Boksçumuz azı bürünc mükafatı təmin edib
Paris Olimpiadasında medal ümidlərimizdən biri olan boksçumuz Alfonso Dominqes (92 kq) 1/4 final qarşılaşmasında uğurla çıxış edərək medalı təmin edib.
Boksçumuzun mükafata aparan yolda ilk rəqibi, 1/8 finalda ikiqat Olimpiya çempionu Xulio Sesar Kruz olub. Kubalı rinq ustasını mübarizədən kənarlaşdıran boksçumuz 1/4 finalda Aybek Oralbaya (Qazaxıstan) da qalib gəlib. Beləliklə, komandamız Olimpiya Oyunlarında artıq 3-cü mükafatını təmin etmiş oldu.
Bundan əvvəl cüdoçularımız Hidayət Heydərov (73 kq) və Zelim Kotsoyev (+100 kq) Oyunların qızıl medallarını qazanıblar.
Qeyd edək ki, A.Dominqes Tokio Olimpiadasının bürünc mükafatçısıdır. 2021-ci ildə karyerasında ilk dəfə dünya çempionu titulunu qazanıb. Ötən il Daşkənddə keçirilən dünya çempionatında gümüş medala sahib olub.
Boksçularımız müstəqil Azərbaycanın iştirak etdiyi olimpiadalardan “Atlanta-1996” istisna olmaqla bütün Oyunlardan Vətənə medalla dönüblər. Dəri əlcək ustalarımız ötən olimpiadalarda 8-i bürünc, 1-i gümüş olmaqla 9 medal qazanıblar.
