Parqalı İbrahim Paşa Sultan Süleymanın ən yaxın dostu olsa da...
Osmanlı imperiyasının böyük vəziri Parqalı İbrahim Paşanın ömrünü necə başa vurması haqqında mübahisələr bugünədək davam etməkdədir. Gəncilk dostuna hədsiz bağlanan və ona son dərəcə etibar edən Sultan Süleymanın onu öz əli ilə öldürməsinin səbəbləri nədir? Axı böyük dövlət başçısı hədsiz səlahiyyətlər verdiyi, hətta İbrahimi özündən belə çox qoruyacağına and içmişdi!
Xatırlayırsınızsa, Türkiyə sənətçilərinin, həqiqətən, böyük sənətkarlıqla çəkdikləri “Möhtəşəm yüz il” serialının 3-cü hissəsində İbrahim Paşanın edam edilməsi səhnəsi canlandırılır. Böyük vəzir birbaşa sultanın öz qəsrində həyatdan məhrum edilir. Parqalı İbrahim cəlladların əlindən qurtulmağa çalışaraq, sultanı haraylayır, ancaq bu haraya gələn olmur – onu boğub öldürürlər. Doğurdanmı, real tarix bundan ibarətdir?
Gəlin əvvəlcə parqalı İbrahim Paşa haqqında maraqlı faktlara diqqət edək:
İbrahim Paşa Yunanıstan yaxınlığında, Parqa adlı bir yaşayış məntəqəsində anadan olub. Atası balıqçı olan İbrahimin yunan və italyan mənşəli oduğu güman edilir. 6 yaşı olanda dəniz quldurları tərəfindən oğurlanaraq Manisa şəhərində yaşayan bir qadına satılır. Qadın ona təkcə sadə bilikləri deyil, həm də skripkaya bənzər bir alətdə gözəl ifa öyrədir.
Şahzadə Süleyman Manisada olanda İbrahimlə tanış olur və onu öz yanına xidmətə götürür. İbrahim Paşa 13 il müddətində Osmanlıda sədrəzəm (Sədrəzəm parqalı İbrahim Paşa)– böyük vəzir olur. O, fars, serb və italyan dillərini bilirdi. İbrahim paşa çoxlu mütaliə edirdi və ədəbiyyata böyük diqqət yetirirdi. Tarixi mənbələrdə göstərilir ki, parqalı çox gözəl diplomat olub.
Venetsiyanın səfiri Petro Braqadino 1526-cı ildəki qeydlərində parqalı İbrahim Paşanı belə təqdim edir: “O, Sultan Süleymanın ən yaxın məsləhətçisi idi. Başqa dövlətlərin başçıları və onların torpaqları ilə maraqlanırdı. Maraqlı bahalı əşyalar alar, çoxlu mütaliə edər və qanunları yaxşı bilərdi. Sultana sadiq idi”.
Bəs İbrahim Paşa niyə Sultan Süleymanın qəzəbinə gəldi? Dövrün tarixçiləri yazırlar ki, İbrahim Paşa qürurunun qurbanı olub. Sadə bir şah gözlənilmədən dövlətin ikinci şəxsi rütbəsinə yüksəldikdən sonra, İbrahim səlahiyyətlərinin ona verdiyi əzəmətin öhdəsindən gələ bilmədi. Həyatının böyük bir dövründə sadə qul olan sədrəzəm özünü sultana bərabər tutaraq bir-birinin ardınca çox qorxulu səhvlərə yol verməyə başladı. Onun bu davranışı Süleyman Sultanı o qədər üzdü ki, dostuna və həmfikrinə olan inamı sarsıldı və o, vədinə xilaf çıxdı.
Türk yazarı İsmayıl Mətin “Osmanlıların qanlı tarixi” ədəbi-sənədli əsərində İbrahim Paşanın ölümünün təfərrüatları geniş təsvir edilmişdir.
