Cənubi Koreya hökuməti prezident seçkilərini şərti olaraq iyunun 3-nə təyin edir.
AZƏRTAC xəbər verir ki, bu barədə ölkənin Yonhap xəbər agentliyi məlumat yayıb. Bildirilib ki, prezident səlahiyyətlərini icra edən Han Dok Su Nazirlər Kabinetinin çərşənbə axşamı keçiriləcək iclası zamanı cədvəli təsdiqləməyi planlaşdırır.
Konstitusiya Məhkəməsinin qərarına görə, Yunun vəzifəsindən kənarlaşdırdığı gündən etibarən 60 gün ərzində prezident seçkiləri keçirilməlidir. Təqvim təsdiqlənərsə, namizədlərdən mayın 11-dək qeydiyyatdan keçmələri tələb olunacaq və rəsmi təşviqat dövrü mayın 12-də başlayacaq. Qanun, həmçinin prezidentliyə namizədliyini irəli sürən dövlət qulluqçusunun seçkiyə azı 30 gün qalmış istefa verməsini tələb edir ki, bu da mayın 4-ü namizədliyini irəli sürmək üçün son tarixdir.
Yeni seçilmiş prezident seçkilərin nəticələrindən dərhal sonra keçid komandası olmadan səlahiyyətlərinin icrasına başlayacaq.
