Azərbaycanın Daxili işlər naziri, general–polkovnik Vilayət Eyvazov və Qazaxıstanın daxili işlər naziri, polis general-leytenantı Erjan Sadenov birgə əməkdaşlıq məsələlərini müzakirə ediblər.
V.Eyvazov iki qardaş ölkənin xalqlarını sıx dostluq, qarşılıqlı inam və hörmət tellərinin bağladığını, Azərbaycan və Qazaxıstan arasındakı əlaqələrin strateji tərəfdaşlıq xarakteri daşıdığını xatırladaraq, Azərbaycan və Qazaxıstan DİN-ləri arasındakı əməkdaşlığın da dərinləşdiyini diqqətə çatdırıb. Nazir ikitərəfli əlaqələrin, xüsusilə də transmilli mütəşəkkil cinayətkarlıqla mübarizə sahəsində birgə səylərin, qabaqcıl təcrübə və operativ informasiya mübadiləsinin, həmçinin yaradılmış normativ-hüquqi bazanın xalqlarımızın və dövlətlərimizin mənafelərinə, bölgədə təhlükəsizliyə xidmət etdiyini vurğulayıb.
Qazaxıstan daxili işlər naziri polis general-leytenantı Erjan Sadenov səmimi qəbula və yüksək qonaqpərvərliyə görə azərbaycanlı həmkarına təşəkkürünü bildirərək ölkəsində ictimai asayişin qorunması ilə bağlı həyata keçirilən tədbirlər barədə məlumat verib. O, rəhbərlik etdiyi qurumun Azərbaycanın Daxili İşlər Nazirliyi ilə əməkdaşlığı daha da genişləndirməkdə maraqlı olduğunu və səfərin bu məqsədə xidmət edəcəyini bildirib.
Səmimilik və işgüzarlıq şəraitində keçən görüşdə tərəfləri maraqlandıran bir sıra digər məsələlər barəsində də ətraflı fikir mübadiləsi aparılıb.
Səfər çərçivəsində qonaqlar DİN-in Daxili Qoşunlarının “N” saylı hərbi hissəsinə, Polis Akademiyasına, Təhlükəsiz Şəhər Xidmətinə və Nəqliyyatı İntellektual İdarəetmə Mərkəzinə gedərək həmin qurumların fəaliyyəti ilə yaxından tanış olublar.
XQ