Müstəqilliyə aparan cığırları 20 Yanvar şəhidləri açdılar. Onlar öz mübarizlik, cəsurluq və fədakarlıqları ilə tarix yazdılar. Həmin gecə dünyanın ən böyük dövlətinin təpədən-dırnağa qədər silahlanmışordusu Bakıda əliyalın sadə vətəndaşlar qarşısında məğlub oldu. Bu məğlubiyyət sonralar həmin ordunun qoruduğu nəhəng imperiyanın da süqutunda həlledici və əhəmiyyətli rol oynadı.
Həmin hadisədən sonra ölkəmizin müstəqilliyi haqqında Konstitusiya aktı qəbul edildi.
Xalqımızın yurd təəssübü çəkən vətənpərvər övladları Birinci Qarabağ döyüşlərində silaha sarılaraq torpaqlarımızın müdafiəsinə qalxdılar.
Aprel döyüşlərində Böyük Qələbənin təməli qoyuldu.
2020-ci ilin payızında 44 günlük Vətən müharibəsində 30 ilə qədər işğal altında olan torpaqlarımız azad edildi, xalqımızın hərb tarixində möhtəşəm Zəfər qazanıldı.
Ötən ilin sentyabrında həyata keçirilən lokal antiterror əməliyyatları nəticəsində Azərbaycan öz ərazi bütövlüyünü bərpa etdi.
1990-cı ilin 20 Yanvarında Bakı küçələrində sinəsini xalqımızın süverenliyi və azadlığı uğrunda tankların, topların və zirehli texnikanın qabağında sipər edənlərin arzuları çiçək açdı!
Onların müqəddəs arzularını gerçəkləşdirən davamçıları bu gün Şəhidlər xiyabanında hesabat verirlər: rahat yatın, rahat uyuyun! Sizin başladığınız yolu canımız-qanımız bahasına olsa da, uğura daşıdıq. Əziz və unudulmaz şəhidlər, sizin bütün arzularınız üstünüzə düzdüyümüz qərənfillər kimi qıpqırmızı çiçək açıb. Şuşada, Xankəndidə üçrəngli Azərbaycan bayrağı dalğalanır. Ölkəmizin müstəqilliyi əbədi və dönməzdir! Xalqımızın qazandığı Zəfər yolumuza nur ələyir...
Yeriniz behişt, torpağınız yumşaq olsun, şəhidlər!
Süleyman QARADAĞLI