Britaniya Azərbaycan Cəmiyyətinin sədri Fəridə Pənahova “Seçki 2024” Müstəqil Media Mərkəzinin suallarını cavablandırıb. Onunla müsahibəni təqdim edirik.

– Fəridə xanım, sentyabrın 1-də Azərbaycan Milli Məclisinə seçkilər ke­çiriləcək. Uzaq İngiltərədə yaşasanız da, Azərbaycanla bağlılığı olan soydaşımız kimi seçkilər barədə fikirlərinizi bilmək maraqlıdır. 

– 2024-cü il bizim ölkəmizin tarixində ən önəmli illərdən birinə çevrilməkdədir. Çünki xalqımız ölkəmizin müstəqillik ta­rixinin yeni bir şanlı səhifəsinə imza atır. Ölkəmizin ərazi bütövlüyü və suverenliyi tam təmin edildikdən sonra əvvəl Prezident seçkilərinin, indi isə Milli Məclisə seçkilə­rin keçirilməsi böyük tarixi hadisədir.

İşğaldan azad edilmiş torpaqlarda dövlətimiz yenidənqurma işləri aparır. Öz ata-baba torpaqlarına yenidən qayıdan məcburi köçkünlərin və ümumilikdə bütün azərbaycanlıların həyatında yeni bir zəfər dövrü başlayıb. Bu il həm də vaxtilə məc­buri köçkün olan soydaşlarımız öz bölgələ­rində səs verə biləcəklər. Şuşa, Xankəndi, Kəlbəcər, Laçın, Ağdam, Xocalı və digər rayonlardan olan seçicilər müvəqqəti məs­kunlaşdığı hansısa bölgədə deyil, bilavasitə öz şəhərində səsvermədə iştirak edəcəklər. Beləliklə, 7-ci çağırış Milli Məclisə seç­kilər dövlətçilik tariximizdə ən əlamətdar hadisələrdən birinə çevriləcək. Bu, siyasi sistemimiz adına qürurverici bir hadisədir.

– Səsvermə ərəfəsində seçicilərə han­sı çağırışla müraciət etmək istərdiniz?

– Mən fürsətdən istifadə edərək həm öz, həm də icma nüməyəndələrimiz adın­dan qürur mənbəyimiz olan Azərbaycanın hər gününün sülh və əmin-amanlıq içəri­sində keçməsi, torpaqlarımızın çiçəklən­məsi və hər bir azərbaycanlının xoşbəxt, firavan yaşaması arzusu ilə öz xalqıma mü­raciət edirəm. Hər kəsi qarşıdan gələn Mil­li Məclisə seçkilərdə fəal iştirak etməyə, ölkəmizin müstəqilliyinin, suverenliyinin, xalqımızın xoşbəxt gələcəyinin təmin edil­məsi uğrunda gecə-gündüz çalışan, onların problemlərini həll edən namizədlərə səs verməyə çağırıram.

A.ƏLİYEV
XQ