Azərbaycan Prezidenti İlham Əliyevin tapşırığına uyğun olaraq, yenidən qurulan Füzuli şəhərinə keçmiş məcburi köçkünlərin qayıdışı davam edir.
Dünən növbəti köç karvanı Bakı şəhərinin Qaradağ rayonundakı “Qobu Park-3” yaşayış kompleksindən rayona yola salınıb. Bununla Füzuli şəhərinə daha 25 ailə – 102 nəfər köçürülüb.
Həmin gün ailələrə mənzillərin açarları təqdim edilib və onlar yenidən tikilən evlərdə məskunlaşıblar. Açarları Qarabağ İqtisadi Rayonuna daxil olan İşğaldan azad edilmiş ərazilərdə Prezidentin xüsusi nümayəndəliyinin əməkdaşı Eldar Seyidov təqdim edib. İndiyədək Füzuli şəhərində 95 ailənin – 349 nəfərin daimi məskunlaşması təmin edilib.
Sürətlə bərpa edilən Füzuli şəhərinin ilk sakinləri hərtərəfli dövlət qayğısı ilə əhatə olunduqlarına görə Prezident İlham Əliyevə və Birinci vitse-prezident Mehriban Əliyevaya, torpaqlarımızı işğaldan qurtaran rəşadətli Azərbaycan Ordusuna, qəhrəman əsgər və zabitlərimizə minnətdarlıqlarını bildiriblər. Onlar bu yolda canlarından keçən şəhidlərimizin xatirəsini böyük ehtiramla yad ediblər.
XQ