Azərbaycan Dövlət Neft Şirkətinin (SOCAR) tarixində ilk dəfə olaraq “Günəşli” yatağında 8 saylı platformadan yan lülə quyusu qazılıb. SOCAR AQŞ-nin reallaşdırdığı mürəkkəb layihələrdən biri olan yan lülə quyusu Fasilə lay dəstəsinə uğurla qazılaraq sifarişçi təşkilat SOCAR-ın “Azneft” İstehsalat Birliyinə təhvil verilib.
Quyuda quraşdırılmış istismar kəməri daxilində istiqamətləndirici qoyulmaqla iki kəmərdən pəncərə kəsilərək yan lülə 2985 metr dərinliyə qazılıb. Qazma əməliyyatları yerinə yetirilən zaman təzyiqlərə, layların dəyişməsinə və quyu istiqamətinə tam nəzarət olunub.
Quyu layihə dərinliyinə qazıldıqdan sonra müvafiq istismar quyruq kəməri xüsusi asqı avadanlığı vasitəsilə uğurla endirilib. Udulmaya meyilli layların mövcudluğunu nəzərə alaraq SOCAR AQŞ quyuda ilk dəfə olaraq yeni texnologiyalardan istifadə etməklə istismar quyruq kəmərini sementləyib. Həmin kəmər quyuağzı avadanlıqla birgə plana uyğun olaraq kipliyə yoxlanılıb, sifarişçi tərəfindən təyin edilmiş hədəflər üzrə obyekt tam açılıb və quyu yüksək debitlə istismara verilib.
SOCAR AQŞ-nin baş direktoru Samir Mollayevin bildirdiyinə görə, yan lülə quyularının qazılması uzun illər istismarda olan bir çox quyunun debitini artırmaq baxımından önəmlidir. Onun dediyinə görə, “Günəşli” yatağında 300-dən çox quyunun hasilatını yenidən bərpa etmək üçün yan lülə quyularının qazılması xüsusi əhəmiyyət kəsb edir. “Bu, ölkənin neft hasilatının uzunömürlülüyünün təmin edilməsinə, quyuların daha məhsuldar olmasına, eləcə də qazma işlərinin səmərəliliyinin artırılmasına xidmət edəcək”,–deyə o əlavə edib.
XQ