Cari ilin ötən dövründə payız-qış mövsümünə hazırlıq çərçivəsində Azərbaycanın yeraltı anbarlarına 2 milyard kubmetrədək qaz vurulub.
Bu barədə SOCAR-ın “Azəriqaz” İstehsalat Birliyinin rejimlərə nəzarət və mərkəzi dispetçer şöbəsinin rəisi Rasim Əhmədov media nümayəndələri ilə keçirilən görüş zamanı bildirib. Onun dediyinə görə, bu da payız-qış mövsümündə temperaturun kəskin dəyişməsi zamanı tələbata uyğun olaraq istehlakçıları “mavi yanacaq”la fasiləsiz təmin etməyə imkan verəcək.
Xatırladaq ki, Azərbaycanda fəaliyyət göstərən Qaradağ və Qalmaz yeraltı qaz anbarlarının tutumu 3,34 milyard kubmetr təşkil edir. Bunun da 1,89 milyard kubmetri Qaradağ, 1,45 milyard kubmetri isə Qalmaz anbarlarının payına düşür. Payız-qış mövsümündə istehlakçıların fasiləsiz qaz təminatı məqsədilə ötən il yeraltı qaz anbarlarında 3,1 milyard kubmetrdən çox qaz ehtiyatı yaradılıb.
XQ
