Gürcüstanda fəaliyyət göstərən “Alyans” Gənclər Mərkəzi həyata keçirdiyi “Maddi-mənəvi irsimizin təbliği” layihəsi çərçivəsində Gürcüstanın nüfuzlu “Sakartvelos Respublika” (“Gürcüstan Respublikası”) qəzetində Naxçıvan Muxtar Respublikasının 100 illiyinə həsr olunmuş “Dost, qonşu və strateji tərəfdaş” sərlövhəli geniş məqalə dərc etdirib.

Məqalədə Azərbaycan Prezidenti İlham Əliyevin “Naxçıvan Muxtar Respub­likasının 100 illik yubileyinin qeyd edilməsi haqqında” Sərəncamı əsasında bu xü­susda keçirilən tədbirlərin həm Azərbaycanın ərazi bü­tövlüyünün tam təmin olun­duğu, həm də respublikamı­zın yeni inkişaf mərhələsinə qədəm qoyduğu bir dövrə təsadüf etdiyi bildirilib. Yazı­da Prezident İlham Əliyevin Naxçıvanla bağlı fikirlərin­dən sitat gətirilir: “Naxçıvan diyarı Azərbaycanın çoxəsr­lik zəngin keçmişində layiq­li yer tutmuş, ictimai-siyasi və elmi-mədəni həyatında özünəməxsus rol oynamışdır. Naxçıvan şəhəri Azərbaycan Atabəyləri – Eldəgizlər döv­lətinin paytaxtı olmuş, İslam sivilizasiyasının mühüm elm, mədəniyyət və sənətkarlıq mərkəzlərindən biri kimi geniş şöhrət tapmışdır. Bünövrəsi Əcəmi Naxçıvani tərəfindən qoyulmuş memarlıq məktəbi­nin günümüzədək gəlib çatan yadigarları indi də Naxçıvanın görünüşünə xüsusi rəng qatır. Naxçıvan əsrlər boyu yetirdi­yi görkəmli şəxsiyyətləri ilə Azərbaycan dövlətçiliyinin, mədəniyyətinin və elminin tərəqqisinə töhfələr vermiş­dir”.

Eyni zamanda, xatırladı­lıb ki, Naxçıvan Azərbaycan xalqına Hüseyn Cavid, Məm­məd Səid Ordubadi, Cəlil Məmmədquluzadə, Məmməd Araz, Yusif Məmmədəliyev və Azərbaycan dövlətinin memarı, qurucusu, xalqımı­zın ümummilli lideri Heydər Əliyev kimi dahi şəxsiyyətlər bəxş edib. Ulu öndər Heydər Əliyevin Naxçıvan Muxtar Respublikası qarşısındakı tarixi xidmətləri sadalanıb, muxtar respublikanın sosi­al-iqtisadi vəziyyətinin yax­şılaşdırılması üçün məhdud daxili imkanlardan maksimum və səmərəli istifadə etdiyi, o cümlədən, qonşu dövlətlər­lə iqtisadi əlaqələrin inkişafı üçün zəruri tədbirlər həyata keçirdiyi vurğulanıb.

Qəzet onu da oxucuları­nın diqqətinə çatdırıb ki, Pre­zident İlham Əliyev də Naxçı­vana hər zaman böyük diqqət və qayğı göstərib. Habelə ötən 20 ildə Prezident İlham Əliyevin birbaşa diqqəti sayə­sində muxtar respublikanın enerji probleminin tamamilə aradan qaldırıldığı bildirilib. Bundan başqa, məqalədə Birinci vitse-prezident Mehri­ban xanım Əliyevanın müxtə­lif vaxtlarda Prezident İlham Əliyevlə birlikdə Naxçıvana səfərləri, “Əshabi-Kəhf” zi­yarətgahını ziyarət etməsi də yer alıb.

XQ