O, 23 il SSRİ Dövlət Televiziya və Radio Komitəsi sədrinin birinci müavini vəzifəsində çalışıb
Sovet Məlumat Bürosunun keçmiş baş redaktoru, Nürnberq prosesinin tərcüməçisi Ənvər Məmmədov 100 yaşında vəfat edib. TASS xəbər verir ki, bu barədə sovet və Rusiya televiziyası və radiosu xadimi, jurnalist, Rusiya Jurnalistlər İttifaqının üzvü Yevgeni Şirokov bildirib.
O deyib: “Bəli, həqiqətən belədir, Ənvər artıq yoxdur”. Y.Şirokov Ə.Məmmədovla 15 il birgə işləyib, onun 8 ilini isə bilavasitə onun rəhbərliyi altında çalışıb. O qeyd edib: “Mən Mərkəzi televiziyada gənclər üçün proqramlar şöbəsinin baş redaktoru idim. Biz hər gün ünsiyyətdə idik, gündə bir neçə dəfə danışırdıq. Onun kimi ağlasığmaz dərəcədə iş bacarığına malik ikinci bir insana rast gəlməmişəm. Ənvərin heyrətamiz qavrama qabiliyyəti var idi, bu isə televiziya üçün son dərəcə vacibdir. Demək olar ki, bir neçə saniyədə əsas mənanı tuta və qeyri-dəqiq məqamları görə bilirdi. Çiynində hiss etdiyi ağır məsuliyyət yükünə baxmayaraq, inanılmaz dərəcədə yumor hissini hər zaman qoruyub saxlaya bilirdi, hər bir həmkarı ilə dil tapmağı bacarırdı. Ciddi idi, lakin heç vaxt peşəkar etikadan kənara çıxmırdı. Ondan nümunə götürməyə dəyərdi, indiki zəmanədə belə insanlara rast gəlmək mümkün deyil”.
Rusiya Jurnalistlər İttifaqının rəhbəri Vladimir Solovyov əfsanəvi həmkarının ailəsinə və silahdaşlarına dərin hüznlə başsağlığı verib. “Ənvər Məmmədov həqiqətən sovet jurnalistikasının və diplomatiyasının əsl əfsanəsi idi. O, tərcüməçi kimi Nürnberq prosesində iştirak edib, müharibədə olub, informasiya agentliklərinə və televiziyaya rəhbərlik edib”, – deyə o qeyd edib.
Qeyd edək ki, Ənvər Məmmədov sözügedən prosesdə iştirak edən iki azərbaycanlıdan biri olub. SSRİ Xarici İşlər Nazirliyinin xətti ilə 1945-ci ilin dekabrından 1946-cı ilin fevralına qədər Nürnberq beynəlxalq hərbi tribunalında alman dili tərcüməçisi qismində digər bir azərbaycanlı – o vaxt 26 yaşı olan Ələsgər Məmmədov da iştirak edirdi. Ə.Məmmədov İkinci Dünya müharibəsindən qayıtdıqdan sonra uzun onillər boyu Bakı Dövlət Universitetində ərəb dili və ədəbiyyatı kafedrasına rəhbərlik edib.
Ənvər Məmmədov 1923-cü il avqustun 15-də Bakı şəhərində müəllim ailəsində dünyaya gəlib. İkinci Dünya Müharibəsində iştirak edib, daha sonra Nürnberq prosesində beynəlxalq tribunalın Sovet İttifaqı hissəsinin tərkibində tərcümə bürosunun rəis müavini vəzifəsində çalışıb. O, həmçinin Xalq Komissarlığında və Xarici İşlər Nazirliyində müxtəlif vəzifələrdə işləyib. 1956-cı ilədək SSRİ Radio Komitəsinin baş redaksiyasında baş redaktor vəzifəsini tutub. 1959–1960-cı illərdə Ə.Məmmədov Sovet Məlumat Bürosunda baş redaktor, rəisin birinci müavini, 1961-ci ildən “Novosti” Mətbuat Agentliyi (APN) sədrinin birinci müavini olub. O, 1962-ci ildən 1985-ci ilədək SSRİ Dövlət Televiziya və Radio Komitəsi sədrinin birinci müavini vəzifəsini tutub.
Ənvər Məmmədov 1970-1980-cı illərdə respublikamızın bütün sahələrdə əldə etdiyi parlaq uğurların ümumittifaq televiziyası ilə işıqlandırılmasında fəal iştirak etməyi özünə borc bilirdi. Xalqımızın zəngin mədəniyyəti barədə Mərkəzi Televiziyada dəyərli telematerialların hazırlanmasına xüsusi həssaslıqla yanaşardı.
Sonda qeyd edək ki, görkəmli telejurnalist Ənvər Məmmədov Moskvada yüksək vəzifələrdə çalışdığı illərdə doğma Bakı ilə daim əlaqə saxlayar, həmvətənlərinin, bütövlükdə xalqımızın uğurlarına hədsiz dərəcədə sevinərdi. Xəzəri xüsusilə çox sevirdi. Ruhu şad olsun!
Məsaim ABDULLAYEV
XQ
.jpg)
