Əvvəlki illə müqayisədə 10,5 faiz artım əldə edilib
İqtisadi İslahatların Təhlili və Kommunikasiya Mərkəzinin hazırladığı “İxrac icmalı”nın 2023-cü ilin dekabr sayına əsasən, keçən ilin ilin yanvar-noyabr ayları ərzində Azərbaycanın ümumi ixracı 31,5 milyard dollar, qeyri-neft sektoru üzrə 2022-ci ilin müvafiq dövrü ilə müqayisədə 10,5 faiz artaraq 3 milyard dollar təşkil edib. Eyni dövr ərzində yeyinti məhsulları üzrə ixrac isə 822 milyon dollara bərabər olub.
Hesabat dövründə elektrik enerjisinin ixracı 3,1 dəfə, qara metal məmulatlarının ixracı 16,4 faiz, meyvə-tərəvəz ixracı isə 8,1faiz artıb. Keçən ilin yanvar-noyabr ayları ərzində aqrar və aqrar-sənaye məhsulları üzrə birgə ixracın statistik dəyəri 6,4 faiz artaraq 854 milyon dollara çatıb. Qeyri-neft-qaz ixracının tərkib hissəsində əhəmiyyətli yer tutan aqrar-sənaye məhsullarının yaratdığı dəyər 2022-ci ilin müvafiq dövrü ilə müqayisədə 9,6 faiz artaraq 182 milyon dollar təşkil edib.
Hesabat ilinin 11 ayı ərzində ixrac edilən qeyri-neft sektoruna aid malların siyahısında elektrik enerjisi (379 milyon dollar) birinci olub. Bu siyahıda qızıl (143 milyon dollar) ikinci, pomidor (tomat) (140 milyon dollar) isə üçüncü yerdə qərarlaşıb.
2023-cü ilin yanvar-noyabr ayları ərzində Rusiya Federasiyasına 1 milyard dollar, Türkiyəyə 729 milyon dollar, Gürcüstana 300 milyon dollar, İsveçrə Konfederasiyasına 155 milyon dollar, Qazaxıstana isə 90 milyon dollar dəyərində qeyri-neft sektoruna aid mal ixrac olunub.
Ötən ilin noyabr ayının qeyri-neft ixracı isə 6,2 faiz artaraq 322 milyon dollar yüksəlib. Yeyinti məhsulları üzrə ixrac 115 milyon dollar, qeyri-yeyinti məhsulları üzrə ixrac isə 17 faiz artımla 207 milyon dollar təşkil edib.
Hesabat dövrünün noyabr ayında qeyri-neft sektoruna aid ən çox mal ixrac edilən ölkələrin siyahısında Rusiya Federasiyası (122 milyon dollar) birinciliyə yüksəlib. Bu siyahıda Türkiyə (53 milyon dollar) ikinci və Gürcüstan (33 milyon dollar) üçüncü olub. Həmin vaxt ixrac edilən qeyri-neft sektoruna aid malların siyahısında xurma (45 milyon dollar) birinci, elektrik enerjisi (31 milyon dollar) ikinci və qızıl (25 milyon dollar) üçüncü olub.
“İxrac icmalı”nda, həmçinin göstərilib ki, 2023-cü ilin yanvar-dekabr ayları ərzində “Bir pəncərə” İxraca Dəstək Mərkəzi vasitəsilə həyata keçirilən qeyri-neft ixracının dəyəri 243 milyon dollar, dekabr ayında isə 21 milyon dollar olub.
Ötən il Azərbaycan kosmik xidmətlərini də dünyaya uğurla ixrac edib. Ümumiyyətlə, son 20 il ərzində ölkəmiz digər sahələrdə olduğu kimi, informasiya-kommunikasiya texnologiyaları (İKT) sektorunda da mühüm nailiyyətlər əldə edib, beynəlxalq kosmik ailənin üzvü olması ilə adını tarixə yazdırıb. Respublikamız “Azerspace-1”, “Azersky” və “Azerspace-2” peyklərinin səmərəli fəaliyyəti ilə dünyaya kosmik xidmətlərin ixracını yüksək səviyyədə həyata keçirib.
Ötən ili “Azersky-1” peykinin səmada naməlum yad cizimlə toqquşması nəticəsində onunla əlaqə itmişdi. Bu peykin ölkəmiz üçün əhəmiyyəti müstəsnadır. Xüsusən də 44 günlük Vətən müharibəsində qazanılan qələbədə “Azersky” vasitəsi ilə aparılan müşahidə və çəkilişlərin rolu böyük olub. Amma qısa zamanda atılan uğurlu addımlar nəticəsində İsrail şirkəti ilə yeni peykin yaradılması istiqamətində razılıq əldə edildi.
