Milli Məclisin Sədri Sahibə Qafarova Monteneqro Respublikasına rəsmi səfəri çərçivəsində bu ölkənin Prezidenti Yakov Milatoviç ilə görüşüb. Azərbaycan Prezidenti İlham Əliyevin salamlarını Monteneqronun dövlət başçısına çatdıran Spiker ölkəmizdə keçiriləcək COP29-da iştirak etmək üçün dəvət məktubunu ona təqdim edib.
Prezident Yakov Milatoviç Azərbaycanın Monteneqro üçün dost ölkə olduğunu vurğulayaraq, ölkələrimiz arasında münasibətlərin inkişaf etdiyini söyləyib. O, Azərbaycanın Monteneqronun əsas investorlarından biri olduğunu, xüsusilə turizm sahəsində əməkdaşlığın yüksək səviyyəsindən razılığını bildirib.
Azərbaycanın COP29-a evsahibliyi etməsi münasibətilə təbriklərini çatdıran Y.Milatoviç Dubayda keçirilən COP28 çərçivəsində Prezidenti İlham Əliyevlə görüşünü məmnunluqla xatırlayıb. O, bu il Azərbaycanda keçirilmiş növbədənkənar prezident seçkilərində dövlət başçısı İlham Əliyevin qələbəsi münasibətilə təbriklərini çatdırıb və Monteneqro parlamentinin üzvlərinin də bu seçkiləri müşahidə etdiklərini xatırladıb. Monteneqronun Azərbaycan üçün dost və tərəfdaş ölkə olduğunu qeyd edən Prezident bildirib ki, ötən il iki ölkə arasında diplomatik əlaqələrin yaradılmasının 15-ci ildönümü tamam olub. Ötən dövrdə ölkələrimiz arasında bir sıra sahələrdə uğurlu əməkdaşlıq əlaqələri qurulub.
Görüşdə ölkələrimiz arasında müqavilə - hüquq bazasının daha da genişləndirilməsi, yeni sazişlərin imzalanmasının əhəmiyyəti vurğulanıb. Söhbət zamanı humanitar sahədə də əlaqələrin, o cümlədən ölkələrimiz arasında münasibətlərin inkişafında parlamentlərarası əməkdaşlığın əhəmiyyəti qeyd olunub.
S.Qafarova bu ilin yanvar ayında Azərbaycan Milli Məclisinin Avropa Şurası Parlament Assambleyasında nümayəndə heyətinin etimadnaməsinin təsdiqlənməməsinə toxunaraq, Monteneqronun bu səsvermədə iştirak etməməsini qeyd edib. Spiker Avropa Parlamentinin ölkəmizə qarşı qəbul etdiyi qərəzli qətnamələri də tənqid edib. Söhbət zamanı bəzi beynəlxalq təşkilatlarda Azərbaycana qarşı müşahidə olunan qərəzli kampaniyaları və təzyiqləri tənqid edən S.Qafarova deyib ki, Azərbaycan öz yolu ilə gedir. O, sülh sazişinin tezliklə imzalanacağına ümidvar olduğunu bildirərək, iki ölkə arasında delimitasiya prosesi barədə də məlumat verib. Bildirilib ki, aparılan danışıqlar nəticəsində Ermənistan işğal etdiyi 4 kəndin Azərbaycana qaytarılmasına razılıq verib. Fransanın regionumuzda gərginliyi artırmaq məqsədi daşıyan addımları barədə də məlumat verən spiker deyib ki, bu ölkə sülhə xidmət etməyən, yeni münaqişənin alovlanmasına hesablanmış yanaşma ortaya qoyur.
Milli Məclisin Sədri regionda nəqliyyat xətlərinin açılması perspektivləri ilə bağlı fikirlərini açıqlayıb və hazırda Qarabağ və Şərqi Zəngəzurda genişmiqyaslı bərpa və yenidənqurma işlərinin həyata keçirildiyini diqqətə çatdırıb.
Prezident Yakov Milatoviç Azərbaycan və Ermənistan arasında sülh sazişinin imzalanacağına ümid etdiyini bildirib və bunun regionun inkişafına töhfə verəcəyinə inamını ifadə edib.
Görüşün sonunda Milli Məclisin Sədri “Qarabağ işğaldan əvvəl və sonra” kitabını Monteneqro Prezidentinə təqdim edib.
***
Milli Məclisin Sədri Sahibə Qafarovanın başçılıq etdiyi parlament nümayəndə heyətinin Monteneqro Respublikasına rəsmi səfəri davam edir.
Azərbaycan nümayəndə heyəti səfər çərçivəsində paytaxt Podqoriça şəhərində “Partizan döyüşçüsü” abidəsini ziyarət edib. Milli Məclisin Sədri adından abidənin önünə əklil qoyulub.
Ə.BƏDƏLOV
XQ
.jpg)
