Fransa Xarici İşlər Nazirliyinin rəhbəri Ketrin Kolonna Moskvanın “Qara qitə”də güclənməsi fonunda Parisin Afrikadakı mövqeyini itirməsi ilə bağlı sualı cavablandırarkən, Afrika ölkələrinə “Fransanı Rusiya ilə dəyişməməyi” tövsiyə edib. Bu sözlər bir daha təsdiqləyir ki, Fransa uzun illər hakim kəsildiyi qitədə fiaskoya uğrayıb və onun yerini tutmağa çalışan ölkələrə qarşı çağırışlarə əl atır.
Fransa Xarici İşlər Nazirliyinin rəhbəri Ketrin Kolonna Nigeriyaya səfəri zamanı Afrika ölkələrinə “Fransanı Rusiya ilə dəyişməyi” tövsiyə etməyəcəyini bildirib. Parisin təsirini itirməsi fonunda Moskvanın Afrikadakı mövqeyini gücləndirmək barədə jurnalistin sualını cavablandırarkən “Mən sizin yerinizdə olsaydım, Fransanı Rusiyaya dəyişməzdim” deyib. Kollona qeyd edib ki, Sahel bütün Afrika deyil. Siyasi baxımdan Sahel Beşliyinə Burkina-Faso, Mavritaniya, Mali, Niger və Çad daxildir. “Afrika və Sahel qarışdırılmamalıdır. Afrika böyük və çox müxtəlifdir. Sahel istisna olmaqla, digər ölkələrlə əlaqələrimiz yüksəlir ki, bu da bizi çox sevindirir”, - deyə nazir qeyd edib. Amma burada bir məqamı qeyd etməyə dəyər ki, Afrikada baş vermiş son çevrilişlər anti-Fransa əhval-ruhiyyə dalğası ilə müşayiət olunub.
Xatırladaq ki, Mali, Burkina-Faso və Nigerdə 2021-2023-cü illərdə hərbi çevrilişlər olub. Ölkələrin yeni hakimiyyət orqanları Fransa ilə əməkdaşlığı kəsməyə başlayıb. Bundan əlavə, yayda Mərkəzi Afrikanın keçmiş metropolisi Fransanın yaxın müttəfiqi sayılan Qabonda da hərbi çevriliş baş verib. Eyni zamanda, Afrika ölkələri ilə Rusiya arasında əməkdaşlıq getdikcə artır. Belə ki, cari il iyulun 27-28-də Sankt-Peterburqda ikinci dəfə Rusiya–Afrika sammiti, iqtisadi və humanitar forum keçirilib. Tədbir 48 ölkənin və qitənin beş ən böyük inteqrasiya birliyinin rəsmi nümayəndə heyətləri ilə təmsil olunan Rusiya ilə Afrika qitəsi dövlətləri arasında geniş spektrli münasibətlərə həsr olunub. Rusiya Prezidenti Vladimir Putin Afrikanın çoxqütblü dünyanın qütblərindən birinə çevrildiyini, Moskvanın bu qitə ilə əməkdaşlığının son illər yeni səviyyəyə çatdığını və onu daha da inkişaf etdirmək niyyətində olduğunu bildirib.
Bu bir həqiqətdir ki, siyasətdə heç nə təsadüfən baş vermir. Fransızlar başa düşmürlər ki, fransızdilli afrikalılar niyə birdən-birə onları rədd ediblər. Fransızdilli Afrikada rejim dəyişikliyi dalğası ilə üzləşən Fransa mediası məəttəl qalıb. Parisin Afrika ilə hərbi, siyasi və mədəni əməkdaşlıq sahəsində uğursuzluqları nəinki qitədə anti-fransız əhval-ruhiyyəsinin artmasına, həm də Rusiya, Çin və ABŞ-ın təsirinin güclənməsinə səbəb olub. Bu barədə 92 fransız senatorunun cari ilin avqust ayında prezident Emmanuel Makrona ünvanladığı açıq məktubunda deyilirdi. Senatorların fikrincə, son illərdə Fransa hökumətinin üzvləri keçmiş müstəmləkələrə qeyri-rəsmi qəyyumluğu nəzərdə tutan “Fransız Afrikası” siyasətinə qarşı olan nostalji ilə razılaşmayanların hamısını ittiham edərək “uğursuzluqları ört-basdır edirlər”. Məktubda yazılırdı: “Bu gün dünənki Fransa Afrikası hərbi Rusiya Afrikasına, iqtisadi baxımdan Çin Afrikasına və diplomatik olaraq Amerika Afrikasına çevrilir”. Onun müəllifləri ingilis dilinin artan populyarlığı ilə əlaqədar olaraq qitədə fransız dilinin rolunun tədricən azalmasına diqqət çəkmişdilər.
Ekspertlərin fikrincə, Afrikada uğursuzluqlar göz qabağındadır. Fransa ordusunun mövcudluğu yerli hakimiyyət orqanları ilə, ilk növbədə, silahlı qüvvələrlə müəyyən münaqişələrə səbəb olub. Mali, Burkina-Faso və Qvineyada hərbi çevrilişlər baş verib. Fransanın keçmiş müstəmləkələrində mövcud olan və Paris tərəfindən tətbiq edilən idarəetmə sistemləri artıq məqsədəuyğun deyil. Gənc afrikalıların valideynləri və ya babaları kimi Fransaya heç bir bağlılığı yoxdur. Afrikalı gənclər təkcə Fransa deyil, çoxlu tərəfdaşlarla əməkdaşlıq etmək istəyirlər. Buna görə də, əminliklə demək olar ki, Fransanı yaxın perspektivdə “qara qitə”də ağ günlər gözləmir.
S.ELAY
XQ