Prezident İlham Əliyevin iqtisadi şaxələndirmə siyasətində əlverişli coğrafi mövqeyi olan ölkəmizin tranzit potensialının reallaşdırılması mühüm önəm daşıyır. Bununla bərabər beynəlxalq və regional nəqliyyat dəhlizlərinin inkişafı da iqtisadiyyatımızın səmərəliliyinin artırılmasına müsbət təsir göstərir. Eyni zamanda, nəqliyyat, infrastruktur və logistika sahələrində birgə layihələr dövlətimizin iqtisadi imkanlarını genişləndirir, əhəmiyyətini artırır.
Bu istiqamətdə həyata keçirilən tədbirlərin nəticəsidir ki, son 10 il ərzində nəqliyyat sektorunda orta illik artım tempi 3,5 faiz təşkil edib, yeni infrastruktur qurulub, özəl investisiyalar artıb. Ölkə regional əhəmiyyətli nəqliyyat-logistika və ticarət qovşağına çevrilib və əsas ticarət marşrutlarından bəhrələnməyin əsası qoyulub.
Nəqliyyat sektorunun bütün sahələrində xidmət infrastrukturları modernləşdirilib, yol təsərrüfatının yenidən qurulması ilə bağlı layihələr həyata keçirilib, çoxsaylı yol ötürücüləri, körpülər, tunellər, yeraltı və yerüstü piyada keçidləri inşa olunub. Şimal-Cənub Beynəlxalq Nəqliyyat Dəhlizinin reallaşdırılması istiqamətində nəhəng infrastruktur layihəsi gerçəkləşdirilib.
Rusiya Prezidenti Vladimir Putin dünya xəbər agentliklərinin rəhbərləri ilə görüşdə Şimal-Cənub Nəqliyyat Dəhlizinin əhəmiyyəti barədə fikir bildirərkən bu nəqliyyat-logistikanın böyük tələbat duyulan beynəlxalq dəhlizə çevrilə biləcəyinə əminliyini ifadə edib. O, eyni zamanda, yüklərin Rusiyadan¬–Sankt-Peterburq limanından Azərbaycana, sonra isə İrana və Fars körfəzinin sahilinə göndəriləcəyini diqqətə çatdırıb. Rusiya lideri daha sonra sözlərinə əlavə edərək bunun Süveyş kanalından, təxminən, 10 gün daha tez olduğunu və layihənin gəlirliliyi ilə diqqət çəkəcəyini bildirib.
Rusiya Prezidenti deyib: “Biz hər iki tərəfdən iş aparırıq. Mən bilirəm ki, Prezident Əliyev bu layihəni dəstəkləyir. Biz bu məsələni onunla dəfələrlə müzakirə etmişik. İran rəhbərliyi də bu layihəni dəstəkləyir. Bu dəhliz çox sərfəli olacağına görə həmin layihəyə xarici investorlar, regional olmayan, lakin yaxın olan ölkələr, o cümlədən suveren ərəb fondları da maraq göstərir. Aydındır, çünki suveren fondlar həmişə etibarlı investisiya sahələri axtarır. Bu layihə etibarlı investisiyalardan biridir, çünki onun gəlirliliyinə təminat və zəmanət var”.
Şimal-Cənub Nəqliyyat Dəhlizi ilə bağlı əlavə araşdırmalara ehtiyac duyulduğunu vurğulayan V.Putin sözügedən nəqliyyat-logistika sisteminin Azərbaycanın hansı əraziləri üzrə qurulacağı, onun necə maliyyələşdiriləcəyi, dəhlizin Azərbaycan ərazisindən Qərbə gedən yollarla necə birləşdiriləcəyi, habelə İran ərazisindən keçən bu yolun şaxələndirilmiş hissələrinin necə inşa ediləcəyi barədə müzakirənin aparılması zəruriliyini də xatırladıb.
Yeri gəlmişkən, ötən ayın əvvəlində Rusiya və Azərbaycan arasında Şimal-Cənub Nəqliyyat Dəhlizi ilə bağlı prioritetlər müzakirə edilib. Hər iki ölkə yüklərin stabil daşınmasını təmin etmək üçün zəruri tədbirlər kompleksinin həyata keçirilməsində maraqlı olduğunu və sözügedən dəhlizin prioritetlərini təsdiqləyib.
