Avtonom nəqliyyat vasitələri ilə bağlı araşdırmalar davam edərkən, tədqiqatçılar iki trend mövzunu bir araya gətiriblər. Belə ki, Tokio Universitetində avtomobili avtonom şəkildə idarə edə bilən insanabənzər robot hazırlanıb.
Toyota üçün məsləhətçi kimi çalışan tədqiqatçılardan biri, Musashi adlandırılan "əzələ-skelet humanoidi"nə kiçik elektrikli avtomobili idarə etməyi öyrədərək inkişaf etdirib və təlim keçirib. Bu ad əslində Yaponiya tarixinin ən istedadlı qılınc ustalarından biri olan Miyamoto Musashi-dən gəlir. İnsanabənzər robot Musashi, maşını işə sala, əl əyləcini çəkə və əlləri ilə siqnal verə bilir. O, həmçinin qaz və ya əyləc pedallarını da basa bilir.
Tədqiqatçılar iddia edirlər ki, Musashi-nin xam sensor məlumatlarını daha da inkişaf etdirərək avtomobili idarə etməyi öyrətdikdən sonra robotun işıqforun siqnallarına tabe olaraq kəsişmədə döngəni döndərməsinə nail olublar. Lakin robotun hazır hala gəlməsi üçün hələ çox uzun bir yol var. Çünki robotun bu manevri tamamlaması təxminən 2 dəqiqə davam edib. Tədqiqatçılar əldə edilən məlumatlardan istifadə edərək gələcəkdə humanoidlərin avtomobilləri avtonom şəkildə idarə edə bilməsi üçün növbəti aparat və proqram təminatını hazırlamaq istəyirlər.
Avtonom nəqliyyat vasitələri və insanabənzər robotlar arasında belə bir tarazlığın və yanaşmanın yaradılması açıq şəkildə vacibdir. İnsanabənzər robotlar və tam avtonom nəqliyyat vasitələri ayrı-ayrılıqda inkişaf etsə də, əslində bir-biri ilə sıx əlaqəli ola bilər. Çünki dünyada avtonom idarəetmə sisteminə sahib avtomobillər çox deyil və bu gələcəkdə də belə olacaq. İnsanabənzər robotlar sayəsində mahiyyət etibarilə bütün bu nəqliyyat vasitələri avtonom hala gətirilə və yeni nəsil trafik sistemlərinə sürətli keçid edilə bilər.
