Dopinqsiz idman təkcə yarışlarda çıxış edənlər üçün deyil, həm də insanların və cəmiyyətin sağlamlığı və rifahı üçün mühüm amildir. İdmana xas olan bütün dəyərləri məhv edən dopinqdən istifadənin qarşısını almaq üçün ən təsirli tədbir isə sanksiya və cəzalar deyil, dopinqin təhlükələri haqqında cəmiyyətin bilik səviyyəsinin yüksəldilməsidir.
Elə bu məqsədlə Ümumdünya Antidopinq Agentliyi (VADA) tərəfindən 2024-cü il 19 aprel tarixi dünyada Ədalətli İdman Günü elan olunub. VADA hər il müxtəlif şəkildə qeyd olunan əlamətdar günün bu il rəqəmsal platformalar vasitəsilə təbliğ edilməsi üçün çağırış edib.
WADA-nın təşəbbüsünə qoşulan Azərbaycan Milli Antidopinq Agentliyi (AMADA) isə öz növbəsində 15-21 aprel tarixlərini əhatə edən dövrü ölkəmizdə Ədalətli İdman Həftəsi elan edib və idman ictimaiyyətini bu günlə bağlı məlumatlandırma işinə başlayıb.
AMADA-nın mətbuat xidmətinin rəhbəri Səxavət Quliyev “XQ”yə açıqlamasında təmiz idman dəyərlərinə həsr olunan Ədalətli İdman Gününün dopinqə qarşı mübarizənin idmançılar, idman ictimaiyyəti və digərləri üçün məlumatlandırma məqsədi daşıdığını bildirdi.
– 2013-cü ildə Cənubi Amerikanın 17 ölkəsinin iştirakı ilə VADA-nın təsis konfransında Ədalətli İdman Gününün qeyd edilməsi təşəbbüs olaraq irəli sürülüb. 2014-cü ildən başlayaraq hər il aprel ayının müxtəlif günlərində bu əlamətdar gün qlobal şəraitdə qeyd edilir. Ötən il – 2023-cü ildə Ədalətli İdman Günü 161 milyondan artıq idman ictimaiyyətinin nümayəndəsini əhatə etmişdi ki, bu da rekord göstəricidir. Müqayisə üçün deyək ki, 2021-ci ildə bu göstərici 87 milyon olub.
Qeyd edilib ki, AMADA həftə çərçivəsində öz sosial şəbəkə hesabları vasitəsilə ölkəmizdə ədalətli idman prinsiplərinin təbliğini geniş şəkildə davam etdirəcək.
AMADA-nın rəqəmsal marketinq üzrə meneceri Mədinə Hüseyn qeyd edib ki, Ədalətli İdman Həftəsi ərzində bu qurumun müxtəlif sosial media kanallarında məlumatlandırıcı post və hekayələr paylaşılır:
– İdman ictimaiyyətinin tanınmış simalarının bu günlə bağlı fikirlərini əks etdirən videoçarxlar da böyük marağa səbəb olub. Eyni zamanda, Ədalətli İdman Günü ilə bağlı sorğulardan ibarət müsabiqələr təşkil edilir ki, insanlar bu müsabiqələrdə iştirak etməklə, həm maariflənir, həm də AMADA-dan dəyərli hədiyyələr qazanırlar. Ədalətli İdman Günü ilə bağlı deyil, ümumilikdə idmanda təmizliyin və dürüstlüyün qorunmasında sosial medianın rolu çox böyükdür. AMADA bu sahədə yeniliklər etməyə və insanları maarifləndirməyə çalışır.
Dəfələrlə, dünya, Avropa və Paralimpiya çempionu olmuş İlham Zəkiyev ötən Paralimpiadada – “Tokio-2020”də görüşlərinin birində 2 barmağının sınmasına baxmayaraq ağrını iradəsi ilə dəf edərək qələbə qazanmışdı. Qəzetimizə açıqlamasında dünya şöhrətli idmançı Azərbaycana təmiz qələbənin yaraşdığını dedi:
– Təmiz idmanda dopinqə yer yoxdur. Dopinq qısamüddətli qələbəyə, lakin uzunmüddətli məğlubiyyətə aparan yoldur. İdmançılarımız həmişə ədalətli rəqabətə meyilli olublar. Bu, bizim əsas amalımızdır. Artıq Paris Olimpiadası yaxınlaşır. Əminəm ki, müzəffər ölkəmizi növbəti olimpiadada da ləyaqətlə təmsil edəcək, ədalət prinsiplərini qoruyaraq, böyük qələbələr qazanacağıq. Azərbaycana təmiz qələbə yaraşır.
2024-cü ilin “İdman səfiri”, taekvondoçu Fəridə Əzizova dopinqin bu gün idman üçün ən böyük təhlükələrdən biri olduğunu bildirdi. O qeyd etdi ki, idmançıların performansını artıran dərmanların istifadəsi nəticəsində yaranan böyük bərabərsizlik dərin narahatlıq doğurur:
– Dopinq idmanda ədalətli rəqabəti məhv edir. Ədalətli idman deyəndə, təhlükəsiz idman və hamıya bərabər imkanların yaradılması nəzərdə tutulur. Bu, idmanla məşğul olmaq istəyənlər üçün də yaxşı motivasiyadır. İdman, həm də gənclər üçün mühüm təlim vasitəsidir. İdmanda mübarizə ilə uşaqlar ədalətli oyun prinsiplərini öyrənirlər ki, bu da həyat boyu davam edən yaxşı davranış nümunələri yaratmağa kömək edir. Ona görə də, biz idmançılar həmişə ədalətli mübarizənin üstünlüyünü gənc nəslə aşılamağa çalışırıq. Ədalətli İdman Həftəsi də bu baxımdan təmiz idmanı təbliğ etmək üçün yaxşı fürsətdir.
Leyla QURBANOVA
XQ