Xatırladaq bu məsələ Rusiya Baş nazirinin birinci müavini Andrey Belousovla Azərbaycan Baş nazirinin müavini Şahin Mustafayev arasında danışıqlar zamanı müzakirə olunub. Müzakirədə Şimal-Cənub Beynəlxalq Nəqliyyat Dəhlizi çərçivəsində dəmir yolu infrastrukturunun modernləşdirilməsi üzrə prioritet vəzifələr nəzərdən keçirilib. Eyni zamanda, hər iki ölkənin dəmir yolları ilə yüklərin stabil daşınmasını təmin etmək üçün zəruri tədbirlər kompleksinin həyata keçirilməsində maraqlı olduğu bildirilib. Həmçinin danışıqların yekunu olaraq dəmir yolu daşımalarının və Şimal-Cənub Nəqliyyat Dəhlizi infrastrukturunun inkişafı üçün zəruri olan normativ hüquqi bazanın yaradılması üzrə birgə tədbirlər planı təsdiqlənib.
Xatırladaq ki, 2000-ci il sentyabrın 12-də Rusiya, İran və Hindistan arasında imzalanmış hökumətlərarası saziş əsasında Şimal-Cənub Nəqliyyat Dəhlizinin təməli qoyulub. Azərbaycan bu sazişə 2005-ci ildə qoşulub. Ümumilikdə 13 ölkə tərəfindən sözügedən sənəd ratifikasiya edilib (Azərbaycan, Belarus, Bolqarıstan, Ermənistan, Hindistan, İran İslam Respublikası, Qazaxıstan, Qırğızıstan, Oman Sultanlığı, Rusiya Federasiyası, Tacikistan, Türkiyə, Ukrayna).
Sözügedən nəqliyyat dəhlizinin yaradılması ilə bağlı müvafiq saziş imzalayan ölkələr qarşısında 2030-cu ilə qədər bu infrastrukturla 30 milyon ton tranzit və ikitərəfli yüklərin daşınması mühüm vəzifə kimi qoyulub. Tərəflərin dəhlizin inkişafı kontekstində öz əraziləri vasitəsilə nəqliyyat və tranzit əməliyyatlarının, habelə prosedurlarının asanlaşdırılması məsələləri ilə məşğul olmaq üçün Birgə İşçi Qrup da yaradılıb.
Fikrət YUSİFOV,
iqtisad elmləri doktoru, professor
Bu gün dünya ticarətində ən önəmli məsələlərdən biri və birincisi yüklərin vaxtında təyinat yerinə çatdırılmasıdır. Belə ki, yük təyinat yerinə nə qədər tez çatdırılarsa, investor da bir o qədər çox mənfət əldə etmiş olar. Bu baxımdan, son illər ərzində dünyada ənənəvi yük daşıma marşurutlarına alternativ layihələrin ortaya çıxması heç də təsadüf deyil. Kapital sahibləri onların yatrımları hesabına qurulmuş müəssisələrdə istehsal olunan məhsulların bazara daha tez çıxarılması yollarını axtarırlar.
Bu sırada yer alan maraqlı yükdaşıma marşurutlarından biri də Şimal- Cənub Beynəlxalq Nəqliyyat dəhlizi ola bilər. Bu dəhlizinin təməli 2000-ci ildə Rusiya, İran və Hindistan arasında imzalanmış hökumətlərarası saziş əsasında qoyulub. Bu günə qədər, ümumilikdə, 13 ölkə sözügedən sazişi ratifikasiya edib. Azərbaycan bu sazişə 2005-ci ildə qoşulub.
Şimal-Cənub Nəqliyyat Dəhlizinin yaradılmasında məqsəd Hindistandan Rusiyaya, eləcə də Şimali və Qərbi Avropaya gedən yüklərin çatdırılması üçün hazırda sərf edilən zamanı 40-42 gündən 18-20 günə qədər – yəni iki dəfə qısaltmaqdır. Bu, yüklərin şimaldan cənub istiqamətində və əksinə daşınması sahəsində zaman baxımından inqilabi bir dönüş demək olacaqdır.
Azərbaycan hökuməti layihənin önəmini yüksək qiymətləndirərək beynəlxalq nəqliyyat dəhlizinin ölkəmizin ərazisindən keçən hissəsində öz üzərinə düşən işlərin vaxtında və yüksək səviyyədə icra edilməsi istiqamətində yaxşı nəticələrə imza atıb.
