Sumqayıt Dövlət Universitetinin (SDU) təmsilçiləri İtaliyanın SAİPEM şirkətinin Azərbaycan filialının qonağı olublar. Görüşdə ali məktəblə şirkət arasında elmi-təcrübi əməkdaşlıq və faydalı əlaqələr qurulması barədə işgüzar müzakirə aparılıb.
Filialın müdiri İlham Eminbəyli rəhbərlik etdiyi müəssisənin fəaliyyəti, inkişaf perspektivləri barədə qonaqlara ətraflı məlumat verib. SDU-nun prorektoru Əsəd Məmmədov isə təmsil etdiyi ali təhsil ocağında kimyaçı kadrlar hazırlığından və aparılan elmi tədqiqatlardan danışıb, ali məktəbin tanıtım videosunu şirkət rəhbərliyinə təqdim edib.
Müzakirələrdə SAİPEM şirkətinin davamlı inkişaf və xarici əlaqələr şöbəsinin müdiri Aytən Həsənova, insan resursları üzrə əməkdaşlar Nəzakət Əfəndiyeva və Vüsal Məlikov və təlim koordinatoru Almaz İbrahimova, SDU-nun mühəndislik fakültəsinin dekanı, dosent Ulduz Ağayev, neft kimyası və kimya mühəndisliyi kafedrasının müdiri professor Əkbər Ağayev, elmi hissənin müdiri dosent Samir Orucov, keyfiyyət təminatı şöbəsinin müdiri Nərmin Həsənova, strateji inkişaf mərkəzinin direktoru dosent Günel Paşayeva səmərəli birgə əməkdaşlığın müxtəlif yönlərinə aydınlıq gətiriblər, təkliflərini söyləyiblər.
Geniş fikir mübadiləsindən sonra SDU-nun kimya fakültəsinin neft kimyası kafedrasının SAİPEM şirkətinin karbonsuz enerji mənbələri sahəsində araşdırmalar aparması, HAKATON silsilə tədbirlərinin isə SDU-nun nəzdində İnnovasiya Yaradıcılıq Mərkəzində keçirilməsi məqsədəuyğun hesab edilib. Bundan əlavə, SAİPEM şirkəti üçün SDU-nun müəllim və tələbələrindən ibarət BREINSTORMING komandasının yaradılması barədə razılığa gəlinib.
Şirkətin və ali məktəbin belə işgüzar görüşləri davam etdirməsi qərara alınıb.
“Xalq qəzeti”
