Bu gün beynəlxalq reytinq agentlikləri tərəfindən respublika­mızın gələcək inkişaf gözləntisini ifadə edən müsbət göstəricilərin vurğulanması təsadüfi deyil. Çünki hazırda Azərbaycanın malik olduğu resurslar iqtisadi yüksəlişin dinamikliyini şərtləndirir və bu potensial böyük miqyaslı infrastruktur layihələrinin həyata keçiril­məsinə, xüsusilə işğalçıdan təmizlənən ərazilərdə bərpa-quruculuq işlərinin sürətlə davam etdirilməsinə imkan verir.

Prezident İlham Əliyev ölkəmizin nail olduğu inkişaf səviyyəsi haqqında bildirib: “Bu gün Azərbaycan dünya miqyasında nadir ölkələrdəndir ki, heç kimdən iqtisadi və siyasi cəhətdən asılı deyil”. Həqiqətən də, dövlətimizin başçısının rəhbərliyi ilə reallaşdırılan iqtisadi siyasət nəticəsində respublikamızın enerji təhlükəsizliyi təmin edilib, ölkə əhalisinin və iqtisadiyyatın elektrik enerjisi ilə təminatının etibarlılığı, eyni zamanda, dayanıqlılığı gücləndirilib.

Dövlət başçısıın rəhbərliyi ilə ger­çəkləşdirilən məqsədyönlü, uğurlu xarici və daxili siyasət sayəsində Azərbaycanın beynəlxalq nüfuzu daha da artıb, iqtisadi fəallığın təmin edilməsi, əhalinin sosial müdafiəsinin gücləndirilməsi, düşməndən təmizlənən yaşayış sahələrinin yenidən bərpası, müdafiə və ordu quruculuğu, ər­zaq təhlükəsizliyinin diqqətdə saxlanılma­sı istiqamətlərində mühüm layihələr yerinə yetirilib. 

Azərbaycanın sosial-iqtisadi sahələrdə əldə etdiyi uğurlar, eləcə də ölkədə həya­ta keçirilən iqtisadi islahatlar, rəqabətəda­vamlı, innovativ iqtisadi sistemin forma­laşdırılması istiqamətində atılan ardıcıl addımlar dünyanın aparıcı iqtisadi-maliy­yə institutlarının, iqtisadi azadlıq səviyyə­sini tədqiq edən mərkəzlərin, o cümlədən “Fitch Ratings” beynəlxalq kredit reytinqi agentliyinin diqqətindən kənarda qalmır və yüksək qiymətləndirilir. 

Ümumiyyətlə, beynəlxalq reytinq agentliklərinin proqnozları bir daha təs­diqləyir ki, Azərbaycan artıq iqtisadi cəhətdən azad ölkədir. Respublikada əlve­rişli biznes, investisiya mühiti mövcuddur. Eyni zamanda, hökumət vergi gəlirləri və kapital xərcləri, habelə milli valyutanın məzənnəsi ilə bağlı təsirli nizamlayıcı ad­dımlar atmaqla mövcud valyuta ehtiyatla­rının azalmasının qarşısını alır. Bu isə li­beral iqtisadi islahatların, düşünülən, elmi əsaslara malik inkişaf konsepsiyasının həyata keçirilməsi, siyasi iradə nəticəsində mümkün olur və bütün bunlar dövlətimi­zin dünyanın inkişaf etmiş ölkələri səviy­yəsinə çatmaq əzmindən, Azərbaycanın uğurlu gələcəyindən xəbər verir.

Bu gün dünyada baş verən mürəkkəb siyasi-iqtisadi hadisələr fonunda qarşıya qoyulan vəzifələrin öhdəsindən layiqincə gəlinməsi, iqtisadi inkişafın sürətləndiril­məsinə, xalqın rifahının yaxşılaşdırılma­sına yönələn proqramların həyata keçi­rilməsi qarşıdakı dövr ərzində də yüksək göstəricilərin əldə ediləcəyi əminliyi ya­radır.

“Fitch Ratings” beynəlxalq kredit rey­tinqi agentliyi ölkəmizin xarici valyutada uzunmüddətli emitentin defolt reytinqi­ni sabit proqnozla “BB+”dan “BBB-”yə yüksəldib. İqtisadi İslahatların Təhlili və Kommunikasiya Mərkəzinin iqtisadi təhlil şöbəsinin müdiri Günay Quliyeva bildirib ki, bu göstərici Azərbaycanın iqtisadi da­yanıqlığını və güclü xarici iqtisadi taraz­lığını vurğulayır, investisiya və iqtisadi artım üçün perspektivli gələcəyə işarə edir.

