Kino təkcə kadrlar və filmlər məcmusu deyil. O, özü ilə milli yaddaşı təmsil edir. Lentdən yaddaşımıza köçənlər illər uzunu bizi düşündürə bilər. Müstəqillik illərində çəkilən belə ekran işlərindən biri də Ramiz Rövşənin ssenari müəllifi, Şamil Nəcəfzadənin rejissoru olduğu “Qala” filmidir. Film 2008-ci ildə ekranlaşdırılıb.
Əfqanıstan savaşının bitib, Qarabağ müharibəsinin başlanması ərəfəsində Qarğalar kəndinə çəkiliş qrupu gəlir . Şərti adı “Qeyrət dastanı” olan filmin rejissoru Rafiq müəllim kənddəki qalaya həqarətli münasibət göstərir. Tarixi yaddaşı təmsil edən qarğaya daş atır. Kənddəki tarixi şüurun daşıyıcısı isə Əbil müəllimdir. (Vidadi Həsənov) Düşmən təcavüzü ərəfəsində Əbil müəllimin qalanın daşlarının aparılmasından danışması düşündürücüdür. Çünki qala bu anlamda, bütövlükdə, vətəni təmsil edir.
Övladı Qərbi Azərbaycanda incidilən Soltan kişi (Rasim Balayev) onun yolunu gözləyir. Onunla bənzər taleyi olan Əsli arvaddır (Sona Mikayılova). Onun övladı Əfqanıstan savaşında həlak olsa da, buna inana bilmir. Soltan kişinin “Allah Əfqanıstanda dava salanın evini yıxsın” deməsi sovet siyasətininin bəlalalarını ifadə edir. İndi onun özü də bu bəlanın içərisindədir. Lakin onların ikisinin də övladlarının qayıdcağına ümidi var.
Əbil müəllim dərsdə Qarğalar kəndinin tarixindən danışır. O qədim yəhudi torpağının Adameya olduğunu deyib, bu sözün insan toplusu mənasında olduğunu bildirir. Kəndə gəldikdə bir şagird bunun qarğalar yığnağı olduğunu soruşmasına bütün sinif gülür. Lakin Əbil müəllim ustalıqla bu suala da cavab verir. Kəndin adının Qarğalar olmasının səbəbini tarix boyu onun üzərinə düşmən hücumlarının olması ilə əlaqələndirir.
Bu versiyanı Soltan kişi daha dəqiq izah edir. Bakıdan kino çəkmək üçün gələn Seyiddən (Elman Rəfiyev) adının mənasını soruşur. Deyir ki, heç kəs övladına boş yerə belə ad qoymaz. Soltan kişi bir seyidin 300 il bundan qabaq qalada düşmənlərlə vuruşub şəhid olduğunu xatırladır. Bununla da kəndin adı mötəbər məqam qazanır.
Yaddaşa mənfi münasibət bəsləyən Rafiq müəllimin filmi yarımçıq qalır. Buna səbəb baş rol ifaçısının atdan yıxılması olur. Əslində, bunu təsadüf hesab etmək olmaz. Dolayısı ilə bildirilir ki, milli ruhdan məhrum Rafiq müəllim kimi adamlar tarixi film çəkə bilməzlər. Bununla da Bakıdan gətirilən ağ at qalada qalmalı olur. Onu bu məkanda qoruyan isə Xanbaladır. O Qala adlı rus qızına uşaq məhəbbəti bəsləyir. Onu Kepkalı oğlan kimi bir avaradan qorumağa çalışır. Bununla Əbil müəllimin atalıq etdiyi Xanbalanın kişi xarakteri ortaya çıxır. Filmin sonunda biz bunu aydın görürük. Yıxılan aktyora yardım üçün gələn həkimin mesajı da diqqətçəkicidir. Onun “İndi at vaxtı deyil, tank vaxtıdır, tank!” deməsi düşmən qarşısında aciz olmamağın mesajını verir.
Ötən əsrin 20–30-cu illərində kino kütlələri dindən uzaqlaşdırmaq məqsədi daşıyırdı. “Qala” filmində buna qarşı çıxılır. Soltan kişi Osmanın (Pərviz Məmmədrzayev) qayıtması ilə bağlı duaları müstəcəb olsun deyə kəndin köhnə məscidini bərpa etmək istəyir. İnanır ki, övladı bununla sağ-salamat qalacaq. Lakin bu zaman köhnə daş-divar yox, film üçün düzəldilmiş dekorasiya dada çatır. Onlar bu məkanda ibadətlərini bərpa edirlər. Soltan kişinin dekorativ gümbəzə çıxıb azan verməsi mənəvi dəyərlərə qayıdışı simvolizə edir.
Soltan kişinin arzusu gerçəkləşsə də, faciə baş verir. Düşmənlərin törətdiyi fəlakətlər Osmanın ürəyini ağrıdır. Ona görə də atası ilə ayaqüstü görüşdən sonra anasını görmədən həlak olur. Osmanın dəfnində Soltan kişi bir əhdini də yerinə yetirir. Onun məzarı üstündə toyundaymış kimi rəqs edir. Soltan kişinin faciəsi təkcə şəxsi deyil, həm də millidir. Çünki övladı kəndin ilk şəhidi hesab edilir.
Azərbaycanın adət-ənənəsi “Dədə Qorqud” dastanlarından başlayır. Filmdə adların xüsusi mənası var. Kəndə düşmən hücumu zamanı Xanbalanın balaca olsa da, qaçmaması Kepkalı oğlanın isə tez özünü qadınlar olan maşına dürtməsi bunu təsdiq edir. Həmçinin Seyidin 300 il öncəki şəhiddən nümunə götürərək, şəhərli ola-ola kənddə qalıb düşmənə müqavimət göstərməsi bu ənənənin təzahürü kimi görünür. Deməli, “Qala” filmində Dədə Qorqud yaddaşı da iştirak edir.
Əbil müəllimin fikri bu olur: “Nə qədər qaçacağıqsa, o qədər qovacaqlar”. Geri durmamaqla bağlı bu deviz düşmənin növbəti hücumu zamanı özünü doğruldur. Soltan kişi, Əsli arvad, Seyid və digərləri birləşib düşmənə müqavimət göstərməyə hazırlaşırlar. Kino çəkilişindən qalan top da köməklərinə çatır. Onlar düşmənə görk olsun deyə onu qalanın başına qaldırırlar. Tarixi yaddaş bu dəfə praktiki əhəmiyyət daşıyır...
“Qala” filmi müstəqil Azərbaycan kinosunun ciddi əsərlərindən biri hesab olunur. Çünki kinomuzda milli yaddaşın əksi elə də çox deyil. 2020-ci ilin “Zəfər Yürüşü” ilə əzəli torpaqlarımızın düşməndən azad olunmasından sonra bu ekran işi daha da ciddi önəm qazanıb.
Ceyhun MİRZƏLİ
sənətşünas