Xəbər verdiyimiz kimi, Milli Məc­lisə növbədənkənar seçkilər paytaxtın bütün rayonlarında yüksək demokra­tik şəraitdə və seçici fəallığı ilə tarixə qovuşdu. Əməkdaşlarımızın Dairə və məntəqələrdən hazırladıqları və dünənki sayımızda geniş yer almış re­portajların davamını təqdim edirik.

Nizami 

1 sentyabr təkcə Azərbaycan Respubli­kası parlament seçkiləri günü yox, həm də vətəndaşlarımızın öz vəzifələrinin icrasına münasibətlərinin növbəti sınaq günü idi. Xalqımız müstəqillik illərində bu sınaqdan alnıaçıq çıxdığını dəfələrlə sübut edib. Bu dəfə də belə olacağına əminlik vardı. 

Bu əminliklə 25 sayılı Nizami ikinci seçki dairəsinin 14 və 15 saylı məntəqələ­rinə üz tutduq. Seçki məntəqələrində səsverməyə səhər 08:00-dan start veril­mişdi, seçici fəallığı aydın şəkildə müşa­hidə olunurdu.Vətəndaşlar böyük həvəslə istədikləri namizədə səs verirdilər. Seçki prosesini çoxsaylı yerli müşahidəçilər və məşvərətçilər izləyirdilər. 

Ümumiyyətlə, seçkilərin tam şəffaf və demokratik şəraitdə keçirilməsi üçün hazırlıq işlərinin yüksək səviyyədə başa çatdırılması haqqında məlumatlar ictima­iyyətə hələ seçki günündən əvvəl açıqla­nırdı. Məntəqəyə daxil olan zaman bunun bir daha şahidi olduq. Seçicilərin baş bar­maqları xüsusi elektron qurğu ilə yoxla­nılır, bu məntəqədə qeydiyyatda olduğu dəqiqləşdiriləndən sonra barmağı şəffaf mürəkkəblə boyanaraq bülleten almaq üçün müvafiq komissiya üzvünün stoluna yönəldilirdi. Məntəqə bütün lazımi texniki vasitələrlə təmin olunmuş, vətəndaşların seçim hüquqlarının reallaşdırılması üçün hər cür şərait yaradılmışdı.

Məntəqə sədri Şəbnəm Quliyeva vətəndaşların azad şəkildə səs verdiyi­ni vurğuladı və seçicilərin ölkənin siyasi həyatında əlamətdar hadisə olan parla­ment seçkilərində fəal iştirak etdiklərini qeyd etdi: “Seçkilərin demokratik və şəf­faf şəkildə keçirilməsi, seçicilərin seçki məntəqələrinə rahat, maneəsiz gəlib səs vermələri üçün hər cür şərait yaradılıb”. 

Səsvermədən sonra məntəqəni tərk edən vətəndaşa yaxınlaşırıq. Ülviyyə Rza­yeva hər dəfə olduğu kimi, indiki seçkilər­də də öz seçimini etmək üçün hər hansı bir müdaxilə ilə rastlaşmadığını bildirdi. 

Seçki məntəqələrində gördüklərimiz bizdə də xoş təəssürat yaratdı. Azərbayca­nın ictimai-siyasi həyatında mühüm hadisə olan parlament seçkilərinin azad və şəffaf şəraitdə keçirilməsi ölkəmizdə yüksək de­mokratik mühitin formalaşmasından xəbər verir. Bunu seçki məntəqələrində nəzərə­çarpan seçici fəallığı bir daha göstərdi.

Xətai

Növbədənkənar parlament seçkiləri paytaxtımızın əhalisinin sayına görə ən böyük rayonlarından olan Xətai rayonunda da mütəşəkilliklə keçdi. Səhər saatlarından etibarən apardığımız müşahidələr seçicilə­rin seçki məntəqələrinə axınını aydın şəkil­də göstərirdi.

Xətai rayonu ərazisində 4 seçki dairə­si fəaliyyət göstərir. Bunlar 33 saylı Xətai birinci, 34 saylı Xətai ikinci, 35 saylı Xətai üçüncü və 36 saylı Xətai–Suraxanı dairələ­ridir. Seçki günü 35 saylı Xətai üçüncü seç­ki dairəsinin 17, 19 və 31 saylı məntəqələ­rində olduq. Həmin məntəqələr şəhid Milli Qəhrəman Tahir Bağırovun adını daşıyan 59 saylı tam orta məktəbdə yerləşir.

Binanın girişində səs verməyə gələn bütün seçicilərin barmaqları ultrabənövşə­yi şüalarla təchiz olunmuş xüsusi detektor­larla yoxlanılırdı. Seçkidə şəffaflığın təmin edilməsinin mühüm elementi olan həmin cihazla yoxlama səs verməyə gəlmiş seçi­cinin bundan öncə səs verib-vermədiyini aşkarlamaq üçün idi. Səsvermə bülleteni alaraq kabinəyə yaxınlaşan seçicinin bar­mağına isə gözlə görünməyən mürəkkəb vurulurdu. Səhər saatları olsa da, seçki məntəqələri daxilində izdiham yaşanırdı. İnsanlar səs vermək üçün növbəyə düzül­müşdülər. Seçicilər arasında ilk dəfə səs verənlər də var idi. 

