Xankəndidə seçkiyə hazırlıq prosesi bir həftədir ki yekunlaşıb.
Bunu “Report”un Qarabağa ezam olunan əməkdaşına 122 saylı Xankəndi Seçki Dairəsinin 14 saylı məntəqəsinin sədri İmran Mirzəyev deyib.
O bildirib ki, seçkilərə hazırlıq prosesi çox yüksək səviyyədə keçir: “Bütün təchizatlar hazır vəziyyətdədir. Seçki məntəqəmizin üzvləri treninqlərdə iştirak ediblər və tam hazırdırlar. İnşallah, seçkiləri çox yüksək səviyyədə keçirəcəyik”.
Məntəqə sədri qeyd edib ki, artıq bütün seçicilərə bildirişlər paylanılıb. “Sevindirici haldır ki, ilk dəfə azad Xankəndidə səs verəcək gənclərimiz var. Onlar ilk dəfə bu seçkidə məntəqəyə gələcəklər. Qürurluyuq, fəxr edirik ki, öz torpağımızda səs verəcəyik”, – deyə İ.Mirzəyev bildirib.