Lakin bu layihənin başa çatdırılması üçün hələ çox işlər görülməlidir. Bu zaman reallaşdırılacaq tədbirlər təbii ki, layihənin təşəbbüskarlarından biri olan Rusiyanın və marşrutun keçəcəyi digər ölkələrin məsələnin həllinə necə yanaşmasından asılı olacaqdır. Bütün hallarda, müasir şəraitdə yüklərin bir istiqamətdən digər istiqamətə daşınmasına sərf olunan vaxtın iki dəfəyə qədər qısaldılmasını təmin edən bir layihənin gec-tez başa çatdırılacağı şübhə doğurmur. Dünyada gedən proselər, böyük güclərin resurslara və kommunikasiyalara nəzarət uğrunda başlatdıqları mübarizə fonunda bu nəqliyyat dəhlizi də tezliklə qurulub başa çatdırılacaqdır.
Şimal-cənub, şərq-qərb nəqliyyat dəhlizlərini öz üzərindən keçirən Azərbaycan bu marurutların tam gücü ilə işə düşməsi ilə Avroasiya məkanında ən böyük nəqliyyat habına çevriləcəkdir.
Məhəmməd ƏLİYEV,
Azərbaycan Dövlət İqtisad Universiteti biznes və logistika kafedrasının müdiri, dosent
Şimal-Cənub Nəqliyyat Dəhlizi bütün region dövlətləri, o cümlədən qonşu İran üçün də mühüm önəm daşıyır. Bu baxımdan təkcə Rəşt-Astara dəmir yolu həm Rusiya, həm Azərbaycan, həm də İran üçün çox əhəmiyyətlidir.
Qəzvin–Rəşt–Astara (İran)–Astara (Azərbaycan) dəmir yolu xəttinin davamı olan Rəşt-Astara xətti İran, Azərbaycan və Rusiyanın dəmir yolu sistemlərini birləşdirəcək. Avropa və Rusiyadan Hindistana və digər Cənub Şərqi Asiya ölkələrinə yüklər məhz bu yolla daşınacaq. Yüklərin əks istiqamətə də bu yolla daşınması neft ixracatçısı olan Rusiya, İran və Azərbaycanın qeyri-neft sektorunun inkişafına təkan verəcək, bu ölkələr logistika mərkəzinə çevriləcək və büdcəyə əlavə valyuta axını təmin olunacaq.
Bir sıra dövlətlər, o cümlədən Rusiya tərəfindən ilk gündən Qəzvin–Rəşt–Astara (İran)–Astara (Azərbaycan) dəmir yolunun tezliklə inşa etdirilib başa çatdırılmasına böyük maraq göstərilib. Rusiya tərəfindən bu yolun elektrik xətlərinin çəkilməsi ilə yanaşı, onun tikintisinin sürətləndirilməsi üçün yardım ediləcəyi bildirilib.
Respublikamızın ərazisindən keçəcək bu marşrut Rusiya, Azərbaycan və İranın dəmir yolları sistemlərini birləşdirəcək. Yol hazır olduqdan sonra hər 3 dövlətin ticarət və tranzit əlaqələri artacaq ki, bu da büdcə gəlirlərinə valyuta axınını reallaşdıracaq.
Planlaşdırılmaya əsasən, mühüm önəm daşıyan bu polad magistral Qəzvin-Rəşt-Ənzəli-Astara marşrutu ilə Azərbaycanın dəmir yolu xəttinə qoşulacaq. Bununla da Şimal-Cənub Nəqliyyat Dəhlizi beynəlxalq əhəmiyyətli dəmir yoluna çevriləcək. Çünki İran dəmir yolu xəttinin sözügedən marşrut ilə Azərbaycana birləşməsi ilə Hindistandan Avropanın Helsinki limanınadək olan 5 min 200 kilometrlik dəmir yolu xətti yaranacaq. Bu, təbii ki, beynəlxalq dəmir yolu xətti sayılacaq. Bu birləşmə ilə yüklərin daşınma müddəti 45 gündən 20 günədək azalacaq, məsafə isə təxminən 3 min kilometr qısalacaq.
Proqnozlara əsasən, layihənin yalnız birinci mərhələsinin başa çatması İranla Azərbaycan arasında yük daşımalarının 10 dəfəyədək artımını təmin edəcək. Bundan başqa, iki ölkənin dəmir yollarının birləşdirilməsilə mal mübadiləsinin həcmi ildə 5 milyon tonadək artacaq.
Dəhlizin yaradılmasında məqsəd Hindistandan Rusiyaya, eləcə də Şimali və Qərbi Avropaya gedən yüklərin çatdırılma müddətini azaltmaqdır (hazırkı marşrut üzrə çatdırılma vaxtı 6 həftədən artıqdır, Şimal-Cənub Nəqliyyat Dəhlizi vasitəsilə 3 həftə olması gözlənilir).
Vaqif BAYRAMOV
XQ