Fiziki hazırlıqla yanaşı, özünəinam da əsasdır
Serbiyanın paytaxtı Belqradda keçirilən dünya çempionatında sərbəst güləş üzrə yarışa yekun vurulub.
Dünya çempionatı ərəfəsində yarışda gözlənilən nəticələrlə bağlı proqnozlar idman ictimaiyyətini xeyli ruhlandırmışdı. Mundialdan maksimum nəticələr və rekordlar gözləyirdik. Əslində, komandanın heyətinə nəzər salsaq, güclü potensiala malik güləşçilər görərik. Mundial ərəfəsində sərbəst güləş üzrə yığmanın baş məşqçisi Xetaq Qazyumov komandamızın Olimpiadaya minimum 6 lisenziya qazanmağı hədəflədiyini bildirmişdi. Bu il Xorvatiyada keçirilən Avropa çempionatında millimiz böyük uğur qazanaraq komanda hesabında 1-ci yeri tutmuşdu.
Qitə çempionatında 70 kiloqram çəki dərəcəsində mübarizə aparan millinin lideri Hacı Əliyev 4-cü dəfə Avropa çempionu adına layiq görüldü. Üçqat dünya çempionu bu nüfuzlu yarış əfərəsində bildirmişdi ki, daha yaxşı formadadır və dünya çempionluğunu hədəfləyib. Hacı Əliyevlə yanaşı, heyətdə 6 illik qızıl medal həsrətinə son qoya biləcək digər güclü pəhləvanlar da yer almışdılar. Yekunda millimiz bu nüfuzlu turniri 2 gümüş medal və 1 Olimpiya lisenziyası ilə başa vurdu. Komandamızın mundialda qazandığı nəticələri qənaətbəxş hesab etmək olarmı?
Baş məşqçi Azərbaycan Güləş Federasiyasının rəsmi saytına müsahibəsində güləşçilərimizin çıxışlarını qiymətləndirib. Yığma üzvlərinin fiziki cəhətdən çox hazırlıqlı olduqlarına baxmayaraq, bəzi məqamlarda özünəinamın zəif olduğunu diqqətə çatdırıb:
– Dünya çempionatına 2 gümüş medal üçün yox, daha yüksək nəticələr üçün getmişdik. 74 kiloqram çəkidə medal və lisenziya əldə edə bilərdik. Püşkü münasib olan Abubakr Abakarovun (86 kq) da medal və lisenziya qazanmaq şansı yüksək idi. Osman Nurmaqomedov (92 kq) və Maqomedxan Maqomedov (97 kq) yeni dünya çempionu ola bilərdilər. Bunlar baş versəydi, nəticədən ümumilikdə razı qalmaq olardı. Əslində, komandamızın yaxşı potensialı var. Bura gələndə böyük həcmdə iş görmüşdük. Çoxlu təlim-məşq toplanışları keçmişdik. Fiziki cəhətdən çox hazırlıqlıydıq. Sadəcə, bəzi məqamlarda özünəinam çatışmadı.
Xetaq Qazyumov bu il Avropa çempionatının qalibləri Əliabbas Rzazadənin (57 kq) və Hacı Əliyevin məğlub olma səbəblərindən danışıb:
– Əliabbas Rzazadə ilk görüşdə ABŞ-ın çox güclü güləşçilərindən biri, dünya çempionu və olimpiya mükafatçısı Tomas Gilmanı məğlub edən Zeyn Riçardsa qalib gəlsə də, İranın gənc güləşçisi ilə bacarmadı. Əliabbasın növbəti mərhələlərdə üz-üzə gələcəyi Albaniya və Rusiya güləşçiləri ilə görüşləri fikirləşdiyini bildiyimiz üçün onu nə qədər bu qarşılaşmaya kökləməyə çalışsaq da, alınmadı. Nəticədə öz imkanlarından aşağı səviyyədə çıxış etdi.
