Dünən Türkiyənin “Fintech Innovation Hub” şirkətinin təşkilatçılığı, Azərbaycan Fintex Assosiasiyası və Türkiyə Ödəniş və Elektron Pul Təşkilatları Birliyinin tərəfdaşlığı ilə Bakıda ilk dəfə Azərbaycan–Türkiyə Fintex Forumu keçirilib.
Forumun məqsədi Azərbaycan və Türkiyə fintex ekosistemlərinin iştirakçıları arasında işgüzar əlaqələrin gücləndirilməsi, potensial əməkdaşlıq imkanlarının dəyərləndirilməsi, həmçinin iki qardaş ölkə arasında digər sahələrdə olduğu kimi, innovativ maliyyə texnologiyaları sahəsində də səmərəli sinerjinin yaradılmasıdır.
Azərbaycan Fintex Assosiasiyasının İdarə Heyətinin sədri Ruslan Talıbov bildirib ki, cari ilin ilk yarısında dünyada fintex sahəsinə 52 milyard dollar məbləğində investisiya yatırılıb. Hesabat dövründə 2 min 154 sövdələşmə reallaşıb.
Natiq xatırladıb ki, fintex sistemində əhəmiyyətli məsələlərdən biri də onun gətirdiyi risklərdir. Bu risklər nəzərə alınaraq dünyada və regionumuzda addımlar atılır. Azərbaycan və MDB ölkələri bazarları Türkiyə fintexləri üçün kifayət qədər maraq doğurur. Azərbaycan fintexləri Türkiyə, eləcə də MDB ölkələri bazarları üçün xüsusi əhəmiyyət daşıyır.
Azərbaycan Mərkəzi Bankının departament direktoru Kəmalə Qurbanova bu il avqustun 1-nə ölkədə dövriyyədə olan ödəniş kartlarının sayının keçən ilin analoji dövrü ilə müqayisədə 20 faiz artaraq 15 milyonu ötdüyünü, hesabat dövründə respublika daxilində bu kartlarla aparılan nağdsız ödənişlərin həcminin 2 dəfə artaraq 24 milyard manata çatdığını qeyd edib. K.Qurbanova daha sonra deyib: “Ölkə daxilində kart ödənişlərində nağdsız dövriyyənin xüsusi çəkisi ötən ilin eyni dövrünə nisbətən 12,3 faiz yüksələrək 53 faizə bərabər olub. Daha bir maraqlı göstərici isə bu gün pos-terminallarda aparılan hər 4 əməliyyatdan birinin mobil telefonlar və ya digər ağıllı cihazlar vasitəsilə reallaşmasıdır. Bu isə Azərbaycan əhalisinin innovasiyalara açıq olduğunu göstərir”.
Forumda Azərbaycan Mərkəzi Bankının Beynəlxalq Maliyyə Korporasiyası ilə birlikdə 2024–2028-ci illər üçün fintex strategiyasının hazırlandığı, Türkiyədəki 76 fintex şirkətinin təcrübəsindən yararlanmağın zəririliyi, fintex ekosistemlərinin cari vəziyyəti və inkişaf trendləri kimi məsələr barədə fikirlər səsləndirilib.
XQ
