Güləşçilərimiz dünya çempionatına necə hazırlaşıblar?
Dünyanın adlı-sanlı güləşçiləri bugünlərdə öz aralarında ən güclüləri müəyyənləşdirmək üçün Serbiyanın paytaxtı Belqradda keçiriləcək dünya çempionatında bir araya gələcəklər.
Bəs çempionata millimizin hazırlığı necə qiymətləndirilir?
Builki dünya çemopionatı Paris Olimpiadasına vəsiqə qazandırmaq baxımından da böyük önəm daşıyır. Sərbəst güləş üzrə Azərbaycan millisinin baş məşqçisi Xetaq Qazyumov güləşçilərin minimum və maksimum hədəflərini açıqlayıb: “Komandamız Olimpiadaya minimum 6 lisenziya qazanmağı hədəfləyib. Qeyri-olimpiya çəkilərində, əsasən, gənclərə üstünlük vermişik. Olimpiya çəkilərində isə təcrübəli güləşçilər mübarizə aparacaqlar. Avropa çempionumuz Əliabbas Rzazadədən (57 kq) minimum olimpiadaya lisenziya qazanmağı gözləyirəm. Maksimum nəticə göstərərsə, dünya çempionu ola bilər. Üçqat dünya çempionu Hacı Əliyevin (65 kq) böyük potensialı var. Hazırda çox yaxşı formadadır və düşünürəm ki, hansısa problem onun yenidən dünya çempionu olmasına mane olmayacaq”.
Baş məşqçi Turan Bayramov, Abubakr Abakarov (86 kq), Maqomedxan Maqomedov (97 kq) və Georgi Meşvildişvilidən (125 kq) də yüksək nəticələr gözlədiyini bildirib. Qeyd edib ki, istər Olimpiya, istərsə də qeyri-olimpiya çəkilərində maksimum nəticəni hədəfləyirlər. Bunun üçün güləşçilər potensiallarından maksimum istifadə etməlidirlər.
Sərbəst güləş üzrə millinin lideri Hacı Əliyev (65 kq) Belqradda dünya çempionatında 6 illik medal həsrətinə son qoymağa və Azərbaycan güləşində ilk dördqat dünya çempionu kimi yeni rekorda imza ata bilər. İstedadlı güləş ustası dördüncü dəfə qızıl medal, eyni zamanda Olimpiadaya lisenziya qazanmağı hədəf seçib. O, həm özünün, həm də komanda yoldaşlarının yaxşı formada olduğunu deyib. Vurğulayıb ki, yığma ilboyu həm ölkə xaricində, həm də Vətəndə birlikdə təlim-məşq toplanışı keçib: “Düşünürəm ki, yarışa tam hazıram. Uğurlu nəticə əldə etmək üçün əlimdən gələni edəcəyəm”.
Qadın güləşi üzrə millinin baş məşqçisi Semyon Şterev də yığmanın yüksək nəticələrə iddialı olduğunu deyib: “Mariya Stadniklə (50 kq) yanaşı, Jalə Əliyeva (57 kq) və Elis Manolovadan (62 kq) da yaxşı nəticə gözləyirik. Güləşçilərimizin uğurla çıxış edəcəklərinə inanırıq”.
Dünya qadın güləşinin canlı əfsanəsi Mariya Stadnik 4 illik fasilədən sonra mundiala qayıdır. İkiqat dünya çempionu Belqradda növbəti titul və Olimpiadaya lisenziya qazanmaq üçün var-gücünü sərf edəcək. O, Olimpiya Oyunlarında 5-ci dəfə iştirak etməklə, Azərbaycan idmanında daha bir rekorda imza ata bilər.
Ötən il Belqradda ikinci dəfə dünya çempionu titulunu qazanan Eldəniz Əzizli bu dəfə də eyni məkanda eyni uğuru təkrarlamağa və yunan-Roma güləşində müstəqillik tariximizin ilk üçqat dünya çempionu adına sahib çıxmağa çalışacaq. Millinin kapitanı Serbiyada titulunu qorumaq üçün yüksək səviyyədə hazırlıq keçib.
Milli üzvlərinin hazırlığını yüksək qiymətləndirən yunan–Roma güləşi üzrə Azərbaycan yığmasının baş məşqçisi Aleksandr Tarakanov dünya çempionatında mümkün qədər çox olimpiya lisenziyası əldə etməyi qarşılarına məqsəd qoyduğunu qeyd edib: “Ötənilki dünya çempionatındakı nəticəni yaxşılaşdırmağa çalışacağıq. Dünya çempionatında qalib olmaq böyük önəm kəsb edir. Millimizin üzvləri yarışa yaxşı hazırlaşıblar. Güləşçilərimiz özlərinə əmindirlər. Düşünürük ki, istədiyimiz nəticəni əldə edə biləcəyik”.
Beləliklə, sentyabrın 16-dan 24-dək “Stark Arena”da keçiriləcək dünya çempionatında güləşçilərimiz tarix yazmağa çalışacaqlar. Bunun üçün potensial da var, perspektivlər də.
Xatırladaq ki, müstəqillik illərində böyüklər arasında 12 dünya çempionumuz olub. Onlar ümumilikdə 17 qızıl medal qazanıblar. Hacı Əliyev 3 qızıl medalla (2014, 2015, 2017) Azərbaycan rekordçusudur.
L.QURBANOVA
XQ