Dünən axşam saat 22:26-da Azərbaycan ərazisində 2024-cü ilin ilk Super Ayı müşahidə olundu. Astronomlar Ayın Yer ətrafında bu görünüşünü Mavi Super Ay adlandırırlar.
Şamaxı Astrofizika Rəsədxanasının mediaya dünənki açıqlamasında bildirilib ki, bu səma hadisəsi zamanı Ay 14 faiz böyük və 30 faiz parlaq görünür. Buna görə də avqustun 19-da Ay saat 19:41-də doğub və səhər saatlarınadək səmada aydın göründü. Bu zaman Yerlə Ay arasındakı məsafə 361,969 kilometrə bərabər oldu.
Xatırladaq ki, Ayın orbiti tam dairəvi deyil, elliptik olduğundan, Yerlə onun bu peyki arasındakı məsafə daim dəyişir. Ay öz perigeyində bədirlənmiş Ay fazasına uyğun gələrsə, o zaman buna Super Ay deyilir. Xalqımız Super Ayı keçmişdə bədirlənmiş, yəni təmiz və işıqlı Ay deyə vəsf edib. İlin sonunadək Super Ay fəzada sentyabrın 18-də, oktyabrın 17-də və noyabrın 15-də də görünəcək.
XQ
