festivalın mövzusuna uyğun filmlərin və retrospektivlərin – dünyaca məşhur animasiya müəlliflərinin əsərlərinin nümayişləri nəzərdə tutulur. Festivalın növbəti günlərində isə bu proqrama daxil olan Yaponiyanın “Ghibli” studiyasının “Oscar” mükafatına namizəd “Qırmızı tısbağa” (“The Red Turtle”) və “Oscar” mükafatı qazanmış “Ruhlarla sovrulanlar” (“Spirited Away”) tammetrajlı filmləri, eləcə də mükafata layiq görülmüş Hindistan animasiya filmləri nümayiş etdiriləcək.
Münsiflər heyəti 46 ölkədən daxil olmuş 174 film arasından müsabiqəyə 13 ölkədən 39 film qəbul edib. Bu filmlər 2 beynəlxalq və 2 yerli kateqoriyalar üzrə yarışacaq. Seçilmiş filmlər beynəlxalq münsiflər və uşaq tamaşaçıları tərəfindən qiymətləndiriləcək.
Peşəkarlar üçün nəzərdə tutulmuş proqramda isə yerli animasiya film layihələri təqdim olunacaq, beynəlxalq münsiflər heyəti, eləcə də xüsusi qonaqlarla görüşlər, masterklaslar və vörkşoplar təşkil ediləcək. Proqram çərçivəsində “Oscar” mükafatı laureatlı rejissor Maykl Dudok de Vit-in, kanadalı animator Matthe Mattheu Lyon-un masterklasları təşkil olunacaq. Gürcüstanlı rejissor Ana Chubinidze və hindistanlı Tehzeeb Khurana isə uşaqlar üçün animasiya vörkşopları keçirəcəklər.
İsveçrə İnkişaf və Əməkdaşlıq Agentliyinin dəstəyi ilə “Animasiya filmləri vasitəsilə qadın haqları” adlı vörkşop və maliyyə proqramı da təşkil olunacaq. Layihədə seçilmiş 5 qadın rejissor üçün avropalı mentorlar - isveçrəli rejissor İsabelle Favez və fransalı prodüser Olivier Catherin tərəfindən təlimlər və fərdi görüşlər təşkil olunacaq.
Azərbaycan kinosunun 125 və Cəfər Cabbarlı adına “Azərbaycanfilm” kinostudiyasının yaradılmasının 100 illiyi münasibətilə “Klassik Azərbaycan animasiya filmləri” tədbirində milli animasiyamızın inciləri olan filmlərin nümayişi keçiriləcək. Qeyd edək ki,müsabiqə qaliblərinin seçimi 6 xarici mütəxəssisin də daxil olduğu beynəlxalq münsiflər heyəti tərəfindən həyata keçiriləcək.
ANİMAFİLM festivalı Azərbaycanın ilk və tək animasiya festivalıdır. Festival uşaq və gəncləri, animasiya rejissorlarını və studiyaları bir araya gətirərək onları beynəlxalq təcrübə ilə tanış edir, onları peşəkar yerli və xarici animasiya ustaları ilə görüşdürüb yüzlərlə animasiya filmləri nümayiş etdirir, ustad dərsləri, konfranslar, konsertlər, tamaşalar və sərgilər keçirir.
Qeyd edək ki, festival çərçivəsində 13 ölkədən 39 filmin nümayiş olunacağı, “təxminən” 20 tədbir keçiriləcəyi və 60-dan çox animasiya filminin nümayiş olunacağı gözlənilir. Bu il festivaldan əldə olunacaq bütün gəlirlər qadın rejissorlarımıza dəstək məqsədilə ianə ediləcək.
Fidan HÜQUQQIZI,
Elşən AĞALAROV (foto)
XQ
