Mədəniyyət naziri Adil Kərimli 95 yaşı tamam olan görkəmli fırça ustası, Xalq rəssamı Tofiq Ağababayevlə onun evində görüşüb. Sənətkarı təbrikə nazirlə bərabər, Azərbaycan Rəssamlar İttifaqının sədri, Xalq rəssamı Fərhad Xəlilov, mədəniyyət nazirinin müavinləri və nazirliyin əməkdaşları da gediblər.
Nazir Adil Kərimli milli rəngkarlıq məktəbimizin görkəmli nümayəndəsinə 95 illik yubileyi münasibətilə ən xoş arzularını çatdırıb, onun Azərbaycan mədəniyyətinə, təsviri sənətinə verdiyi töhfələri, həmçinin zəngin mədəniyyətimizin təbliğ edilməsində səmərəli fəaliyyətini vurğulayıb. Azərbaycan mədəniyyətinin inkişafında və təbliğinə verdiyi töhfələrə görə fırça ustasına nazirliyin Fəxri diplomu təqdim olunub.
Qeyd edək ki, Tofiq Ağababayev monumental dekorativ-tətbiqi sənət, qrafika və boyakarlıq sahəsində əsərlər yaradıb. Bakı şəhərinin ilk baş rəssamı vəzifəsində çalışıb. Paytaxtımızın gerbinin bərpası, simvolik açarının düzəldilməsi də sənətkarın adı ilə bağlıdır. Onun əsərləri Azərbaycan Dövlət Muzeyində, Azərbaycan Rəssamlar İttifaqının fondunda, ABŞ, İngiltərə, Kanada muzeylərində, şəxsi qalereyalarda saxlanılır.
XQ