17 saylı məntəqə seçki komissiya­sının sədri Xalidə Nəbiyeva bildirdi ki, məntəqədə qeydiyyatda olan seçicilərin sayı 1396 nəfərdir. Onlardan 547 nəfəri günorta saatlarınadək səsvermə hüququn­dan istifadə etmişdi. Məntəqədə seçkinin gedişini ATƏT-in Demokratik Təsisatlar və İnsan Hüquqları Bürosunun müşahidə­çiləri də izləyiblər. Yerli müşahidəçilərin sayı isə 4 nəfər idi. Onu da öyrəndik ki, 17 saylı məntəqə Mərkəzi Seçki Komissiya­sının veb-kamera quraşdırdığı 1000 seçki məntəqəsindən biridir.

19 saylı məntəqə seçki komissiyasının sədri Sevinc Əliyeva dedi: “Məntəqədə 1390 seçici qeydiyyatdadır. Günortayadək burada 475 seçici səsvermə hüququndan istifadə edib. Proses normal keçir. Heç bir narazılıq, qanun pozuntusu qeydə alınma­yıb”. 

31 saylı məntəqə seçki komissiyasının sədri Fəridə Nəsibova isə açıqlamasında bildirdi: “Məntəqədə 1340 seçici qeydiy­yatdadır. Seçkilər çox fəal keçir. Seçicilə­rin iştirakından razıyıq. Aktivlik yüksək­dir. Daşınan seçki qutusu yoxdur”.

Məntəqələrdə müxtəlif namizədləri təmsil edən şəxslər müşahidə aparırdılar. Onlardan Vasif Qasımov qənaətini belə ifadə etdi: “Müşahidəçilərə heç bir prob­lem yaradılmır. Səsvermədə yüksək aktiv­lik müşahidə olunur”.

35 saylı Xətai üçüncü seçki dairəsində 50 min 395 seçici daimi qeydiyyatdadır. Onlardan bir nəfərin yaşı yüzdən yuxarı­dır. Dairə üzrə 41 seçki məntəqəsi möv­cuddur. Seçki məntəqələrinin 11-ində, o cümlədən qeyd etdiyimiz kimi, bizim də müşahidə apardığımız 17 saylı məntəqədə veb-kamera quraşdırılmışdı. Müşahidələri­miz deməyə əsas verir ki, dairə üzrə seçki prosesi, o cümlədən səsvermə qanunverici­liyin tələblərinə əməl etməklə təşkil olun­muşdu.

Pirallahı 

Pirallahı rayonunun seçiciləri də Milli Məclisə növbədənkənar parlament seç­kilərində mütəşəkkilliklə iştirak edirdilər. Bunu rayondakı seçki məntəqələrində apardığımız müşahidələr bir daha təsdiqlə­di.

Səhər saatlarından etibarən seçicilər yaşadıqları ərazidəki seçki məntəqələrində sərbəst şəkildə istədikləri namizədə səs ve­rirdilər. 14 saylı Xəzər–Pirallahı seçki da­irəsinin məntəqələrində müşahidəçilər səs­vermənin gedişinə ciddi nəzarət edirdilər.

4 saylı seçki məntəqəsinin sədri Züm­rüd Abbasova qeyd etdi ki, ərazidə seçicilə­rin ümumi sayı 1178 nəfərdir. Səhər saat 10-a qədər onlardan 158 nəfəri səsvermədə iştirak edib. Məntəqədə müxtəlif partiya və təşkilatları təmsil edən yerli müşahidə­çilər səsvermənin gedişini göz qırpmadan izləyirdilər. Yeni Azərbaycan Partiyasının müşahidəçisi Ülviyyə Abbasova seçkinin ahəngdar və şəffaf şəkildə davam etdiyini, hər hansı nöqsanın müşahidə edilmədiyi­ni bildirdi. Onun dediyinə görə, insanlar öz iradələrinə uyğun səs veriblər, heç kəs prosesə müdaxilə etməyib. Heç bir qanun pozuntusu da olmayıb.

Dairə seçki komissiyasının sədri İmran Qəmbərov isə bildirdi ki, ərazidəki bütün 42 seçki məntəqəsi ilə davamlı əlaqə sax­lanılıb. Hər yerdə səsvermə normal şəkildə davam edib. Saat 12-də 10 min 723 seçi­ci səs verib ki, bu da 21,2 faiz deməkdir. Axşam saatlarına qədər bu faizlər xeyli yüksəlib. 

Hazırladılar:
Səbuhi MƏMMƏDOV,
Paşa ƏMİRCANOV,
Səxavət HƏMİD
XQ