Hacı Əliyev (65 kq) ilk 3 rəqibinə qalib gəldi. Təsnifat mərhələsində burnundan zədələndi. Bu da müəyyən qədər ona problem yaratdı. Təəssüf ki, Ermənistan idmançısına məğlub oldu. Bu yarışda Vazgen Tevanyan daha güclü idi. Görüş başlayan kimi xallar aldı, sevimli çevirmə fəndindən istifadə etdi. Hacı çox təcrübəli güləşçidir. Həmin görüşdən sonra onunla danışmamışam. İsti-isti bu barədə danışmaqdansa, bir müddət sonra soyuq başla qarşılaşmanı təhlil etmək daha doğrudur. Hər şeyi detallı şəkildə nəzərdən keçirəcəyik. İndi Hacı həm özünə, həm də kapitan kimi komandanın nəticəsinə görə çox məyusdur.
Baş məşqçi komandanın digər üzvü Abubakr Abakarovun (86 kq) təəssüf ki, zədələndiyini və bunun nəticəyə təsir etdiyini vurğulayıb. Turan Bayramovun (74 kq) isə özünə çox inandığını, amma bu çəkidə hazırda Zaurbek Sidakov (Rusiya) və Kayl Deykin (ABŞ) çox güclü olduqlarını, təcrübə baxımından onlardan geri qaldığını deyib:
– Məğlub olursansa, bunun səbəbini başqa şeylərdə yox, özündə axtarmalısan. Görüş ərzində yorulsan və əhval-ruhiyyən yaxşı olmasa belə, son anadək rəqibə diş göstərməlisən. Maksimum gücünü ortaya qoymalısan. Bürünc medal uğrunda görüşdə sakit və taktiki baxımından savadlı güləşmək olardı. Təəssüf ki, Serbiya idmançısına qarşı müəyyənləşdirdiyimiz taktikayla güləşmədi. Daim hücum etməyi və rəqibi təzyiqdə saxlamağı tapşırmışdıq. Xəbərdarlıq etmişdik ki, Hetik Çabolova qarşı dayanıb güləşməklə qələbə qazanmaq mümkün deyil. Yalnız ondan daha üstün təcrübə və səviyyədə olmalısan ki, bu qaydada qalib gələsən. Əslində Turanın funksional hazırlığı daha yaxşı idi. Taktiki səhvə yol verdi.
Sonda funksioner qeyd edib ki, məşqçilər heyəti öz üzərinə düşən işi maksimum yerinə yetirir:
– Ancaq biz idmançının yerinə xalçaya çıxıb, güləşə bilmərik. Dairənin içərisində olanda bütün məsuliyyəti güləşçi daşıyır. Bu zaman artıq idmançının dözümü və xarakteri üzə çıxır. Güləşçi həm özü, həm ailəsi, həm də ölkəsi adına məsuliyyət daşıyır və bunu dərk etməlidir. Yenə deyirəm, güləşçilərimizin potensialı var. Sadəcə, gələcək yarışlarda özünə inanmaq və əsl çempionlara xas xarakter nümayiş etdirmək lazımdır. Dünya liderləri sırasında olmaq üçün bir neçə aylıq qısa müddətdə böyük işlər gördük. Çoxlu intensiv məşqlər keçdik. Ancaq bir komandanı tam formalaşdırmaq üçün illər lazımdır. Bundan sonra ciddi nəticələr haqqında danışmaq olar.
Həmişə güləşçilərə deyirik ki, sən xalçada təkcə güləşmirsən, sanki rəqiblə müharibə aparırsan. Qonq çalınana kimi yox, hakim səni saxlayana kimi rəqiblə mübarizə aparmalısan. Bax onda nəticə də olacaq, zədə də olmayacaq və sən qalib gələcəksən.
Qeyd edək ki, 2 gümüş medal qazanan yığmamız 66 xalla komanda hesabında 5-ci yeri tutub. Ötən ilki dünya çempionatında isə millimiz 2 bürünc medalla (42 xal) 8-ci pillədə qərarlaşmışdı.
Leyla QURBANOVA
XQ