ABŞ-Tayvan təhlükəsizlik konfransı Virciniya ştatının Uilyamsburq şəhərində keçirilib və burada iştirakçılar “Çin təhdidinə” cavab axtarıblar. ABŞ dövlət katibi Entoni Blinkenin dediyi kimi, daha çox ölkə Pekini Tayvana qarşı güc tətbiq etməkdən çəkindirir və “dünya üçün risklər qeyri-adi dərəcədə yüksəkdir”. Öz növbəsində, Çin lideri Si Cinpinin ÇXR-in yaranmasının 74-cü ildönümü münasibətilə dediyi kimi, “heç bir qüvvə Tayvanla tam birləşməyə mane olmayacaq”. ABŞ-ı əsas təhlükə kimi göstərən Pekin Rusiya prezidenti Vladimir Putinin də qatılacağı “Bir kəmər, bir yol” sammitində regionun dinc inteqrasiyası üçün yenilənmiş strategiyanı təqdim edəcək.
Oktyabrın 1-dən 3-dək Uilyamsburqda keçirilən təhlükəsizlik, müdafiə və hərbi sənaye sahəsində əməkdaşlıq üzrə Amerika-Tayvan konfransı ÇXR-in yaranmasının 74-cü ildönümü münasibətilə bir həftəlik şənliklərə təsadüf edib. Bu müddət ərzində ÇXR-in lideri Si Cinpin Taipey ilə münasibətlər barədə yeni bir açıqlama verib. “Biz “vahid Çin” prinsipinə əməl etməliyik”, – deyən Çin lideri Pekində Böyük Xalq Zalında keçirilən ziyafətdə materik Çin və Tayvanın birləşməsini “heç bir qüvvənin qarşısını ala bilməyəcəyi tarixi qaçılmazlıq” adlandırıb. Çinin ali rəhbərliyinin üzvlərinin və Pekində akkreditə olunmuş xarici diplomatların iştirakı ilə Si Cinpin “güclü ölkə qurmaq və milləti dirçəltmək kimi böyük məqsədə doğru davamlı şəkildə irəliləyəcəyinə” söz verib.
Bu arada, Uilyamsburqda keçirilən ABŞ-Tayvan konfransı dəyişən geosiyasi şəraitdə Vaşinqton və Taypeyin Si Cinpinin bayram nitqində bəhs etdiyi “vahid Çin” yaratmaq ssenarisinin həyata keçirilməsinin qarşısını almaq üçün növbəti cəhdi oldu. Konfransın proqramına Tayvanın təhlükəsizliyinə təhdidlərin müzakirəsi, hərbi-sənaye sahəsində ikitərəfli əməkdaşlıq, adanın nəqliyyat, telekommunikasiya və enerji sektorlarında kritik infrastruktur problemləri, habelə Tayvan boğazında hərbi münaqişə risklərinin modelləşdirilməsi daxildir. Məsələlərdən biri də 2024-cü ilin yanvarında keçiriləcək Tayvan administrasiyasının rəhbəri seçkilərinə hazırlıq olub.
Forumun tayvanlı iştirakçıları arasında yüksək rütbəli hazırkı və istefada olan siyasətçilər və hərbi zabitlər, habelə seçkilərdə əsas namizədlərdən biri, ABŞ-a səfəri oktyabrın 5-dək davam edəcək Tayvan Xalq Partiyasının sədri Ke Venje də var. Birləşmiş Ştatları Dövlət Departamenti və Pentaqon rəsmiləri, həmçinin ABŞ-ın sabiq hərbçiləri təmsil edirdilər. Pekinin Tayvanla dinc birləşmək istəyi ilə bağlı bəyanatlarına baxmayaraq, Vaşinqton Çini adanı ələ keçirmək və bununla da Hind-Sakit okean regionunda böyük müharibəyə başlamağa qadir qüvvə kimi görür. Bunu ABŞ dövlət katibi Entoni Blinken Uilyamsburqda keçirilən forum ərəfəsində “Atlantic” jurnalına müsahibəsində deyib. O, həmçinin bildirib ki, getdikcə daha çox ölkə Pekinə güc tətbiq etməmək barədə xəbərdarlıq edir: “Təkcə son bir ildə biz dünya ölkələri arasında həm regionda, həm də ondan kənarda çox əhəmiyyətli fikirlərin uzlaşmasının şahidi olduq. Pekinə deyilir: bunu etmə. Təkcə Tayvan üçün deyil, sözün əsl mənasında bütün təhdidlər dünya üçün olduqca yüksəkdir”.
Tayvan ABŞ və digər ölkələr üçün niyə önəmlidir? Dünyada konteyner daşımalarının 50 faizi hər gün Tayvan boğazından keçir. Yarımkeçiricilərin 70 faizi adada istehsal olunur. Amerika diplomatiyasının rəhbəri xəbərdar edib ki, Çinin hərəkətləri nəticəsində Tayvan ətrafında böhran yaranarsa, qlobal iqtisadi böhran yaranacaq. Dövlət katibinin sözlərinə görə, “Çin dünya ölkələrindən getdikcə daha çox bu mesajı eşidir: qarışıqlıq yaratmayın”. Hansı ölkənin – Rusiya və ya Çinin – hazırda “Amerika və Qərbin demokratik dəyərlərinə ən böyük təhlükə” olduğunu soruşduqda, Dövlət Departamentinin rəhbəri bu çağırışları “təbiətcə çox fərqli” adlandırıb. E.Blinken deyib ki, hərbi, iqtisadi və diplomatik potensialı baxımından Çin dünya nizamını müəyyən etmək üçün Rusiyadan daha böyük imkanlara malikdir: “Bununla belə, onların can atdıqları dünya nizamı mahiyyət etibarilə qeyri-liberaldır”.
Çin isə məsələyə dair tam fərqli mövqeyə malik olduğunu açıqlayır. Bazar ertəsi Çinin Taylanddakı səfiri Han Çjiçyan “Bangkok Post” qəzetinə verdiyi müsahibədə bildirib ki, “ABŞ Çin Xalq Respublikasının inkişafının qarşısını almaq və bununla da sülh və sabitliyi təhlükə altına almaq üçün bölgədə qəsdən münaqişələri qızışdırdırır”. “ABŞ-ın Hind-Sakit Okean strategiyası əslində Çini cilovlamaq üçün siyasi alətdir”,- deyən çinli diplomat, həmçinin vurğulayıb ki, Çinin inkişafını məhdudlaşdırmaq cəhdi uğur qazanmayacaq və Pekin ölkələrlə qarşılıqlı faydalı əməkdaşlıq siyasətini davam etdirəcək. Bundan başqa, ABŞ-ı əsas təhlükə kimi göstərən Pekin Rusiya prezidenti Vladimir Putinin də qatılacağı onuncu yubiley “Bir kəmər, bir yol” sammitində Avrasiyada dinc inteqrasiya üçün yenilənmiş strategiyanı təqdim edəcək. Yeni sənədin Vaşinqtonun Asiya üçün təklif etdiyi təhlükəsizlik strategiyasına alternativ olacağı vurğulanır.
S.ELAY
XQ