Trans Adriatik Boru Kəməri (TAP) ən mürəkkəb dövrdə Avropanın enerji təchizatını şaxələndirən və etibarlı mənbədən təbii qazın fasiləsiz tədarükünü təmin edən strateji layihədir.
Energetika naziri Pərviz Şahbazov İtaliyanın “Formiche” saytına müsahibəsində bu fikrinə əlavə olaraq qeyd edib ki, TAP çox qısa müddətdə tam gücü ilə işləyərək, ötən il Avropaya qaz tədarükünü 40 faiz artırmaqla 11,4 milyard kubmetrə çatdırıb. Bu həcmin 84 faizindən çoxu, yəni 9,6 milyard kubmetri yalnız İtaliyanın payına düşüb.
P.Şahbazov müsahibəsində daha sonra TAP-ın enerji təhlükəsizliyinə xidmət etməklə yanaşı, enerjidə əlçatanlığına və ətraf mühitin qorunmasna töhfə verən layihə olduğunu da vurğulayıb. Energetika naziri boru kəmərinin Avropanın 10-dan çox ölkəsini Azərbaycan qazı ilə təchiz etmək perspektivinə malik olduğunu və dayanıqlı enerji təhlükəsizliyi üçün bu layihənin inkişafının zəruriliyini də bildirib. O, “REPowerEU” planının, eləcə də Avropa İttifaqı ilə Azərbaycanın enerji sahəsində yenilənmiş strateji tərəfdaşlıq sənədinin məhz TAP-ın rolunun gücləndirilməsini ehtiva etdiyini xatırladaraq boru kəmərinin avropalı tərəfdaşlar üçün “təhlükəsizlik yastığı” rolu daşıdığını diqqətə çatdırıb.
Müsahibədə, həmçinin TAP layihəsinin İtaliya üçün strateji əhəmiyyətindən, boru kəmərinin ötən üçillik dövrdə “köhnə qitə”nin enerji təhlükəsizliyinə verdiyi töhfədən və kəmərin ötürücülük qabiliyyətinin artırılmasının önəmindən bəhs olunub.
Qeyd edək ki, TAP vasitəsilə Avropaya qaz tədarükü 2020-ci ilin dekabrın 31-də başlayıb. İndiyədək qitəyə 28,7 milyard kubmetr Azərbaycan qazı göndərilib.
XQ