9 ayda bu sahədən daxilolmalar 12,8 milyard manata yüksəlib
Son illər ərzində vergi sistemində həyata keçirilən genişmiqyaslı islahatlar nəticəsində sahənin maddi-texniki bazası müasirləşdirilib, vergi inzibatçılığı texnoloji cəhətdən yenidən qurulub, biznes mühiti münbitləşib. Nəticədə vergi daxilolmalarının davamlı artımına nail olunub.
Dövlət Vergi Xidmətinin (DVX) məlumatına əsasən, 2002-ci ildən indiyədək vergi daxilolmalarında artım 23 dəfəyədək artıb. Cari ilin yanvar-sentyabr aylarında isə DVX tərəfindən toplanan vergi daxilolmaları 2022-ci ilin müvafiq dövrü ilə müqayisədə 22,6 faiz yüksələrək 12 milyard 810 milyon manat təşkil edib.
Bu dövrdə qeyri-neft-qaz sektorundan vergi daxilolmaları əvvəlki ilin eyni dövrü ilə müqayisədə 19,3 faiz artaraq 7 milyard 425,8 milyon manata çatıb. Belə bir müsbət tendensiyanın davamlı olması üçün DVX biznes mühitində şəffaflığın artırılması və vergi inzibatçılığının təkmilləşdirilməsi istiqamətində bundan sonra da səyləri davam etdirəcəyini bildirib.
Son illərdə DVX-də “kölgə iqtisadiyyatı” ilə mübarizə və şəffaflığa əməl edilməsi, biznes mühitinin səmərəliliyinin artırılması kimi məsələrə xüsusi önəm verilib. Bütün bunlar vergi daxilolmalarının əhəmiyyətli artımı ilə nəticələnib, ölkəmizin maliyyə imkanlarının genişlənməsini, sahibkarların sayının getdikcə artmasını şərtləndirib. Belə ki, əgər 2002-ci ildə respublikada cəmi 180 minə yaxın sahibkarlıq subyekti mövcud idisə, 2022-ci ilin sonuna qeydiyyatda olan vergiödəyicilərinin sayı 1,4 milyonu keçib, fəal vergiödəyicilərinin sayı isə 2022-ci ilin sonuna 712 mini ötüb.
Vergi sistemində həyata keçirilən islahatlar nəticəsində ötən il ilk dəfə dövlət büdcəsinə 15,5 milyard manat həcmində vergi daxilolması reallaşdırılıb. Prezident İlham Əliyev bununla bağlı deyib: “İqtisadi sahədə aparılan islahatlar imkan verdi ki, 6 ayda vergilər sahəsində proqnozdan əlavə 2 milyard manat pul yığıldı, çünki şəffaflıq var, dürüstlük var, hesabatlılıq var. Biznes dairələrinə bir neçə il bundan əvvəl möhlət verilmişdi ki, onlar da normal relslərə keçsinlər, daha o kölgə iqtisadiyyatından əl çəksinlər. Onlara himayədarlıq edənlərə də, necə deyərlər, dərs verildi. Ona görə, 6 ayda 2 milyard manat əlavə ancaq vergi orqanları yığıbdır və biz bundan istifadə edirik. İlin sonuna hələ təxminən 6 ay var. Budur, bizim maliyyə-iqtisadi imkanlarımızın əsas faktoru”.
Qarşıdakı dövrdə də vergi siyasətinin, ilk növbədə, iqtisadi təşviq, səmərəli nəzarət, rəqəmsallaşma prinsipləri əsasında həyata keçirilməsi nəzərdə tutulub. Bundan başqa, iqtisadiyyatın şaxələndirilməsi və investisiyaların cəlb olunmasında vergi siyasətinin tənzimləyici rolunun davam etdiriləcəyi, “kölgə iqtisadiyyatı” ilə sistemli mübarizənin miqyasının genişləndiriləcəyi planlaşdırılıb.
Bütün bu məsələlər haqqında DVX və Azərbaycanda Amerika Ticarət Palatasının (“AmCham Azərbaycan”) birgə təşkilatçılığı ilə “Vergi şəffaflığı: nailiyyətlər və çağırışlar” mövzusunda keçirilən konfransda ətraflı danışılıb, vergi islahatlarında dövlət-biznes dialoqu, qarşılıqlı etimadın artırılması və ictimai əməkdaşlığın gücləndirilməsi kimi təşəbbüslərin önəmi xüsusi vurğulanıb, eyni zamanda, biznes–vergi siyasətinin yumşaq və ya sərt deyil, balanslı olmasına üstünlük verilməsinin zəruriliyi diqqətə çatdırılıb.
