Milli Olimpiya Komitəsində (MOK) Avropa Yeniyetmələrinin XVI Yay Olimpiya Festivalı iştirakçıları ilə görüş keçirilib. 

Qurumdan “Xalq qəzeti”nə bildiriblər ki, bu nüfuzlu yarışda Azərbaycanı təmsil edəcək idman­çılara uğurlar arzulayan komitənin vitse-prezidenti Çingiz Hüseyn­zadə yarışların əhəmiyyətini vur­ğulayıb. O qeyd edib ki, Avropa yeniyetmələrinin yay olimpiya fes­tivallarında hər zaman Azərbay­can komandası fərqlənib. 

Avropa Yeniyetmələrinin XVII Yay Olimpiya Festivalının missiya rəhbəri Vaqif Əliyev Sloveniyanın Maribor bölgəsində keçiriləcək festival haqda tədbir iştirakçılarına məlumat verib. Vurğulayıb ki, fes­tivalda 48 iştirakçı ölkədən 11 id­man növü üzrə 3600-ə yaxın olan yeniyetmə idmançı iştirak edəcək. Festivalın rəsmi açılışı iyulun 23-nə, bağlanış mərasimi isə 29-na təsadüf edəcək. Azərbaycan id­mançılarının atletika, tennis, üz­güçülük, velosiped, MTB, cüdo, gimnastika idman növlərində təmsil olunacaqlarını bildirən mis­siya rəhbəri Olimpiya kəndinə dair məlumatlarla yanaşı, tibbi xidmət, nəqliyyat və digər texniki məsələlər haqda da danışıb. 

MOK-un Beynəlxalq Proqram­lar idarəsinin əməkdaşı Ceyhun Rəhmanov Avropa Yeniyetmələri­nin XVII Yay Olimpiya Festivalında OCEP məktəblilərinin iştirakından söz açıb. Qeyd olunub ki, OCEP layihəsi çərçivəsində iştirakçılar üçün qurulacaq pavilyonda ölkə­mizi Zaur Məmmədov adına 171 nömrəli tam orta məktəbin şagird­ləri təmsil edəcəklər. 

AMADA-nın Təhsil proqramları üzrə meneceri Qüdrət Səfərov isə yeniyetmə idmançılara antidopinq istiqamətində mövcud qaydalar­dan, həmçinin onların hüquq və vəzifələrindən bəhs edib. 

Sonda xatirə şəkli çəkdirilib.

L.QURBANOVA,“Xalq qəzeti”