Bu gün ölkəmizdə prokurorluq işçilərinin peşə bayramı qeyd olunur. Bu münasibətlə Mingəçevir Şəhər Prokurorluğunda keçirilən toplantıda müstəqilliyimizin qorunmasında və inkişaf etdirilməsində, hüquqi-demokratik dövlət quruculuğunda prokurorluq orqanlarının gördüyü işlərdən, qarşısında duran məsul vəzifələrdən söhbət açıldı.

Prokurorluq işçiləri ilə yanaşı, Mingəçevir şəhər rəhbərliyinin, prokurorluq veteranlarının, hüquq-mü­hafizə orqanları və media nümayəndələrinin iştirak etdikləri məclisdə şəhər prokuroru Qabil Səfərov respublika prokurorluğunun yaranmasından keçən 105 ilə nəzər saldı, əlamətdar gün ilə bağlı həmkarları­na xoş arzularını çatdırdı. Mingəçevir Şəhər İcra Ha­kimiyyəti başçısının müavini Hikmət Kərimov Mingəçevir prokurorluq işçilərini peşə bayramları münasibəti ilə təbrik etdi. Onlara xidməti fəaliyyətlərində yeni uğurlar arzuladı.

Şəhər prokurorunun bö­yük köməkçisi İsmayıl Məm­mədli respublikanın Baş prokuroru Kamran Əliyevin peşə bayramı münasibətilə təbrikini kollektivə çatdırdı. Şəhər prokurorunun müa­vini Balahüseyn Şabanov, prokurorluq veteranı Kamil Yunusov, şəhər polis şöbə­sinin rəisi Ədalət Əliyev də prokurorluq işçilərini peşə bayramları münasibəti ilə təbrik etdilər.

Sonda prokurorluq vete­ranlarına hədiyyələr təqdim olundu.

İlqar HƏSƏNOV,
XQ-nin bölgə müxbiri