İsi Məlikzadə küçəsinin başqa problemləri də var

Bu küçə uzun müddət ulu şairimiz Nizami Gəncəvinin adını daşıyıb. Sonra görüblər ki, bu işıqlandırılmayan (bir kilometrdən də uzun olan küçədə bircə dənə də olsun küçə işığı yoxdur), yayda suyu, qışda qazı tez-tez kəsilən, elektrik enerjisindəki fasilələrin sayı-hesabı bilinməyən, hər il beş-altı yerdə – asfaltın altında su xətləri partlayan küçə dahi Nizaminin adına layiq deyil. Ona görə də beş-altı il əvvəl böyük şairin adını görkəmli yazıçımızın adı ilə dəyişiblər. İndi küçə İsi Məlikzadənin adını daşıyır.

Beş-altı il qabaq burada rahat yol var idi. İndi küçənin 14–15 yerində asfalt parça–parça edilib. Daha doğrusu, yeraltı su kəmərlərində dövri olaraq yaranan problemləri aradan qaldırmaq üçün (sakinlərin həftələrlə davam edən müracətlərindən sonra) traktorla asfaltı qazır, metal boruya taxta “çüy” – paz vuraraq çıxıb gedirlər. İndi küçəmizdə yüngül maşınların hərəkəti ağır problem olub. 

Güman edirik ki, bütün bunlara dözmək olar. Hər necə olsa da, faciəyə, insan ölümünə səbəb ola biləcək problemlər deyil. Ancaq küçənin yarıdan çoxunu, üstəlik, çoxsaylı qeyri-yaşayış obyektlərini elektrik enerjisi ilə təmin edən yüksəkgərginlikli xətlərin hələ ötən əsrin əlli-altmışıncı illərində əkilmiş qocaman şam ağaclarının budaqları arasından keçməsi potensial təhlükə mənbəyidir. Sakinlər nə zamansa həmin ağacları budayaraq elektrik xətlərini “azad etmək” istəyiblər. Ekologiya və Təbii Sərvətlər Nazirliyi icazə verməyib. Ancaq beş-on il əvvəl həmin ağacların biri güclü qar yağması nəticəsində aşıb küçənin ortasına düşəndə heç bir nazirlikdən “icazə istəməmişdi”. Yeri gəlmişkən, mütəxəssislər ölkəmizdə güclü qar yağacağı barədə xəbərdarlıq edirlər. Odur ki, bir müddət əvvəl Binəqədidə baş vermiş elektrik faciəsi nəticəsində dörd nəfər gənc soydaşımızın həyatını itirməsi İsi Məlikzadə küçəsinin sakinlərinin həyəcanını birə–beş qat artırıb.

Kənd Təsərrüfatı Nazirliyinin nəzdində olan DAİM (Dövlət Aqrar İnkişaf Mərkəzi) adlı müəssisə də bizim küçədədir. Həmin idarənin əməkdaşları da bizimlə eyni problemləri yaşayırlar. Üstəlik, övladını 11 nömrəli məktəbə avtomobillə gətirən valideynlər yolu elə bağlayırlar ki, körpəsini “kolyaska” ilə gəzdirmək istəyən ana yolu keçə bilmir. Əli zənbilli dükan-bazardan qayıdanlar da həmçinin. Hətta bəzi valideynlər avtomobili “saxlama, durma qadağandır” işarəsinin altında belə saatlarla saxlayırlar. 

Bir də görürsən “ərköyün ağsaqqal”- lardan biri maşını məktəbin darvazasına dirəşdirib saxlayır. Nəinki böyüklər, hətta birincilər də həmin aradan güc-bəla ilə keçirlər. Bundan başqa, Xırdalanın əsas nəqliyyat xətlərindən olan Məmməd Əmin Rəsulzadə küçəsindəki hərəkət də teztez övladını məktəbə gətirən özündənrazı valideynlərin avtomobili həmin küçədə saxladığına görə iflic olur. Əlavə edək ki, indi sürücülərin çoxu xanımlardır və onlar parkovka məsələsini lazımınca yerinə yetirə bilmədiklərinə görə daha çox problem yaradırlar. 

Nə isə, İsi Məlikzadə küçəsinin problemləri nəinki həll edilmir, hətta gündən-günə çoxalır.

İ.QAÇAYOĞLU, 

Əməkdar jurnalist