Sultan Süleymanın daha çox Parqalı kimi çağırdığı İbrahim Paşa hərbi yürüşdən yenicə qayıdır. Müqəddəs Ramazan ayının başladığı ilk günlər idi. Sultan onu şam yeməyinə dəvət edir və onlar köhnə vaxtlarda olduğu kimi uzun-uzadı xoş danışırlar. Şam yeməyi başa çatandan sonra İbrahim sarayına qayıtmaq istəyir, lakin Sultan onun öz sarayında gecələmisini istəyir.
Vəzir itaətkarcasına saraydakı otaqlardan birinə keçir və uzanıb yatır. Elə ki, Parqalının yuxuya getdiyini deyirlər, Sultan cəlladları çağırtdırır. Onlar otağa daxil olub kəndiri Parqalının boğazına keçirirlər. Paşa qəfil oyanıb yerindən qalxır və cəlladlara müqavimət göstərməyə çalışır. Əsl döyüş başlayır. Səsi bütün saray əhli aydın eşidir.
İbrahim xeyli müqavimət göstərir, nəhayət, gücdən düşür. Onun ölümü çox ağrılı və əzablı olur. Hətta danışırmışlar ki, sultan bütün baş verənləri gizli pəncərədən müşahidə edirmiş. O, vaxtı ilə sədaqətli dostu və həmfikri olmuş Paraqalının bağırtısını və son nəfəsdə necə xırıldadığını belə eşidirmiş.
Ümumiyyətlə, İbrahim Paşanın edamı ilə bağlı şayiələr və dedi-qodular çox olub. Bəziləri iddia edirlər ki, yataq otağının divarlarında qan izləri olub. Yəqin, vəzir çox güclü olub və həyatı uğrunda elə inadkarlıqla mübarizə aparıb ki, cəlladlar xəncərləri işə salmağa məcbur olublar.
İbrahim Paşanın həyatının son dəqiqələri bir çox ədəbi mənbələrdə geniş təsvir edilib, lakin yazıçıların sözü və fikirləri heç də həmişə üst-üstə düşmür. Məsələn, Ayqut Can özünün “Parqalının ölümü” əsərində hadisələri tamam fərqli şəkildə təsvir edir. Müəllif iddia edir ki, vəzir sultanın otağında ölüb. Guya Sultan Süleyman vəziri yatızdırmaq üçün onun yeməyinə dərman tökdürübmüş. Ancaq dərman çox güclü təsirə malik olub və Parqalı elə yuxuya gedib ki, bir daha yerindən qalxmayıb. Cəlladlar da elə sarayda gizlənibmişlər. Hakimi-mütləq işarə verəndə cəllad çıxıb və əvvəlcə ölümə məhkum edilmiş şəxsə xəncərlə zərbə endirib, sonra isə ipək kəndirdən istifadə edib.
Belə məlumatlar da var ki, İbrahim Paşanın hər şeydən xəbəri var imiş. Sultan hadisələr baş verməmişdən 7 gün əvvəl ona bildiribmiş ki, onun edam edilməsinə fətva alıb. Bundan sonra vəzir hər gün sultanla onun sarayında şam edirmiş, hətta son saata qədər. Bir həftə müddətində Sultan Süleyman mahiyyətcə İbrahimə xilas olmaq üçün yollar qoyub – Parqalı mühafizəçilərin nəzarətində saxlanılmayıb və asanlıqla ölkədən qaça, amansız edamdan canını qurtara bilərmiş. Ancaq vəzir buna getmir və sultanın qərarı ilə barışır.
Bu maraqlı faktı Parqalının şəxsigündəliyindəki qeydlərə istinad edən bir çox tarixçilər də bildirirlər. Məktublardan aydın olur ki, İbrahim, həqiqətən, hər şeyi bilib, ancaq öz ağasının ədalətinə ümid edərək, sona qədər sultana sədaqətli qalıb.
(ardı növbəti sayımızda)
İlqar RÜSTƏMOV,
XQ