G.Quliyevanın sözlərinə görə, reytinq agentliyinin məlumatında Azərbaycanın suveren xarici valyuta aktivlərinin 2024-cü ildə 74 milyard ABŞ dollarına çatacağı bil­dirilir ki, bu da proqnozlaşdırılan ÜDM-in 98 faizini təşkil edir. Xatırladaq ki, bu ehtiyatların əsas hissəsi Azərbaycan Döv­lət Neft Fonduna (ARDNF) məxsusdur. Aktivlərin yüksək səviyyəsi Azərbaycanın xalis suveren aktiv mövqeyinin BBB və A reytinqli suverenlər arasında ən yüksək mövqedə qalmasını gerçəkləşdirir. 

Hesabatda göstərilir ki, cari əməliyyat­lar hesabı profisitinin azalacağı proqnozu­na baxmayaraq, Azərbaycan yüksək neft və qaz gəlirləri ilə dəstəklənən BBB ka­teqoriyasında liderliyini davam etdirəcək. “Fitch Ratings”də ölkəmizin xalis xarici kreditor mövqeyinin 2024-cü ildə ÜDM-in 154 faizinə qədər möhkəmlənəcəyi və “BBB” suverenləri arasında ən güclü ola­cağı gözlənilir. 

İİTKM-in şöbə müdirinin fikrincə, agentlik Azərbaycanın davamlı büdcə profisiti və dövlət maliyyəsində neftdən asılılığın azaldılması öhdəliyini qoru­yan fiskal siyasətini davam etdirəcəyini proqnozlaşdırır. Agentliyin ekspertlərinin təhlilinə əsasən, gücləndirilmiş suveren xarici buferlər və ehtiyatlı fiskal siyasət respublikamızın xarici şoklara və neft qiymətlərinin dəyişkənliyinə qarşı daya­nıqlığını artırır, Azərbaycan Respublika­sı Mərkəzi Bankının daxili likvidliyi və valyuta tələbini idarə etmək qabiliyyətini yüksəldir.

Hesabatda hökumət borcunun 2026-cı ilə qədər aşağı səviyyədə qalaraq ÜDM-in 22,7 faizinə qədər artacağı proqnozlaşdı­rılır. Bununla yanaşı, hökumət tərəfindən aparılan nəzarət tədbirlərinin effektivliyi vurğulanaraq inflyasiyanın 2024-cü ildə hədəf inflasiyadan aşağı səviyyədə – orta hesabla 3,5 faiz olacağı güman edilir. Qa­rabağın bərpasının müsbət təsirləri səbə­bindən iqtisadi artımın tsiklik olaraq 3,2 faizə qədər bərpa olunduğu qeyd olunur. 

G.Quliyeva vurğulayıb ki, Azərbayca­nın Ekoloji Sosial Korporativ Məsuliyyət (ESG) Uyğunluq Reytinqləri siyasi sabit­liyin, qanunun aliliyinin və korrupsiyaya nəzarətin onun kredit profilinə əhəmiyyətli təsirini əks etdirir. Hesabatda Azərbayca­nın idarəetməni təkmilləşdirməsi və iqti­sadiyyatın diversifikasiyası üzrə öhdəliklə­ri yüksək qiymətləndirilir. 

Qeyd edək ki, suveren kredit reytinqin­dəki bu artım Azərbaycanın iqtisadi strate­giyasının bir neçə kritik aspektini vurğu­layır. ARDNF tərəfindən qorunan xarici tarazlıq ölkəmizin güclü maliyyə idarəçi­liyini və ehtiyatlı fiskal siyasətini nümayiş etdirir. Proqnozlaşdırılan cari əməliyyatlar hesabının profisiti, hətta aşağı neft qiymət­ləri olsa belə, sabitliyi və artımı qoruyub saxlaya bilən dayanıqlı iqtisadiyyatdan xə­bər verir. 

Büdcə profisitinin davam etməsi və dövlət borcunun aşağı olması hökumətin makroiqtisadi sabitliyin qorunmasına və neft gəlirlərindən asılılığın azaldılması­na sadiqliyini nümayiş etdirir. Bu strateji yanaşma iqtisadiyyatı xarici şoklardan qo­rumaqla yanaşı, davamlı inkişafın əsasını qoyur.

İİTKM-in şöbə müdiri yekun olaraq qeyd edib ki, “Fitch Ratings” tərəfindən ölkəmizin suveren kredit reytinqinin yük­səldilməsi Azərbaycanın sabit iqtisadi və­ziyyətini və maliyyə sağlamlığını vurğu­layır, eləcə də onu gələcək investisiyalar üçün cəlbedici istiqamətə çevirir. Güclən­miş xarici tarazlıq, davamlı büdcə profisiti və aşağı dövlət borcu müsbət investisiya mühitini formalaşdırmaqla investorları ölkəmizdə imkanları araşdırmağa həvəs­ləndirir.