Yanvarın 15-dən başlayaraq fermerlərin etiraz dalğası Almaniyanı yenidən iflic vəziyyətinə salıb. 9 minə yaxın insan, 6 min traktor, yük maşını və başqa kənd təsərrüfatı texnikası Berlinin mərkəzinə toplaşıb. Alman fermerlərinin bu mitinqlərdə əsas məramı Almaniya hökumətini dizel yanacağına verilən subsidiyaların, meşə və kənd təsərrüfatında istifadə edilən nəqliyyat vasitələri üçün vergi güzəştlərinin ləğv edilməsi ilə bağlı planlarından imtina etməyə inandırmaqdır.
Almaniyanın maliyyə naziri Kristian Lindner nümayişə çıxan fermerlər qarşısında çıxış edərək onları sakitləşdirmək üçün nəsə demək istəsə də, etirazçılar onu fitə basıb sözünü ağzında qoyublar. İnsanlar davamlı olaraq “Çıx get!” deyərək o qədər hayqırıblar ki, alman fermerlərinin həmkarlar ittifaqının lideri Yoaxim Rukvid onlardan nazirə öz fikrini söyləməyə imkan verməyi xahiş edib.
Yalnız bundan sonra nazir Brandenburq qapılarının qarşısına toplaşan minlərlə insana müraciət edərək deyib: “Mən sizə federal büdcədən daha çox dövlət yardımı ayrılacağına söz verə bilmərəm”. Bunun əvəzinə, nazir fermerlərə təklif edib ki, “azadlıqdan və öz işinizə hörmətdən həzz alın”.
Hökumətin subsidiyaları davam etdirə bilməyəcəyi haqqında qərarı, maliyyə nazirindən əvvəl, AFR-in kansleri Olaf Şolts da açıqlamışdı. O bildirmişdi ki, “əgər biz hamımız 100 faiz öz nöqteyi-nəzərimizin reallaşmasına təkid etsək, heç bir tərəqqiyə nail ola bilmərik”. Buna baxmayaraq, alman aqrarçılarının mövqeyi qətidir. Alman fermerlərindən biri Yohannes Marksen xarici media nümayəndələrinin suallarına cavab verərkən deyib: “Nə qədər ki, bizim bütün tələblərimiz yerinə yetirilməyəcək və ya yeni seçkilər keçirilməyəcək, etirazlar o vaxta qədər davam edəcək”.
Almaniyada fermerlərin etirazları hələ ötən ilin dekabrından – hökumət yeni “sərt iqtisadiyyat” tədbirlərini elan edəndən başlanıb və bu günə qədər davam edir. Ötən ilin noyabrında ölkənin 2024-cü il büdcəsi qəbul edilərkən 17 milyard avro həcmində defisit yaranıb. Bu isə ölkənin konstitusiya məhkəməsinin ilkin olaraq COVİD-19-un nəticələrinin aradan qaldırılması üçün müəyyən edilmiş 60 milyard avro kredit vəsaitinin qeyri-məqsədlər üçün istifadə olunduğunu elan edəndən sonra baş verib. Hökumət fermerlərə dəstəyi azaltmaqla ildə 480 milyon avroya qənaət edəcəyinə ümid bəsləyirdi. Lakin, görünür, AFR kansleri Olaf Şolts baş qaldıracaq narazılıqların miqyasını qiymətləndirə bilməyib.
Yeddi gün ərzində yüzlərlə traktor və kənd təsərrüfatı texnikası böyük şəhərlərin yollarını bağladı. İflic olmuş yollar, çoxlu sayda kənd təsərrüfatı texnikası, hökumət binalarının qarşısına boşaldılmış mal peyinləri – bütün bunlar bugünkü AFR üçün tipik mənzərəyə çevrilib. Alman politoluqu Aleksandr Rarın fikrinə görə, Almaniyada yaranan bu böhranda əsasən hökumətin tərkibində olan “Yaşıllar” partiyası günahkardır: “Alman fermerləri hökumətə ağlasığmaz məhdudiyyətlər sırıyan “Yaşıllar” partiyasının siyasətinin qurbanıdırlar. İndi onları aqrar sektorda olan dotasiyaların qəfil kəskin azaldılması ciddi narahat edir” – deyə ekspert qeyd edib.
Xatırlayırsınızsa, yanvarın əvvəllərində hökumət qarşıdakı islahatları bir qədər yumşaldacağını bəyan edərkən, AFR-in şimalında 100-ə yaxın fermer ölkənin məzuniyyətdən qayıdan iqtisadiyyat naziri, “Yaşıllar”ın həmsədri Robert Habekin mindiyi bərənin qarşısını kəsmişdilər. Elektron media vasitələri və televiziya kanallarının nümayiş etdirdiyi həmin hadisə zamanı fermerlərdən birinin traktoruna vurulmuş plakatda yazılmışdı: “Qansız insanın rəngi ağarır. Havasız insanın rəngi göyərir. Beyinsiz insanın rəngi yaşıllaşır”.
