Dünya Bankının Direktorlar Şurası oktyabrın sonunda Azərbaycanla 2025–2029-cu illər üçün nəzərdə tutulmuş yeni tərəfdaşlıq strategiyasını təsdiq etməyi planlaşdırır. Bu barədə Bankın Bakı ofisindən məlumat verilib. Bildirilib ki, Dünya Bankının Cənubi Qafqaz üzrə direktoru Rolanda Praysın rəhbərlik etdiyi nümayəndə heyətinin iyulun 15-də Bakıya səfəri zamanı çərçivə sənədi ilə bağlı məsləhətləşmələr davam etdirilib.

İqtisadiyyat Nazirliyinin məlumatı­na görə, nazir Mikayıl Cabbarov Dünya Bankının Cənubi Qafqaz üzrə regional direktoru Roland Praysın rəhbərlik etdiyi nümayəndə heyəti ilə görüşüb. Görüş­də Azərbaycanın Dünya Bankı ilə uğur­la əməkdaşlıq etdiyi, ölkəmizdə bankın göstərdiyi texniki yardım və maliyyə dəstəyi layihələrinin yüksək qiymətləndi­rildiyi bildirilib. Tədbirdə, həmçinin Dünya Bankı ilə əməkdaşlıq çərçivəsində bər­paolunan enerji və “yaşıl” iqtisadiyyata keçid, eləcə də Azərbaycanın icrasında maraqlı olduğu digər layihələr diqqətə çatdırılıb.

Görüş barədə “X” sosial şəbəkə­sindəki hesabında məlumat verən iqti­sadiyyat naziri M. Cabbarov bildirib ki, Dünya Bankı Qrupu ilə Azərbaycan üzrə 2025–2029-cu illəri əhatə edən yeni Ölkə Tərəfdaşlıq Çərçivə sənədinin hazırlan­ması istiqamətində müzakirələr aparılıb. “Tərəfdaşlıq sənədinin hazırlanması və ölkəmizin iqtisadi inkişafı istiqamətində həyata keçiriləcək layihələr barədə fikir mübadiləsi apardıq”,– deyə nazir payla­şımında qeyd edib.

Bankın Bakı ofisinin məlumatında qeyd olunduğu kimi, 2015-ci ildə təsdiq edilmiş əvvəlki tərəfdaşlıq strategiyası Azərbaycanın qarşısında duran ciddi çağırışlar nəzərə alınmaqla hazırlanmış­dı. O, yeni artım modelinə keçid zamanı dövlət maliyyə idarəçiliyi və iqtisadiyyatın şaxələndirilməsi sahəsində daha yax­şı göstəricilərə nail olmaq üçün ölkənin dəstəklənməsinə, eləcə də ölkənin xarici şoklara qarşı dayanıqlığının gücləndiril­məsinə fokuslanmışdı. “Amma 2020-ci ildən etibarən dünya COVID-19 pande­miyasının yaratdığı yeni iqtisadi təlatüm­lə üzləşib. Karbohidrogenlərə qlobal tələ­batın azalması neftin qiymətinin kəskin aşağı düşməsinə səbəb olub və bu, neft sektorundan ciddi şəkildə asılı olaraq qa­lan Azərbaycan iqtisadiyyatına mənfi tə­sir göstərib. Bu çətinliklərə baxmayaraq, Azərbaycan dəyişikliklər etməyə əzmini nümayiş etdirir. Ölkə “yaşıl” iqtisadiyyata keçid və bərpaolunan enerji mənbələrinin inkişafı ilə bağlı qarşısına iddialı məqsəd­lər qoyur”, – deyə bankın Bakı ofisinin məlumatında bildirilib.

Qeyd olunub ki, Dünya Bankının Azərbaycanla yeni tərəfdaşlıq strategi­yası bu məqsədləri dəstəkləmək üçün hazırlanıb. Bu istiqamətdə iki əsas layihə müəyyənləşdirilib. Bunlardan birincisi Azərbaycanın məşğulluğa dəstək proq­ramının genişləndirilməsidir. Dünya Ban­kı ölkəmizdə iş yerlərinin yaradılmasını təşviq etmək və işçi qüvvəsinin bacarıq­larını artırmaq məqsədi daşıyan bu proq­rama 150 milyon ABŞ dolları məbləğində əlavə maliyyə ayırmağı planlaşdırır. İkinci layihə isə bərpaolunan enerji mənbələrin­dən istifadənin genişləndirilməsini (AZU­RE) nəzərdə tutur. İlkin hesablamalara görə, bank AZURE layihəsi çərçivəsində külək və günəş enerjisinin inkişafı va­sitəsilə “yaşıl” iqtisadiyyata keçidi hədəf­ləyən Azərbaycana dəstək olmaq üçün 250 milyon ABŞ dolları ayırmağı plan­laşdırır. Yeni strategiyanın əhatə edəcəyi digər perspektivli əməkdaşlıq sahələrinin müzakirələri isə hələlik davam edir. 

Yeri gəlmişkən, Azərbaycan hökuməti ilə karbon qazı emissiyalarının kvotaları­nın monetizasiyası imkanlarını müzakirə etməyi planlaşdıran Dünya Bankı AZU­RE layihəsi çərçivəsində birinci mərhələ­də Neftçala rayonunda (315 meqavatlıq) və Biləsuvarda (445 meqavatlıqlıq) ümu­mi gücü 760 meqavat olan günəş elektrik stansiyalarının elektrik şəbəkəsinə inteq­rasiyası üçün ötürücü infrastrukturu ma­liyyələşdirəcək.

Qeyd edək ki, Azərbaycan 1992-ci ildən Dünya Bankının üzvüdür. Bu günə kimi Azərbaycanda Bankın kredit vəsait­ləri hesabına ümumi məbləği 4,4 milyard ABŞ dolları olan 54 layihə həyata keçiri­lib. Ötən müddətdə bank tərəfindən ölkə­mizdə reallaşdırılan 115-dən artıq texniki yardım və bir çox istiqamətlərdə qrant la­yihələrinə, təxminən, 30 milyon dollardan artıq vəsait ayrılıb. Azərbaycanın uğurlu tərəfdaşlarından olan Dünya Bankının maliyyə dəstəyi ilə nəqliyyat, sosial, su təchizatı və irriqasiya, kənd təsərrüfatı, ətraf mühit, ədliyyə və digər sahələrdə həyata keçirilən layihələr ölkə iqtisadiy­yatının inkişafına mühüm töhfələr verib.