“Aktyorlar evi”nin səhnəsində Teatr Xadimləri İttifaqının “Qonaq teatrlar” layihəsi çərçivəsində Cəfər Cabbarlı adına İrəvan Dövlət Azərbaycan Dram Teatrının 142-ci mövsümünün açılış mərasimi olub.
Təqdimat mərasimində İrəvan Teatrının istedadlı aktyorlarının ifasında şair-dramaturq İftixar Piriyevin “Nurlu ömrün anları” tamaşası nümayiş etdirilib. Heydər Əliyevin 100 illiyinə həsr olunmuş və “Ulu öndər Heydər Əliyev irsini öyrənirik” layihəsi çərçivəsində nümayiş etdirilən tamaşa müstəqillik tariximizin gərgin dövrlərinə, müasir Azərbaycanın parlaq səhifələrini yaradan görkəmli dövlət xadiminin liderlik fəaliyyətinə həsr olunub.
Səhnə əsərində dövlət müstəqilliyini əldə etmiş Azərbaycanın hərtərəfli inkişafı, bu prosesdə Heydər Əliyevin azərbaycançılıq məfkurəsi və xalq birliyi, Ulu öndərin Qarabağ məsələsində qətiyyətli mövqeyi və Prezident, Ali Baş Komandan İlham Əliyevin rəhbərliyi altında Azərbaycanın Zəfər yürüşü təntənəsi öz əksini tapır.
Ə.DOSTƏLİ
XQ