Keçirilən sorğulardan aydın olur ki, almanların əksəriyyəti etiraz nümayişçiləri ilə həmrəydirlər. “Bild” nəşrinin sifarişi ilə İNSA institutunun yanvarın 8-də keçirdiyi sorğunun nəticələrinə görə, AFR əhalisinin 69 faizi həftə boyu davam edən nümayişləri dəstəkləmişdir. Bundan əlavə, seçicilərin 72 faizi Almaniya kansleri Olaf Şoltsun işindən narazıdır. Son tədqiqatlar göstərir ki, seçicilərin yalnız 14 faizi Şoltsun partiyasına – Almaniya Sosial Demokrat Partiyasına səs verməyə hazırdır. “Yaşıllara” və Azad Demokratlar Partiyasına isə daha az – müvafiq olaraq 12 və 4 faiz səs vermək istəyən var. İNSA-nın sorğusuna görə, “Almaniya üçün alternativ”çilərə 18 faizə yaxın, XDS/XSS blokunda birləşənlərə isə 27 faiz seçici səs vermək fikrindədir.
Bundestaqın deputatı Yan Nolte deyir: “Əgər “işıqfor koalisiyası” fermerlərin tələblərini yerinə yetirməzsə, yəqin ki, daha çox təsərrüfat işini dayandıracaq və bağlanacaq. Son 10 ildə orta hesabla ildə 3,5 min müəssisə bağlanıb. Təbii ki, bu, Almaniyanın başqa ölkələrdən ərzaq asılılığını artırır”.
Buna baxmayaraq deputat, etirazların hökumətin iflasına səbəb olmayacağına inanır.
– Sorğuların nəticələri o qədər pisdir və “Almaniya üçün alternativ” (“AüA”) o qədər güclüdür ki, yeni seçkilər keçirməyə cürət etməyəcəklər. Bunun yerinə nümayişçiləri “sağçı ekstremist” adlandırırlar. KİV-in və xüsusi xidmət orqanlarının köməyi ilə “AüA”-i zəiflətməyə cəhdlər göstərilir, – deyə Yan Nolte bildirib.
Etiraz dalğalarının Avropanın başqa ölkələrinə sıçrayacağı ehtimalı da istisna deyil. Amma, görünən odur ki, müxtəlif dövlətlərin həmkarlar ittifaqlarının həmrəylik əlaqələri elə də güclü deyi. Buna baxmayaraq fermerlərin Almaniyadakı etiraz nümayişlərində Polşa, Çexiya, Avstriya, Fransa, Belçika, Niderlanddan olan kənd təsərrüfatı texnikaları da müşahidə edilmişdir. Ekspertlər həmçinin qeyd edirlər ki, Fransada fermerlərin etiraz nümayişlərinə qalxmaq potensialı daha böyükdür.
Açıqlamalara görə, əgər Fransada da yanacağa subsidiyaları ləğv etsələr və dizel yanacağının qiymətini artırsalar, o zaman Almaniyada baş verənləri Parisin küçələrində də müşahidə edə bilərik. Yeri gəlmişkən, Fransada ildə yüzlərlə fermer özünə qəsd edir. Ölkədə belə faktları çox da geniş açıqlamırlar. Bu da kənd təsərrüfatı məhsulları istehsalçılarının ağır və dözülməz həyatından xəbər verir. Fransa nəhəng kənd təsərrüfatı ölkəsidir, burada baş qaldıracaq fermer etirazları ölkə üçün çox ağır nəticələrə səbəb ola bilər.
Elə Hollandiyada da fermer lobbisi çox güclüdür. Elə ona görə 2023-cü ildə mövcud hakimiyyətin siyasətindən narazılıqların artması üzündən regional seçkilərdə müxalifətyönlü “Mülki Fermer Hərəkatı” qalib gəldi və 12 əyalətin 9-da qanunvericilik məclisində əsas söz sahibi oldu.
– Biz artıq Fransada və Hollandiyada fermerlərin etiraz nümayişlərini və nəticədə hakimiyyətin öz siyasətini dəyişməyə məcbur olduğunu müşahidə etmişik, – deyə Bundestaqın deputatı Ştefan Koyter bildirib.
Bundan əlavə, son vaxtlar Ukrayna ilə həmsərhəd olan ölkələrin aqrar sektorunda insanlarının ciddi narazılıqları müşahidə olunur. Məsələn, Rumıniyada bir neçə gün ardıcıl ümummilli fermer mitinqləri keçirildi. Vətəndaşlar əsasən nəqliyyatın icbari sığortasına, yanacağa aksizlərin və ödənişli yollarda gediş tariflərinin artırılmasına, həmçinin ölkənin sərhədlərində bürokratik yoxlamalara etiraz edirdilər. Xüsusilə məhsulları Ukraynadan daxil olan istehsalçılar tərəfindən ədalətsiz rəqabət şəraitinin yaranması yerli fermerləri narahat edirdi.
Etiraf etmək lazımdır ki, Aİ ölkələrində etiraz dalğasının daha da güclənməsinin əsas səbəbi bu ölkələrdə iqtisadi vəziyyətin gündən-gündə pisləşməsi ilə əlaqədardır. Ən yaxın keçmişdə iqtisadi və sosial həyatı çiçəklənən Avropanın iqtisadiyyatının bu günə düşməsinin əsas səbəbi isə bilavasitə müharibələr və bu ölkələrin dolayısı ilə bu müharibələri maliyyələşdirmələridir. Nə qədər ki, proksi-müharibələr davam edəcək, Avropa çətin əvvəlki rifahını qaytarmağa nail olsun.
Hazırladı:
İlqar RÜSTƏMOV
XQ