Dünən Ukrayna hərbçiləri Rusiyanın Su-25 təyyarəsini və Mi-24 helikopterini vurublar. Ukrayna Silahlı Qüvvələri Baş Qərargahının verdiyi məlumata görə, ölkənin Silahlı Qüvvələri ruslara məxsus 7 pilotsuz uçuş aparatını da məhv edib. Məlumatı UNİAN verib.
Ukrayna Silahlı Qüvvələri Ali Baş Komandanının müşaviri, general Viktor Nazarov isə bildirib ki, Rusiya ilə müharibə bir il də davam edə bilər. Onun fikrincə, müharibədə Ukraynanın tam qələbə qazanması üçün daha bir il lazımdır. General əmin olduğunu bildirib ki, müharibə rus qoşunlarının məğlubiyyəti ilə başa çatacaq.
Ukraynanın Baş naziri Denis Şmıqal isə “Əl-Ərəbiyyə”yə müsahibəsində deyib ki, ölkəsi İranı Beynəlxalq Cinayət Məhkəməsinə verəcək. Çünki İranın Rusiyaya verdiyi pilotsuz təyyarələrlə Ukraynanın enerji və mülki infrastrukturuna hücum edilib: “Moskvaya dəstəyi dayandırması üçün Tehrana təzyiq etmək lazımdır. Biz İranın bu cinayətlərdə iştirakının tanınmasına çalışacağıq”.
Məlumata görə, dünən Ukrayna hərbçilərinə Baxmutdan geri çəkilmək barədə əmr verilib.
Paşa ƏMİRCANOV, “Xalq qəzeti”
