Serbiyanın Vrnyaçka Banya şəhərində kişi şahmatçılar arasında keçirilən şəxsi Avropa çempionatında Azərbaycan şahmatçıları uğurla çıxış edirlər. 

Qitə çempionatının ötən 4 turunda ən yaxşı nəticə Eltac Səfərliyə məx­susdur (4 xal). O bu nəticə ilə turnir cədvəlinin ikinci pilləsində qərarlaşıb.Komanda üzvlərindən daha biri – Ni­cat Abasov da liderliyə çox yaxındır. O, ötən 4 turda 3,5 xal toplayıb. Digər şahmatçılarımızdan Vüqar Əsədli, Ay­dın Süleymanlı, Ülvi Sadıqov, Namiq Quliyev, Vüqar Rəsulov, Misrətdin İsgəndərov, Xaqan Əhməd, Xəzər Babazadə, Read Səmədov 3, Vüqar Manafov 2,5 xal yığıblar. 

Şahmat üzrə Azərbaycan yığma­sının məşqçisi Fikrət Sideifzadə “Xalq qəzeti”nə açıqlamasında bildirib ki, ilk turlarda şahmatçılarımızın nəticələri qənaətbəxşdir: “Adətən əvvəlki tur­larda xal yığmaq bir qədər rahat olur. Eltac Səfərli əvvəlki turları qələbə ilə başa vursa da, 5-ci turda təcrübə­li israilli şahmatçısı Boris Gelfandla heç-heçə etdi. Beşinci turun oyunları davam edir. Eltac Səfərlinin və digər şahmatçılarımızın da uğurlu nəticələr əldə etmələri üçün şansları böyükdür. Yarışda güclü şahmatçılar iştirak edir­lər. Onlardan Ukrayna təmsilçiləri An­ton Korobov və Ruslan Ponomaryov, eləcə də iranlı Pərham Maqsudlunun adlarını çəkə bilərəm. Həmçinin ön sı­ralarda qərarlaşan erməni şahmatçılar da var. İnanırıq ki, zəka ustalarımız uğurla çıxış edəcəklər. 

Onu da qeyd edim ki, qitə çempi­onatında ən yaxşı nəticə göstərən 23 şahmatçı bu il yayda Bakıda keçirilə­cək dünya kubokuna vəsiqə qazana­caq”. 

Qeyd edək ki, şəxsi Avropa çem­pionatında 40 ölkədən 500-dən çox şahmatçı mübarizə aparır. İsveçrə sis­temi üzrə keçirilən yarış martın 13-də başa çatacaq.

Leyla QURBANOVA