Yeri gəlmişkən, 2026-cı və 2028-ci illərdə Azərbaycanda 2 yeni peykin istehsal olunaraq orbitə buraxılacağı nəzərdə tutulub. Keçən il 74-cü Beynəlxalq Astronavtika Konqresinin Bakıda keçirilməsi də tarixi hadisəyə çevrilib. Beləliklə, Azərbaycanın Beynəlxalq Astronavtika Konqresinə evsahibliyi ikinci dəfə uğurla reallaşıb. Xatırladaq ki, birinci dəfə bu mötəbər tədbir ulu öndər Heydər Əliyevin respublikamıza ilk rəhbərliyi dövründə –1973-cü ildə gerçəkləşib.
Dünya miqyasında belə nüfuzlu konqresin yenidən Azərbaycanda reallaşdırılması ölkəmizdə kosmik sənayenin inkişafına, beynəlxalq kosmik icma və onu təmsil edən Beynəlxalq Astronavtika Federasiyası ilə əməkdaşlığın genişləndirilməsinə, habelə qlobal kosmos sənayesinə daha yaxından inteqrasiyaya əvəzolunmaz imkanlar yaradacaq.
Bu gün ölkə həyatının bütün sahələrində müasir rəqəmsal texnologiyalarından geniş istifadə olunur, yeni metodlar tətbiq edilir ki, bu da iqtisadiyyatın inkişafını sürətləndirir. Eyni zamanda, respublikanın bütün nöqtələrində internet əlçatanlığı təmin olunur, sürətli internet çıxışı diqqət mərkəzində saxlanılır.
Hazırda Azərbaycan əhalisinin 85 faizi internetdən istifadə edir. Halbuki 2003-cü ildə bu rəqəm 5 faiz idi. İnternet şəbəkəsində abonentlərin sayı 2005-ci ildə 400 min nəfər olubsa, 2022-ci ildə 8,3 milyon nəfərə çatıb. Ötən ilin mart ayında ölkəmiz “Speedtest” Qlobal İndeksində mobil internetin sürətinə görə dünyanın 140 ölkəsi arasında 54-cü yerdə qərarlaşıb. Həmçinin 2022-ci ilin sonuna ümumdünya şəbəkə üzrə qlobal göstərici təxminən 65 faizə çatıb.
Azərbaycanın bu sahədəki uğurları İqtisadi İslahatların Təhlili və Kommunikasiya Mərkəzinin “İxrac icmalı”nın 2023-cü ilin son sayında da öz ifadəsini tapıb. İcmalda bildirilib ki, hesabat ilinin yanvar-noyabr aylarında Azərbaycan Respublikasının Kosmik Agentliyi (“Azərkosmos”) tərəfindən dünyanın 48 ölkəsinə 18 milyon dollar dəyərində peyk telekommunikasiya xidmətləri ixrac edilib. “Azərkosmos”un xidmət ixracından əldə etdiyi gəlir onun ümumi gəlirlərinin 78 faizini təşkil edib. Təlcə noyabr ayında isə “Azərkosmos” dünyanın 44 ölkəsinə 1,8 milyon dollar dəyərində xidmət ixrac edib.
2023-cü ilin yanvar-noyabr ayları ərzində peyk telekommunikasiya xidmətlərinin ixracının ilk beşliyində isə 5 milyon dollar ilə Birləşmiş Krallıq, 4 milyon dollar ilə Lüksemburq, 1,5 milyon dollar ilə BƏƏ, 959 dollar ilə Almaniya və 676 min dollar ilə Nigeriya qərarlaşıb.
Yeri gəlmişkən, xatırladaq ki, keçən il “Onlayn Azərbaycan” layihəsi çərçivəsində regionlarda genişzolaqlı internetə çıxış imkanları daha da artırılıb, ölkə üzrə genişzolaqlı internetə çıxışı olan ev təsərrüfatlarının xüsusi çəkisi 60 faizə çatdırılıb, cari ilin sonunaisə bu rəqəmin 100 faiz olacağı proqnozlaşdırılıb.
2023-cü ildə “Azərkosmos” “SpaceX” şirkəti arasında əməkdaşlıq müqaviləsi imzalanıb. Müqaviləyə əsasən, ABŞ şirkətinin “Starlink” adlı genişzolaqlı peyk internet xidməti bu ildən Azərbaycan bazarına çıxarılacaq.
Laçında “Azconnexus” platforması üzərindən internet xidməti təmin etmək məqsədilə ilk “KA” diapazonlu antena quraşdırılması da ötən ilin mühüm hadisələrindən olub. Bu antena adıçəkilən rayon və bir sıra ətraf ərazilərdə yüksəksürətli interneti əlçatan edib.
Vaqif BAYRAMOV
XQ