8 Noyabr Zəfər Günü! Bu tarix Azərbaycan xalqının yaddaşına qızıl hərflərlə yazılıb. Hər il olduğu kimi bu dəfə də Goranboyda Zəfər Günü xüsusi coşqu və qürur hissi ilə qeyd olundu.

Rayonun mərkəzi meydanı elə səhərdən üçrəngli bayraqlar, Qələbə rəmzləri və vətənpərvərlik ruhunu əks etdirən plakatlarla bəzədilmişdi. Tədbirdə Goranboy Rayon İcra Hakimiyyətinin başçısı Məhərrəm Quliyev, hüquq-mühafizə orqanlarının rəhbərləri, şəhid ailələri, qazilər, gənclər, ziyalılar və çoxsaylı ictimaiyyət nümayəndələri iştirak edirdilər.

Tədbir şəhidlərin əziz xatirəsinin bir dəqiqəlik sükutla yad olunması və Azərbaycan Respublikasının Dövlət Himninin səsləndirilməsi ilə başladı. Ardınca çıxış edən İcra Hakimiyyətinin başçısı Məhərrəm Quliyev 8 Noyabrın hər bir azərbaycanlının qəlbində qürur və fərəh hissi yaratdığını vurğuladı:

“Bu gün biz Müzəffər Ali Baş Komandanımız, Prezident İlham Əliyevin rəhbərliyi altında qazanılmış Böyük Qələbəni qeyd edirik. Qəhrəman ordumuzun, igid oğullarımızın döyüş şücaəti sayəsində üçrəngli bayrağımız Qarabağın hər guşəsində dalğalanır!”
\ədbir çərçivəsində məktəblilərin və gənc istedadların hazırladığı “Zəfər yolumuz” adlı sərgi böyük maraq doğurdu. Rəngarəng əl işləri, rəsm və sənət nümunələri xalqımızın qələbə ruhunu, Vətənə məhəbbətini əks etdirirdi.

Gənclərin ifasında səslənən vətənpərvərlik nəğmələri, şeir kompozisiyaları və idmançıların nümayiş çıxışları tədbirə xüsusi rəng qatdı. Qonaqlar alqış sədaları altında gənclərin ifasını izlədilər.

Sonda yerli incəsənət ustalarının təqdim etdiyi bayram konserti Zəfər Gününün əsl ruhuna çevrildi. Səhnədə dalğalanan bayraqlar, “Qarabağ Azərbaycandır!” nidaları və qələbə əhvalı Goranboyu bir daha birləşdirdi.

Bu gün Goranboyun hər guşəsində bir duyğu hökm sürürdü. Qürur, Vətən sevgisi və Qələbənin əbədiliyi!

Hamlet Qasımov
XQ-nin bölgə müxbiri