Balakən şəhəri Nizami Gəncəvi adına 1 saylı tam orta məktəbdə ötən gün mühüm maarifləndirici görüş keçirilib. Görüşün təşəbbüskarı Balakən Polis Şöbəsi olmaqla, məclisdə rayon prokurorluğu, təhsil sektoru rəhbərliyi və məktəb kollektivi də iştirak edib. Tədbirdə “Narkomaniya ümumi bəladır”, “Sosial şəbəkələrin zərərli təsirləri”, “Yetkinlik yaşına çatmayanların məişət zorakılığına məruz qalmaları” və “Polis uşaqların gözü ilə” mövzuları geniş müzakirə olundu. 

Məktəbin direktoru Şəfiqə Tütünçüyeva tədbiri açaraq qonaqları salamlayıb və görüşün məqsədi barədə məlumat verib. Daha sonra Balakən Rayon Polis Şöbəsinin rəisi, polis polkovniki Çingiz Aslanov, rayon prokuroru, Baş Ədliyyə müşaviri Camal Bağırov və Balakən Təhsil Sektorunun müdiri Mehparə Mirzəyeva çıxış edərək mövzular üzrə həm hüquqi, həm psixoloji, həm də sosial aspektləri şagirdlərin diqqətinə çatdırıblar, onların suallarını cavablandırıblar. 

Tədbir səmimi mühitdə, canlı dialoqlarla davam edib. Şagirdlərin suallarının çoxluğu mövzuların aktuallığını göstərib; səsləndirilməyən, lakin gündəmi əhatə edən əlavə suallar isə gələcək görüşlərə marağı daha da artırıb. Xüsusilə narkomaniya ilə bağlı məlumatlar və faktlar şagirdlərin diqqətində xüsusi yer tutub, çünki mütəxəssislər qeyd ediblər ki, narkotik vasitələrin istifadəsi təkcə şəxsi problem deyil, ailəni, məktəbi, bütövlükdə cəmiyyətin sosial təhlükəsizliyini təhdid edən ümumi bəladır. 

Məruzəçilər narkomaniyaya aparan səbəblər haqqında ətraflı danışıblar. Qeyd olunub ki, narkotik maddələrin ilk dəfə “cəhd etmək”, “dostların təkidi” və ya “zərərsiz olduğunu düşünmək” kimi səbəblərlə qəbul edilməsi gələcəkdə ağır psixoloji və fiziki asılılığa, təhsildən uzaqlaşmaya, aqressiv davranışlara və cinayət məsuliyyəti ilə nəticələnən addımlara gətirib çıxarır. 

Sonda tədbir iştirakçıları bir daha vurğulayıblar ki, narkomaniya ilə mübarizə yalnız qadağalardan ibarət deyil, maarifləndirmə, düzgün informasiya, açıq dialoq və şagirdlərlə davamlı ünsiyyət bu sahədə ən təsirli vasitələrdir. Balakəndə keçirilən bu görüş həm məktəb ictimaiyyətinə, həm də gənclərə mühüm mesajlar verərək onlarda məsuliyyət hissini və təhlükələrə qarşı ayıqlığı artırmaq baxımından böyük əhəmiyyət daşıyıb. 

İlqar HƏSƏNOV, 

XQ-nin bölgə müxbiri