Konfransda, həmçinin “kölgə iqtisadiyyatı”nın azaldılması istiqamətində ciddi dəyişikliklərin əsasının qoyulduğu, sahibkarlıq subyektləri üçün açıq reyestr çıxışı olan məlumat bazasının qurulması ilə kontragentlərin seçilməsi prosesinin sürətləndirilməsi, bütün bunlarla yanaşı, gələcəkdə vergi və kapitala amnistiyanın şəffaflığının artırılması, ümumbəyannamə sisteminə keçidin reallaşdırılması layihələrinin həyata keçirilməsinin nəzərdə tutulduğu qeyd edilib.
Tədbirdə DVX-də aparılan struktur dəyişikliklərinə də toxunulub, qurumun mövcud strukturunun vergiödəyici təsnifatı və ərazi prinsipi üzrə qurulduğu, eyni zamanda, müraciət və şikayətlərə daha keyfiyyətli baxmaq imkanı yaratmaq məqsədilə vergiödəyicilərinin risklərinin təhlili və onun monitorinqi ilə bağlı yeni strukturun yaradıldığı bildirilib. Növbəti mərhələdə isə DVX-də funksional sahə üzrə idarəetmə prinsipinə keçiləcəyi, bunun isə vergi siyasəti və inzibatçılığını vahid bir şəkildə idarə etməyə, fiskal orqanla vergiödəyiciləri arasında daha şəffaf münasibətlərin formalaşmasına imkan yaradacağı vurğulanıb.
Yeri gəlmişkən, xatırladaq ki, respublikada fiskal sahədə gerçəkləşdirilən şəffaflıq sayəsində vergi daxilolmalarının nominal artım tempi ÜDM-in nominal artım tempini 7,7 faiz üstələyib, bu, iqtisadiyyatın böyüməsinə, sahibkarların dayanıqlı gəlirlər sisteminin formalaşmasına əsaslı təsir göstərib. Xüsusilə mikro sahibkarlıq subyektlərinin kiçiyə, kiçikdən ortaya çevrilməsinin iqtisadiyyatda keyfiyyət dəyişikliklərini daha da artıra biləcəyinə əlverişli şərait, eyni zamanda, perspektivdə haqsız rəqabətin aradan qaldırılmasına müsbət zəmin yaradıb.
Respublikada vergi sisteminin davamlı şəkildə təkmilləşdirilməsi qeyri-neft sektorunun inkişafında da özünü qabarıq büruzə verib. Başqa sözlə, bu istiqamətdə icra olunan vergi islahatları yeni qurulan iqtisadi zonalarda əlverişli biznes şəraitinə müsbət təsir göstərib. Məsələn, son illərdə texnologiya və sənaye parklarının rezidentləri üçün səmərəli vergi mühiti yaradılıb. Hər bir startap üç il müddətinə gəlir vergisindən azad edilib. Həmçinin kənd təsərrüfatı sahəsində vergi dərəcələri azaldılıb və sahibkarlıq fəaliyyətinin təşviqi diqqət mərkəzində saxlanılıb. Biznes fəaliyyətinin inkişafında bütünlükdə rəqəmsallaşma böyük rol oynayıb. Şübhəsiz ki, bu məsələnin həllinə hər bir sahibkar üçün əlçatan dövlət vergi sisteminin yaradılması önəmli təsir göstərib.
Qeyd edək ki, son illər ərzində sahibkarlıq subyektlərinin vergi yükünün azaldılması və sahibkarlıq fəaliyyətinin təşviqi, sosial xarakterli güzəştlər vasitəsilə əhalinin vergi yükünün aşağı salınması, vergitutma bazasının genişləndirilməsi, vergi nəzarəti mexanizminin və vergi inzibatçılığının təkmilləşdirilməsi əsas prioritet istiqamətlərdir. Vergi siyasətinin hədəfləri yenə də biznesin təşviqi, vergi yükünün optimallaşdırılması və risklərin minimallaşdırılmasıdır. Şübhəsiz ki, bu məsələlərin gerçəkləşdirilməsi də “kölgə iqtisadiyyatı”nın azalmasına, iqtisadiyyatda şəffaflaşma indikatorları üzrə müşahidə olunan göstəricilərin yüksəlməsinə, qeyri-neft sektorunda daha sürətli artımın əldə edilməsinə gətirib çıxarır.
Hazırda vergi inzibatçılığının keyfiyyətinin artması şəraitində qarşıda duran fiskal öhdəliklər üzrə proqnozların icra edilməsi, vergiödəyicilərinə xidmətlərin çeşidinin və keyfiyyətinin artırılması, risk əsaslı nəzarət sisteminin genişləndirilməsi, ortamüddətli perspektiv üçün vergi siyasəti üzrə məqsədlərin həyata keçirilməsi əsas istiqamətlərdir. Beləliklə, vergi siyasətinin iqtisadiyyatın, o cümlədən sahibkarlığın inkişafında, böyüməsində və güclənməsində iştirakı artmaqda davam edir.
Vaqif BAYRAMOV
XQ